Tvoyage van Mher Joos van Ghistele

(II, 47)

[V]an deser plecken voort rijdende, zo comt men teender vriendelicker, scoonder, grooter valleyen daer inden middewaert ghestaen heeft een schoon cloostere dat nu zeere vervallen es, maer noch ter tijt woonen daer wat Griecxsche monicken diemen seyt calloyers. De principale keercke es noch in wezene, bemuert rontomme met eenen grooten steercken muere, zo dat houwelic es jeghen eenen loop van bouven ende Arabianen. Dit voorseyde cloostere was ghesticht inde eere van Sent Jooris, ende noch ter tijt zo es daer van hem eene zonderlinghe relique ende memorie. Te wetene eene groote, zware kethene met twee ende dertich scakels, sommeghe nieuwe ende sommeghe oud wezende, metter welker hij ghebonden was als hij ghemartiriseert wart. Te deser plecken gheschieden daghelicx groote mirakelen bijden wille Gods ende ter eeren vanden heleghen rudder Sent Jooris, zonderlinghe an besetene meinsschen die daer ghebrocht werden van diversschen landen, de welke ghebonden (133v) worden metter voorseyder kethene, ende zonder anders meer toe te doene werden binnen den derden daghe verlost ende ghezuvert, ofte steerven ter zelver plecken. Item hemlieden was daer gheseyt van dien broeders, dat teender tijt dese kethene ghenomen was van anderen nacien van kerstenen, uut spijte ende uut nijdicheden vanden mirakelen daer gheschiedende. Maer de ghone diese ghenomen hadde, wart ter stont blent ende lam in al zijn leden, als waer bij dat hijse weder restitueerde ter plecken daer hijse ghenomen hadde, ende datte ghedaen hebbende, wart weder ghesont ende siende als te vooren. Dus ter stont dese kethene ghesien ende ghevisenteert hebbende, zo ghecreegh de voorseyde edel man die met den gardiaen van Jherusa-

[p. 129]

lem daer commen was, groote begheerte omme eeneghe scakels van deser kethene te moghen hebbene, als waer bij hij den gardiaen daer mede hij commen was, hertelicken bat den religieusen te spreken, te kennen ghevende zijne begheerte, twelc de gardiaen gheerne dede ende ghijnc ter stont bijden oversten vanden voorseyden calloyers, zegghende dat daer was een edel man van verren ende vremden landen, groote devocie ende begheerte hebbende een deel vander voorseyder ketene te moghen ghecrighene, die te doen eerene in zijne maertse daer hij woonachtich es, biddende ter eeren Gods ende ter weerdicheyt vanden heleghen rudder Sent Jooris, datmen zijne heertelicke begheerte daer inne verhooren wilde. De voorseyde overste metgaders den anderen religieusen dit hoorende, en waren daer toe niet wel gheneghen omme de groote dangieren (134r) die daer up zouden moghen commen. Maer emmer int hende, mitsgaders datter ghesproken was van te ghevene eene goede aelmoessene, zo consenteerdense te ghevene twee scakels vander voorseyder kethene, twelke ooc zo ghebuerde, hemlieden grootelicx daer af bedanckende ende schinckende eene goede aelmoessene. Ende van desen voorseyden ghifte, teender ghetughenessen, zo worden brieven ende bezegheltheden ghegheven vanden religieusen van diere plecken, ende oec insghelijcx vanden gardiaen van Monte Syon onder den grooten zeghele vanden voorseyden cloostere.