Devote oeffeninghe op de vijf lettere van de soete ende alderheylichste namen Iesus ende Maria

Een ghenerale Biechte. ( Inden naem des Vaders, des Soons ende des Heyligen Gheests, Amen.

Ick arm sondich mensche versaeck den boosen vyant, van d’helle alle zijnen raet, daet, quaet ingeven ende

[p. 91]

ongheloof. Ick gheloove in God den Vader, in Godt den Sone, ende in Godt den H. Gheest, dat dese dry persoonen zijn een waerachtich God, ende datter anders gheen Godt en is noch comen en sal.

Met dese kersten gheloove come ick te biechten voor God van Hemelrijck, Marie zijn ghebenedijde moeder, allen Godts lieve heyligen, ende u Priester inde stadt Godts ende gheve my schuldich in allen sonden die ick gedaen heb van mijnen kintschen daghen af tot noch toe, hoe sy gheschiet zijn, dootlijck oft daghelijcx, met woorden, wercken, oft met ghedachten, hoe sy gheschiet zijn, sy zijn my al te samen uyt den gront mijns herten ser leet.

Tot een teecken o Heere datse my leet zijn, soo legghe ickse op u grondeloose bermherticheyt ende met den sondighen Publicaen slae ick voor mijn sondighe borst, seggende, o God

[p. 92]

vader ghenade, die my na u Godlijck beelt geschapen hebt, o God sone genade, die my met u bitter lijden verlost hebt, o Godt heylige Gheest ghenade, die my met u Godlijcke gratie verlicht hebt,

Spaert my o Heere in dit sterffelijcke leven, ende wilt my aensien met u ghenadighe ooghen, daer ghy mede aenghesien hebt uwen lieven Apostel Petrum als hy u drymael verloochende, Magdalenam als sy u voeten salfde, ende den moordenaer hanghende aende galghe des cruys.

Spaert my Heer in dit sterffelijck leven, ende wilt my instorten uwen Heylighen Gheest, dat ick met den heylighen Apostel Petro mijn sonden genoech mach beschreyen ende beweenen, met Magdalena u mach vierich beminnen, ende van herten lief hebben, ende in mijn uyterste mach hooren het troostelijck woort dat den Moordenaer aen u

[p. 93]

rechte zijde ghehoort heeft: Heden sult ghy met my wesen in het Paradijs.