Tvoyage van Mher Joos van Ghistele

(II, 46) [Heilige plaatsen rond Jerusalem en Bethlehem]

[T]e Jherusalem dus commen zijnde ende gherust hebbende drie oft vier daghen, altoos begheerende de maertse daer onttrent breeder te bezouckene, wart vanden advijse midsgaders den gardiaen vanden cloostere van Montesyon te reysene ten diversschen plecken omtrent Jherusalem gheleghen, daer de voorseyde noch niet gheweest en hadden. Dus hare ghereetschepe ghemaect hebbende ende te samen van Jherusalem scheedende, (132v) quamen eerst an tgroote chaen voor Jherusalem daer vooren af gheseyt es.³⁹⁵ Van danen voort rijdende, uut slaende wat ter luchter handt, latende den wech van Jaffe ter rechter hand, zo comt men ter stont an eene zeer lustelicke plecke, een schoon clooster van heydenen, uutnemende

395 Nl. in Tvoyage II, 15.

[p. 128]

costelic behuust, bemuert ende ghetort, binnen al vervult met allen vriendelicken vruchten van allen soorten, toot welken voorseyden cloestere men begraeft alle de mammeluucken die binnen Jherusalem steerven oft daer onttrent, ende insghelijcx alle de ghone die bij justicien daer ghedoot werden. Van desen voorseyden cloostere voort rijdende ende dat latende wat ter rechter handt, zo comt men teenen anderen cloostere, gheheeten Ten Heleghen Cruuce, dwelke de eerweerdeghe Helena daer hadde doen maken ter eeren van dat daer den olijfboom ghewassen was daer eens deels 't Helich Cruusse Ons Heeren af ghemaect wart, zo vooren daer af gheseyt es.³⁹⁶ Item al tvorseyde voor bij rijdende eenen verden wech, zo comtmen teender plecken, ghenaemt t'Sente Phelips, daer eene schoone, overvloijeghe fonteyne spruut, de welke ververscht ende bedaut alle de valleyen daer onttrent toot Jherusalem toe.³⁹⁷ Te deser plecken zo doopte Sente Phelips Eunuchum, den argentier vander coninghinnen van Ethiopien, alsomen daer af leest int bouc vanden Weercken der Appostelen int viii^e capittele; ter zelver plecken plocht te stane een schoon cloostere dwelc nu meest al vervallen es ende ombewoont, zo datter anders niet dan de mueren (133r) over hende en staen, ende van Jherusalem toot daer zo eist eenen zeer vriendelicken wech, al meest over beede zijden vruchtbarich lant wezende van aldertiere grane, boomen van alderande vruchten ende van vele schoons wijngaerts.

396 Zie Tvoyage II, 24.

397 Sinds de kruisvaarderstijd werd deze fons sancti Philippi geïdentificeerd met 'Ain-el-Haniéh, 10 km ten zuidwesten van Jerusalem. Zo deed ook Burchardus, IX, 27 en Zeebout volgt hem blijkbaar na.