Den lvst-hof van de christelicke zielen

X X I I. De Wijse Maeget beclaeget de Blintheyt des Werelds.

DIt zijn de woorden van de Wijse Maeghet, tot Besluyt van haere Nacht-wachten: O ghij Hemelen, hooret mijne reden: Waeter stroomen, hoore mijne woorden met eerbiedinghe ! Eerdt bodem, nemet mijne reden ter herten, met cidderen ende beven: Want mijne lippen sullen levendighe woorden spreken. Hoe is de wereldt soo blindt, De mensche soo dwaes, Dat sij dese tijden niet en onderscheyden ? Ghij blindt volck, wie heeft u betoovert, dat uwe ooghe niet en siet, uwe oore niet en hooret, uwe sinnen niet en verstaen, u herte niet en begrijpet; Dat God sich teghen u settet om te Richten, Over de me-

[p. 143]

nighvuldighe sonden die ghij in uwe blindtheydt doet ? Dit is het dat uwe ooghen toe houdet, uwe ooren verswaeret, u sinnen ontsinnet, u herte verstocket; Dat ghij den Heylighen Gheest van den beginne wederstaet ende u selven den Satan ende wereldt onderwerpet om Christvm in sijne aerme ledekens te cruycighen ende Godes verbolghenen toren op uwen cop te trecken.