Borgerliicke Huyshouding

Derde Handelingh. Vijfde wtkomst.

Vader ende Moeder des Huysghesins. I Zone.

Vader.

Vrouwe, de Meyt heeft my terstont naer u ghevraeght

Moeder

Ick werd’ van eene Meyt mijn deel toch wel geplaeght.
Ick heb haer hier en daer, thuys en langhs all’ de straten
Ghesocht en vind’ haer niet.

Vader.

Ick sagh haer schueren vaten.
Veer achter in een hoeck: Daerom weest doch te vreen:
Men kijft somtijts doch wel, en men heeft weynigh reen
Ey, wilt naer huys toe gaen, en haer naer u vermoghen
Beschicken noch een hulp, die haer mach helpen drooghen
De vaten: op dat sy wat anders neem ter hant,
En twerck soo metter haest eens raecke aen d’ een kant.

Moeder

Neen lieve Man: men most hier so niet menagieren,
Kap en Covel soudmen soo in sijn huys verteeren.
Gheen schadelicker tuygh, ick bid ghelooves mijn,
Dan de voetsolen van de Dorpel-maeghden zijn.

Vader.

Wel gaet ghy dan naer huys, en maeckt het selfs te deghen,
Want yemant moet de vloer, ghy, of een ander veghen.