Borgerliicke Huyshouding

[fol.  C4v]

Derde Handelingh. Eerste wtkomst.

Vader des Huysghensins. Outste Zone.

Vader.

’Khebb’ menichmael ghehoort, datter geen meerder smert
Of droefheyt rijsen kan in een Vaderlick hert.
Dan dat sijn Sonen of Dochters van hem gebooren
Niet luyst’ren na sijn stem: zijn raet niet willen hooren
Waer door het dan gheschiet, dat sy als scheps’len loos,
Gantsch overgeven sijn haer eyghen sinnen boos.
Datmen in’t teghendeel gheen meer vreught kan bedincken,
Of in eens Vaders hert nimmermeer sach insincken,
Dan dat hy selver vroom en Godtvruchtigh zijn zaet
Wt hem ghebooren, siet navolghen inder daet
Zijne gantsch heyligh en Godvruchtighe voetpaden:
Waer door sy dan Gods Gheest en zeghen op haer laden
Ick hebb‛ so nu so dan wel swaricheyt gehadt
Soo dat ick als mijn Siel in droefheyt groot besat,
Maer tswaerste heb ick dan, twelck alles gaet te boven,
Noch niet ghesmaeckt: waer voor ick Godt dancklick moet loven:
En bidden, dat ick mach vreught in mijn kind’ren sien,
Op dat al wat sy doen, mach ‘tsijner eer gheschien.

I.Zone.

Och Vader: Godt de Heer, wil u en ons dat gheven,
In wien wy alle ooc tsaem leven ende sweven.

Vader.

Ghy weet hoe meen’gen sucht ick haeld’ uyt thert wel diep:
Ick weet, hoe meen’ghen nacht van sorgh ick noyt en sliep.
Ghy weet wat kosten groot ick aen u heb ghehanghen:
’Tis my doch alles niet, wanneer ick mach erlanghen
In mijnen ouden dagh die vreught aen u te sien,
Dat Gods ghemeynt en kerck veel vruchts noch mach geschien
Doort hooren van Gods woort, vloeyend’ uyt uwen monde:
En door u leven reyn, voor d’menschen tallen stonde.

I Zone.

’Khoop Vader ghy sult noyt berooft zijn van uw’ hoop:
Want ick met u naer een Godsaligh eynde loop

Vader.

Meerder en wensch ick niet. V een voorschrift te gheven
Int snijden van Gods woort, ben ick niet in bedreven.
Dat hoop ick, hebt ghy in Gods woort bevonden // wel

[fol.  D1r]

 

Door hem, die u leerden dat tallen stonden // wel.

 

Alleen is dit mijn wil, mijn wenschen en begheeren,

 

Dat hoe ghy hooger zijt, u meerder sult verneeren:

 

Want wie Gods waerheyt leert, soeckende werelts eer,

 

Die bouwt met d’eene hant met d’ander smijt ter neer

 

Schoon dat ghy leeraers veel saeght in gaen quade weghen,

 

Volcht ghy alleen het padt Christi uws hoofts te degen

 

Die niet gesocht en heeft hoocheyt of werelts staet:

 

Maer die veel eer van hem weghen ter neder slaet.

 

Leert van hem, dat hy is sachtmoedigh en ootmoedich:

 

Onnoosel als een Lam in all’ zijn doen rechtgoedich.

 

Weest geen uytnemer dan van yemans hooch persoon:

 

Stelt u voor die arm is, soo wel als rijck ten toon.

 

Weest gheen liefhebber van des werelts potentaten,

 

Soo dat ghy tslechte volck g’lijck als sout varen laten.

 

En toont, dat ghy perfeckt in leven zijt en leer,

 

Op dat ghy Sielen soo meught winnen dies te meer.

 

I. Zone.

 

Tot t’een en t’ander, hoop ick sal my Godt verleenen

 

Sijn genade en gheest.

 

Vader.

 

Soo wilt u dan vercleenen

 

Onder de macht’ge handt van Godt, ons Heer ghevreest

 

Die u in al u doen wil leyden met sijn Gheest.