Nieuwe gheestelijcke refereynen ende liedekens
(1603)–Willem van Spoelbergh–
Auteursrechtvrij
[pagina 13]
| |
Altijt is groeyende t'somers t'swinters beneven,
En sonder sneven, draecht vruchten en blommen plaisant,
Die hy presenteert den Vader in dat hemels lant,
Clara, dochter van Hortulana, als ghedreven,
Van Godt, heeft in desen hof een hoecxken beschreven,
Daer wt den hemelschen ackerman crijcht groot proffijt.
Gheluck en salich zy v, Bruyt, tot allen tijt.
Hier in wassen bloemkens van verscheyden nature,
Tot der heyliger Kercken sunderlinge ciraet,
Die dagelijcx door hen leven suyver en pure
De selue seer verstercken en brengen groote baet,
Door goedt onderhouden van hennen saligen staet.
Al zijn sy ghesloten tusschen soo hooge mure,
Den geur doet verdwijnen der ketters boosheyt sture,
Onder dese ghy eerweerdige Bruyt nv zijt.
Gheluck en salich zy v, Bruyt, tot allen tijt.
Een hop-blomken waert dy, naer Isaias leere,
Dat heden lieffelijck staet, en morgen haest vergaet,
Doen ghy noch waert in des werelts bedroch en eere,
Maer ghy hebt v selven nv verplant (dit wel verstaet)
Al wt des werelts wildernis vuyl en desolaet,
By het blomken Iesum Nazarenum den Heere,
Door v professie, sy behaecht hem soo seere
Dat hyt v eens sal loonen met het eeuwich iolijt,
Gheluck en salicheyt zy v, Bruyt, tot allen tijt.
Om dese uwe professie die ghy nu doet
Voorspoediger te vervolgen ende bewercken
Allen die dagen uws levens met vlijtighen moet,
Om v oock in allen deuchden vaster te stercken,
Dit Geestelijck Penseken dickmael wilt aenmercken,
Dat ic v nv schencke wt den gront mijns herten soet,
Als een bruyloft gifte, het is van geure zeer goet,
Met vijf coleurkens, om inden geest te zijn verblijt.
Gheluck en salicheyt zy v, Bruyt, tot allen tijt.
In het gheluwe coleur suldy mediteren,
Die bedriechelijcke werelt schoon in haer aenschijn,
Daer ghy in plaecht te dolen ende spacieren,
Die so veel menschen doot met haer mordadich venijn
| |
[pagina 14]
| |
Hier suldy beschreyen v sonden groot en cleyn
Inde werelt bedreven, en naer mijn vercleren
Met uwe ghebeden helpen en seconderen
Allen die in swerels stricken liggen breedt en wijt.
Gheluck en salicheyt zy v, Bruyt, tot allen tijt.
Dat hemels blauwe in dit penseken gevonden,
Moet v altijdt doen gedencken tot allen steden
Uwen Nouicien-staet eer ghy waert ghebonden
Hoe hemels, hoe vierich, hoe oodmoedich van seden,
Dat ghy doen waert: daer mischien op den dach van heden,
De eerste viericheyt allenskens wordt verslonden
Tot groot ootmoedicheyt sal die in corter stonden
V brengen, en wesen een profijtelijck verwijt.
Gheluck en salicheyt zy v, Bruyt, tot allen tijt.
Die witte coleure die het penseken stoffeert,
Bediet dat v professie suyver en schoone
Van alle voorgaende sonden v heeft ghepurgeert
Als tweede doopsel: op dat ghy voor s'Bruydegoms croone
Gelijc de schoone Hester mocht comen ten toone.
Sult oock met eenen, Bruyt, hier by worden geleert
Dat ghy voor Godt ende v mede-susters verkeert
Suyverlijck naer siel ende lichaem tot s'duyvels spijt.
Gheluck en salicheyt zy v, Bruyt, tot allen tijt.
Waer toe het vierde coleurken v oock helpen sal
Het schoon ghepurpurde, wesende als bloedich root,
Het welcke dat lijden uws Bruygoms sonder getal,
Voor ooghen stelt, daer mede hy v wt allen noot
Heeft verlost, ende gecocht wt puerder liefden groot
Om v is hy neder gedaelt in dit iammer dal
En sterf de bitter doodt aen dat hout des Cruycen smal.
Draecht dat bondelken mirrhe by v sonder respijt.
Gheluck en salicheyt zy v, Bruyt, tot allen tijt.
Noch hebt dy hier een coleur van doncker swertachtich,
Het welc v de droeue doot met allen haer verdriet
Ende haer bitterheden sal maken indachtich:
Om gheestelijck te leeren sterven naer Godts bediet,
Deuchden te doen, sonden te vlien, en brengen te niet.
Wildy op de doot peysen met sinnen aendachtich
| |
[pagina 15]
| |
Diet al vernielt ende wech neemt met fortsen crachtich,
Tsal v wesen een stouwinge tot goede metter vlijt.
Gheluck en salicheydt zy v, Bruyt, tot allen tijt.
Princersse en eerweerdige Bruyt ghepresen,
Ontfanght dit penseken van verscheyde coleuren,
Doorsieget wel aen alle canten: t'sal v wesen
Confortatif in tegenheyt, om sonder treuren
Volherdich te zijn watter oock mocht ghebeuren.
Al waerder oock een tempeest in v opgheresen,
Sult door dit penseken, ick beloeft v by desen,
Met Godts gratie vromelijck verwinnen den strijt.
Gheluck en salicheyt zy v, Bruyt, tot allen tijt.
|
|