A anu di meki a bojo
Granmama, omeni lési mi bai bojo na ju kaba? A fosi lési di mi kon djaso na dosi soso mi ai ben de na tapu, soso dosi. Na a uku pe densomeni sma e de mi ben e prési a dama nanga en mama. Mi ben e wani bai moro leki mi kan njan, leki wan sma di wani du ensrefi wan prisiri.
‘Mi mu domru en gi mineri?’
Ija.
A bigi bugubugu fu ala den strati ben e kon na wan dja. Anu, bere, futu moksi na ini a wan broin kloru na ini a faja son. Susu e kwinsi a ston, oto e lon pasa, sten e bari, djaso watramun e seri, drape napi, kasaba moro moro fara dréfisi.
A no abi kaba! Wan se fu libisma!
Teleki mi miti ju, mama nanga ju bojo.
I sidon so tiri, wan eri safriati sma na ondro a wowojo. Na angisa - weti nanga blaka - na tapu ju ede. Ju ai e luku nanga wan sabifasi di mi no o man rai.
Ju sidon e waki san e kon san e go. A libi. Na ju fesi a weti pan na tapu wan sani.
Ala tapu moi nanga wan duku noso wan fini manari; ju kan si ala san didon na ondro.
Dan mi kon krosibé. Mi luku a bojo, mi firi a kloru, mi firi a switi kaba, a primisi......
A no tron wan sari gi mi bika mi kan taki te now taki te mi e si ju sidon mi e kisi lostu gi a bojo.
A koti moi skoinsi na ini wan fokanti. A didon na ini a pan. Aw'ala mi gorogoro, mi granbere na ondro e bigin blo kaba. Ija, a fatu, a sukru, den wanwan korenti, a broin kloru, ija a kasaba, a gersi na wan anu wegi en nanga wan sabi gi a pipel. Nowan pikin dropu moro furu, no tumusi furu fatu. A no ebi. A de fu en so.
Ju bai wan pisi, ju e suku wan trawan kaba. Ju no sabi fa ju o du. Sowan koni no mak lasi gwe.
Wan koloku firi e wai na ini a eri wowojo, a eri run
Auteursrechtelijk beschermd