Gheestelijcke liedekens

Georgivs Wybotivs
Verbi Minister.

Ende daer na, hy meer ende meer cranck wordende, en heeft (so langhe hy sijn verstant hadde) niet afghehouden van sijne lieue Huysvrouwe, sijn Suster met haren Man, ende ons allen die by hem waren, vriendelijcken te troosten wt des Heeren woort, ende tot onsen schuldigen plicht liefde, eendrachticheyt, ende alle Godsalicheyt te vermanen: Sijn leerampt ende vermaenampt het welcke hem van Godt opgheleyt was, also met allen vliet wtuoerende, soo langhe het hem immers moghelijck gheweest is, ghelijck een trouwe Dienaer Godts toebehoort: Ondertusschen oock onse gebeden begheerende, ende selue met ons biddende: begheerende oock verscheydenmael aen ons allen, dat wy doch goeden opsicht op sijn Huysvrouwe souden nemen.

Ende als nv op het laetst de swaricheydt der sieckte begonde zijn verstant ende memorie te benemen, soo hebben wy hem met geduerighen ghebeden den Heere beuolen, tot dat hy des Saterdaechs den 23. Junij, ontrent den middach, in den Heere ontslapen is, in onser veler tegenwoordicheyt, die met grooter droefheyt ende vele tranen ghesien hebben, dat de Ghemeynte des

[fol. 18r]

Heeren om harer sonden wille, van sulck eenen vromen Herder, is berooft gheworden.

Ende des Sondaechs den 24. Junij, wert hy des na middaechs met een Predicatie, wt den Lof-sanck Symeonis ghedaen, in de teghenwoordicheyt der Ghemeynte, met oueruloedighe beweeninge der seluer, Christelijcker wijse, in de Nederduytsche Kercke te Londen begrauen: Alwaer hy (zijn siele nv van den doot doorghegaen sijnde in het leuen) oock nae den lichame, verwacht den Salichmaker Jesum Christum, die het selue vernederde lichaem veranderen sal, dat het ghelijckformich werde sijnen Heerlijcken lichame.

DIt alles lieue Broeders, hebben vvy V. L. cortelijck vvillen te kennen geuen, op dat ghy (na de vermaninghe des Apostels totten Hebreen) uvven voorganger ghedencket, die v so vromelijck het vvoort Godes ghepredict heeft: ende op dat ghy moecht vveten die vvtcoemste syner vvandelinghe, ende also zijn ghelooue na volghet: tot eere des naems Godes, tot syner Gemeynten stichtinghe, ende tot uvver sielen salicheydt, Door Iesum Christum, Amen.