Leri fré?
Wan brekten mi wiki. A ben e go na bakadina kaba. Dan mi si tu pikinfowru e sidon na a skotu e tsji...... tsji...... tsji......
Mi waka go na a jarsin fu fini dwarsi trarkitrarki, mi anga, mi luku. Wan pikinfowru leki wan gadofowru nanga wan trawan leki wan blawkin te a jongu. A moro pikinwan teki wan dukrun na mindri den pirsi bromki, a saka go te na tapu a dré skropu, e meki alasortu sajansi e kari nanga en srapu sten. A trawan dati no e jere, a sidon e kar kari so safri nomo.
Mi jagi den. Sortu fréri na disi? Sortu lawlawsani na disi?
A moro pikinwan djompo go na tapu a olodrat fu a skotu, a moro bigiwan ben go na sé a gotro now. San o pasa now baka-agen baja?
Mi bribi a e leri en fré. Den bigisma nanga den singifowruman e taki tra fowru e poti eksi na ini den nesi fu trawan. Someki a man di e wroko e kisi a ebi fu sorgu, leri fré teleki a trawan gwe. Luku fa sani de no? En dati e singi nomo e njan nomo (kande en abi wan tra wroko e du di mi no sabi, den blawkin e sidon furu na ini palmbon e singi e bari te fruku mamanten te na hé, e teki a adjosi tu fu a dé na ini a redi sondongoleti).
A tamara mamanten fu en, fruku, na ini a safu leti fu a son-dowdropu den kon na ini a djari baka. A krenbromki na a skotu e wipi en switismeri gi den, pikinpikin weti bromki. A krakti fu a dé nanga a gron e gi den merki. Den sidon den e kari makandra, den e kari makandra. Ma disi lési misrefi kon luku taki mi no kan du noti. Den ben sa kon ala dé?
Ija, a tamara fu en den kon baka! Dan mi ben kon gwenti. Den e du alasortu sani fu den. Na ini a djari. Mi no e waki moro.
Di mi kisi misrefi tu dé na baka, mi arki, mi poti jesi: Nono, den no ben e kon moro. Den go na wan tra presi, noso a moro bigiwan di kon firi ensrefi stéfi, ari adjosi, gwe fu en na tra bon.
Auteursrechtelijk beschermd