Logo DBNL
Nederlandsche gedichten uit de veertiende eeuw van Jan van Boendale, Hein van Aken e.a. (1869)

Nederlandsche gedichten uit de veertiende eeuw van Jan van Boendale, Hein van Aken e.a.

(1869)–F.A. Snellaert–rechtenstatus Auteursrechtvrij

Vorige Volgende

Van dolinghen in rade. C. XXXIV.

 
HEre Melibeus / nu verstaet /
 
Dat ghi dolet in uwen raet /
2070
Doen ghi ontboedt / wet wale /
 
So vele lieden tenen male /
 
Om dat si u raet souden gheven.
 
Men vint voer waer bescreven:
 
Daer vele liede sijn / dat daer
2075
Confuse es / en̄ dat es waer.
 
En̄ daer confuse es / sonder wanc /
 
Daer es goet raet dicwile cranc.
 
Anderwerf doledi / wet /
 
Ghi soudt u beraden met
2080
Uwen besten vrienden en̄ maghen /
 
Die tidech waren van daghen /
 
Die u raet hadden connen gheven.
 
Nu hebdi uwen raet bedreven
 
Met jonghen / sotten riesen
2085
Die u de wrake in bliesen.
 
Die volghen ende smeken connen /
 
Daer si donnosele mede honen /
 
Die en soudi metten worden niet
 
Hebben doen comen / wats ghesciet.
2090
Derdewerf doledi daer in
 
Dat ghi ontdecket uwen sin
 
En̄ uwen wille vander saken /
 
Alse ghi woudt ter wraken.
 
Doen dat die jonghe hoerden /
2095
Volgheden si uwen woerden
 
En̄ aensaghen vele meer
 
Uwen wille dan u eere.
 
Dierdewerf waerdi oec verdrayt
 
Dat ghi u so hilt ghepayt
2100
Met enen rade allene
 
Daer so vele liede int ghemene /
 
Tenen hope vergadert waren.
 
Daer die sake so groet es / twaren /
 
Daer behoeft men raeds vele
2105
Alsoet behoeft te sulken spele.
 
Vijfdewerf doledi / dat verstaet /
 
Dat ghi niet en proevet uwen raet /
 
Weder hi quaet waer ofte goet
 
Eer ghire toe settet uwen moet.
2110
Sesdewerf doledi mede /
 
Want dat es der wiser sede /
 
Alse haer rade discorderen
 
Dat si dan wijsselijc gronderen /
 
Welc men best ane gaet
2115
En̄ volghen den wisen raet.
 
En̄ meer aensien de nuttelijcheyt
 
Dan alder menschen vleescheyt;
 
Want van hondert menschen omtrint
 
Men cume enen vroeden vint;
2120
Want die sotte / sijts gewes /
 
En minnen niet dan dat sot es.
 
Die wise man ghewaerlike
 
Vint selden sijns ghelike:
 
Daer om in ghedeelden rade
2125
Salmen volghen / vroech en̄ spade /
 
Den raet die de vroetste gheven
 
Sone machmen niet lichte sneven.
 
Daer af es dicwile ghesciet
 
In goeden steden groet verdriet.
2130
Dat si twisten inden rade /
 
En̄ der wiser raet versmaden.

Vorige Volgende