Cyrurgie

Cap. 18.
¶ Van spenen die comen va(n) de(n) me(n)isoene.

Sulke lieden mogen spenen hebben comende vanden menisoene. dor die verscheit bi dat die lichame verteert es bi den menisoene. so comt hem .1. evel toe ende heet die bete. Bi der perssingen die hi heeft dor der beten wille valt dat bloet van boven neder. ende beneden den lichame te drenten. entie adren en mogen niet gedogen die perssinge. waerbi dat bloet stect die adren ute ende beeomen groet dat die gene groten rouwe heeft ter stede. ¶ Medicine es men hem sculdech te gevene die den lichame verclaren vanden veninen diere binnen siin. bi dattie lichame geclaert ware bi der medicinen becomt die lichame vast.

[p. 153]

ende werden alle die lede te gemake. Ende te gebiedene desen mensce dat hi nutte spise diene vast maect in den lichame. alse wederen vleesch gebraden ende gesoden peren van scruwelen of van angwissen gelardeert met wasse. Ende gesoden melc met bloemen ende was daer in gedaen. Ende geeft hem drinken wijn van gasscoengiën tote hi te hemselven comt. ¶ Achter diere tijt dat de lichame gesuvert es so es men sculdech te doene dingen boven die spenen die dwinen doen. alse popelioen geminct met coperrode ende met sukere cleine gemalen also vele vanden enen alse vanden andren op .1. plaster van stoppen genet in borne ende uut geduwet. ende optie spenen

⁺geleit. si selen daerbi verdwinen. ¶ Of wierooc ende aluwe gestampt elx even vele geminct met aysine ende metten witten vanden eye. zalve gemaect hieraf ende gespreit op een plaester van stoppen boven die spenen gedaen si werden daerbi verdreven. ¶ Of sout ende stoppen verbernt te gadere van elken even vele gewichts pulver daer af gemaect met honege gemaect zalven gelijc boven een. plaester gespreit ende optie spenen geleit. si verdriven. ¶ Apie. croppe van weede. out quaet honech. scapen roete. eniuun. van elken even vele int gewichte gestampt ende te gadere gedaen ende gemaect .1. plaester daer af. also heet als hijt gedogen mach geleit boven die spenen. si verdwinen. Ende te gebiedene dat hi hem doe laten ter hooftadren. Opten sesten dach daerna ter venteusen uut te treckene dbloet te hem wert. daer bi die spenen voeden. so dwinen die spenen ende genesen.

+ B 144a.