Tvoyage van Mher Joos van Ghistele

(III, 28)

[C]ommen zijnde te Dealmarach ende daer eenen dach gherust hebbende, zo meenden de voorseyde ghereist thebbene naer tclooster van Sente Anthuenis,¹⁴⁰ deerste heremite, dwelke leyt over de riviere van Nilus omtrent der Rooder Zee in eene valleye tusschen grooten ende zwaren ghebeerchten (203v), ende ooc naer een ander cloostere, ligghende onttrent een half dachvaert van danen ten deserte waert uppe, up eenen hooghen beerch, daermen seit dat Sente Pauwels, ooc deerste heremite,¹⁴¹ plach te woonene ende zijne penitencie te doene. Maer doen zij begonsten hare ghereetscepe te makene om reysen, hemlieden beradende metten religieusen van dier plecken, zo wart hemlieden gheseit dat de voorseyde cloosteren niet meer van kerstenen bewoont en waren, nemaer alle de religieusen verjaecht, ende warden als nu gheocupeert vanden Arabianen, waer omme niet wel moghelic en was die aldoen vredelic te besoucken, mids welken de voorseyde te rade worden niet verder te trecken ende weder te keeren, ende huerden een ander scip metten welken zij de riviere neder quamen toot der stat van Alkayeren binnen twee daghen en half, daer zij vijf daghen toe ghedaen hadden.

140 Deir el qaddîs Antwân, op ong. 30 km van de Golf van Suez; het klooster van St. Paulus, Deir Mari Bolos, ligt ruim 25 km ten zuidoosten van het andere.

141 De H. Paulus van Thebe was een tijdgenoot van de H. Antonius.