Cyrurgie

Van den clappoeren diemen heet bubo.

Van bubo dat siin clappoeren ende si heeten alsoe achter die hule die welke altoes woenen in de gaten daert doncker is ende in heimelicke steden In bomen in husen in kerken ende dese apposteme si ghelijct want si verkiest heimelicke steden alse onder de oeren onder de occelen. ende in de liesschen ende dese aposteme ne selmen niet weder slaen met coude plasteren. omme deser nae volghende redene wille. Ende men sel weten dese aposteme die onder den oeren commen metter apostemen soe suveren hem die hersinen van horen overtullingen humoren die daer waert loepen alse eene fonteine. Ende de bubo die onder die oxcelen rijsen bi hem purgieren dat herte ende die longhen ende die borst Ende die in de liesschen staen daer suveren hem die ondersten leden van den buucke alse levere milte niere ende darme ende omme deser reden vorseit ne esmen gheene sculdich te wederslane noch van der steden te verdrivene met couwen medicinen. want die materiën die hem souden suveren

bi bubo der apostemen. verslouch⁺ men die Die mensche waer in groete vreese daer te laden in dat lijf groete siecheit ende apostemen zwellinge ende menisoen beleet (l. belet) van wel te horne ende vele andere dolingen in der leeden vorseit Ende daer omme selmense doen hute breken ende suveren ghelic andere apostemen. Int erste omme dese aposteme hute te doen breken soe leght er op dit mollificatijf ¶ ℞ mussilaginis semen lini fenugreci. radicis malve. bismalve.ana. ℥. ij. exungie porcine quoad sufficit Dit minget ende siedt over een. ende dit leght der op wel warme smorghens ende savons tote die bubo morwe ende altoes baiense met lauwen water eermen den plaster der opleght

+ C 62c.

[p. 187]

ende als jou dinct dat si es morwe dan nemt eene vlieme alsoe (schets) ghemaect ende snitse op in de langde dan suverse wel dan ebt ghemaect eene wiecke van stoppen ende stectse der in ende daer boven soe leght eene plaster die vorscreven staet int capittelum van den hoofde die men heet unguentum fuscum ende alsoe selment laten ligghen tote des ander daghes. Dan selmen den plasteren of doen ende baient ende suverent met lauwen water ende dan drogent. Dan selmen der in steken eene wiecke ghenet met mon-

⁺dificative dat hier nae volghet ende daer boven leght eene plaster van unguentum fuscum ¶ ℞ succum apium recentis .Ʒ. iij. mellis .℥. j. blomme van tarwen .℥. ½. dit minget over een ende siedt een wilken ende daer met besalvet diene wieken Dits een goet mundificatijf want het suvert ende doet vleesch wassen. Avicenna. die placher op te leggene dese nae volgende salve Ja alsi wel droughen ende etterden. ¶ Salve ¶ ℞ resine albe. lib. ½. cere .℥. v. aceti vini .℥. ij. Dit siedt over een tote dat de wiin ec (l. oec) versoeden is ende dan doet of ende doet in dine bosse Dit was sine salve daer hi met vele wonden cuererden ende ghenas ja die versch waren.

+ C 62d.