Nvchteren Loth. Dat is, middel om op te staen, uyt de ziel-verderffelijcke sonde, van dronckenschap, tot een maetich, ende godtvruchtich leven

[fol. 253v]

Ghebedt.

O Heere, ⁺ ick ben sonder raet, en daer en is in my geen verstandt, ick en ben van my selven niet bequaem yet goets te dincken, ⁺ maer myne bequaemheydt is van dy. Want ghy Heere gheeft wysheydt, ⁺ ende uyt dynen monde comt kennisse, ende verstant: Ghy zyt de ghene die wysheyt gheeft int verborghen, ⁺ die gheeft verstandighe ghedachten, gheeft verstant den ghenen die eenen dwalenden gheest hebben: ⁺ Daerom bidde ick dy, o God, hebbe ick ghenade in dyne oogen ghevonden, ⁺ wyst my dynen wech, dat ick dy kennen mach, ⁺ dyne handen hebben my ghemaeckt, ende gheformeert, Heere gheeft my verstant, dat ick dyne gheboden magh leeren, verlicht myn duisternisse, ⁺ dat vervult zynde met de kennisse van dynen wille, ick wandelen mach in dyn licht, ⁺ pogende altydts te doen't ghene goet, ende vermaeckelyck is, ⁺ in dyne ooghen, door Iesum Christum.

+ Deut. 32.

+ 2.Cor. 3.5.

+ Prov. 26.

+ Iob. 38.36.

+ Esa. 29.24.

+ Exod. 33.13.

+ Psalm. 119.

+ Psalm. 18.28.

+ Colos. 1.9 Esa. 2.5.

+ Hebr. 13.