Devote oeffeninghe op de vijf lettere van de soete ende alderheylichste namen Iesus ende Maria

[p. 434]

Daghelijcksche lesse.

1. Doen ick bekende dat den alderoppersten, voor my den aldernederste geworden was: doen en mocht my geen mensch so seer verdrucken ofte soo kleyn achten, ick dachte altoos, dat ick meerder verdruckinge waerdich was.

2. Doen ick bekende dat my gheen dinck anders dan Godt alleen vernoeghen en mochte, docht my wonder dat ic eenich ander dinck dan Godt soecken soude.

3. Doen ick bekende de edelheydt mijns lichaems, dattet my gheoorloft was dat reyne Lichaem Christi in mijn lichaem te ontfangen, soo docht my waerdich alle mijne krachten daer toe te keeren, dat ick mijn hart ende mijn Lichaem in onbevleckter reynigheyt soude moghen behouden.

[p. 435]

4. Doen ick bekende de soetigheydt der Hemelscher spijse, doe en mochte my de gulsicheydt der aertscher spijsen niet langer verleyden.

5. Doen ick bekende dat na so corten arbeydt die eeuwighe vreuchden mochten verkreghen worden, so docht my veel te kleyn te wesen, dat ick met mijn lichaem hier arbeyden mochte.

6. Doen ick bekende dat Gode alle dingh toebehoorde ende ick geenen eyghenaer maer uytdeelder der goederen Godts en waere: ende dat den alder-rijcksten voor my den alder-armste gheworden was, ende noch heden omliep inden behoeftighen: doen docht my wonder, dat ick eenen soeten beet alleen soude, ende ondertusschen mijnen Heer ende mijnen Godt soude laten buyten staen, ende laten vasten inden minsten Pelgrim.

[p. 436]

7. Noyt en vertoornde my introu der menschen, als ick dachte, dat ick mijnen Heer ende Godt soo ontrou gheweest hadde.

8. Doen ick bekende dat Godt my, die hem thien duysent pont schuldich ware, tot ghenade nam: soo en woude ick gheen mensch haeten om zijnder boosheyt of faute wille.