Logo DBNL
Spiegel historiael. Vijfde partie. Deel 2 (1931)

Spiegel historiael. Vijfde partie. Deel 2

(1931)–Lodewijk van Velthem–rechtenstatus Auteursrecht onbekend

Vorige Volgende

Van enen portere ende sinen honde .lvi.

4150
Int ander jaer, te Diest, gevel
 
Dat .i. rijc man hadde groet spel
 
Met .i. hondekijn, dat hi helt.
 
Het was int hus van selker gewelt,
 
Dat al moeste doen sinen wille.+
4155
Hen dorste daer niement, lude no stille,
 
Yet doen dat hem was jegen,
 
So wale deet die man plegen.
 
Hi helset, hi cusset, hi had so lief,
 
Dat hi hem dede al sijn gerief.+
4160
Hi hadder so groete genoechte mede.
 
Alsi bi hem was telker stede,
 
Dat hi alles dinges vergat.
 
In die kerke oec, daer hi sat,
 
Quaemt te hem dicke gelopen,+
4165
Ende deden vergeten al sier hopen
 
Die hi te Godewaerd in die messe
 
Soude hebben gehad, ende dinckenesse
 
Te Godewaerd oec mede.
 
Dese vergat hi altoes ter stede+
4170
Alsi dit hondekijn mochte sien,
 
So sere setti sijn herte in dien.
 
Nu geviel den man hier naer,
 
Dat hi bleef licgende openbaer
 
In .i. starke siecheit groet.+
4175
Daerom die hont so wee geboet,
 
Dat hi belde ende jancte.
 
+ Daeraf die man hem sere bedancte
 
Dat dit hondekijn dit seer dreef.
 
Entie man in dese siecheit bleef+
4180
.i. lange stont, so dat hi starf.
 
Ende tondekijn altoes verwarf
 
Dat sijn here was altenen bi,
 
Alse lange alse levede hi.
 
Ende doen hi doet was had groet seer,+
4185
Ende croep hem emmer naerre meer,
 
So datment nudwaerd moeste jagen.
 
Ende doemen ter kerken soude dragen,
 
Volget altenen hulende mede.
 
Ende daer men groef oec ter stede+
4190
Bleef dat hondekijn op sijn graf
 
Licgende, dat niement conde bringen af,
 
Ende lach daer op den dach al dure
 
Tote inder nacht. Ter selver ure
 
Geviel dat te Dienst ontstac+
4195
Ende dat daer tvier dede ongemac,
 
Want daer vele huse verborren.
 
Ende doe die wachten souden porren
 
Om die clocke luden te storme,
 
Sach hi neder, waer menige vorme+
4200
Van groter honden lach opden grave,
 
Daer ic hier te voren sprac ave.
 
Dese honde waren groet, swerd, ongehier
 
Ende uten ogen scoten vier,
 
So vreselijc ende so clare+
4205
Dattie gene waende openbare
 
Dattie kerke soude verberren.
 
Om dit werd die gene in werre,
 
Ende vervard so sere ter stonden,
 
Dat hi niet geluden en conde,+
4210
Sonder drie slage en weet viere,
 
Ende hi bleef licgende sciere
 
Van vervarnes om dit so groet,4212
 
Dat hi binnen der weke bleef doet.
 
Ende waeraf hem quam, liet hi verstaen+
4215
In sine biechte .i. caplaen,
 
Die hem te seggene verboet.
 
Maer doen die wachter was bleven doet,
 
So vertellet die caplaen deser gelike
 
Onder sine gesellen heymelike,+
4220
So dat uutbrac onder die liede.
 
Maer die portere, dart af gesciede,
 
Was vorbaer sere vander stat,4222
 
Datment niet dorste secgen om dat.
 
Ghi, heren, ende gi, vrouwen mede,+
4225
Die dese hondekijn hout gerede
 
Ende daer met drivet so grote [j]oye,
 
+ Dat ghi verget alle vernoye,
 
Ende sprect ende hebt genoechte daermede,
 
Dat gi verget alle goede sede+
4230
In huus, op straten ende in die kerke,
 
So dat gi verget alle goede werke.
 
Deen sprect ten andren openbaer:
 
‘U hondekijn hevet slecht haer,
 
Heeft hangende oren ende thoeft clene,+
4235
Eest camus ende subtijl die bene?’
 
‘Jaet, ende so wel gescepen,
 
Ende den lichaem so edelike begrepen,
 
Hets tscoenste hondekijn dat ic kinne.
 
Ic secge u oec, dat ict sere minne!’+
4240
‘Bi Gode,’ antword dander echt,
 
‘Dat gijt mint, dats goet recht.
 
Haddic .i. van dien gelate,
 
Ic sout lief hebben boven mate.’
 
Ay, gi vrouwen, ende gi heren,+
4245
Wacht u, dat si u niet verkeren
 
Gelijc dat dit hondekijn dede
 
Desen man, daer ic dit af sede,
 
Want snachts hondekijn verloren ward
 
Metten groten honden sward,+
4250
Datmen nie wiste waer.
 
Oec, seitmen heymelike, niet openbaer,
 
Dat int hondekijn die quade geest was.
 
Ic gelove vele te bat das,
 
Om die honde, dier snachts quamen.+
4255
Dus wanic datmet liep tsamen.

Vorige Volgende