X X I I I. Sij verhaelt [in den Persoon Godes] de straffe der boose.
NV Weent, Ghij aerdt bodem, ghij Goudt blommen, suchtet; ghij Netelen ende Distelen huylet; Ghij kaf; bevet: Want uwen dagh is ghecomen ! Richtende wil ickse richten in mijne Verbolgentheydt, ende in mijnen vierighen toren wil ickse verwijsen ! Hoe is uwe Schaemte soo bloot voor Godes Enghelen ! Hoe sien de Heylighe de teyckenen van uwe stijnckende hoererie ? Hebt ghij nu geen gouden laecken, om uwe schaemte te bedecken, dat ghij van de Bergen willet bedecket zijn voor des Richters verbolghen wesen ? Waer zijn de lijnen laeckenen die ghij over hoop hooptet, doen wij onder u naecket moesten loopen ? Bringhet u sijden ende flouweelen cleederen hier, soo wille ick daer mijne Aerme ledekens met cleeden: Ghij daerentegen, sult haere besmeurde cleederen aen trecken, dat u de wormen op het lijf loopen ! Ick wille haer sweet in u waeter, ende haere onreynigheydt in uwen dranck menghelen; Dat ghij met herten leedt naer de helle toe vaeret ! Ia Amen Heere Iesv: mete haer met de selve maete, daer sij dij in dijne Aerme ledekens met hebben ghemeten. God is gherechtigh.
Auteursrechtvrij