Tvoyage van Mher Joos van Ghistele

(VI, 15)

[S]cheedende van deser plecken voorseit, zo reistmen noch eenen langhen wech duer de zelve planure, de welke haer strect also verre alsmen met ooghen ghesien can naer de wildernessen van Arabien Deserta, gheene doorpen onder weghen vindende, anders dan hier ende daer cleen ghehuchten van huttekins, bewoont van Turckemannen ende baudewijnen, hebbende vele schoonder cudden van aldertiere beesten daer zij bij leven, ende alzoo comt men an eene valleye daer eene redelicke (301r) riviere duer loopt, ghenaemt Sadacke,⁷⁵ over de welke men rijdt met eender steenender brugghen met tien boghen. Int neder rijden van deser, ter rechter hand up eene steenrootse, zo plocht te stane eene schoone stede, ghenaemt Rastijn,⁷⁶ die de Arabianen al ghemineert hebben ende bedorven, zo datter nu niement in en woont, gheen bescheet daer van zijnde dan ten sommeghen plecken de oude mueren daer vele hoopen van steenen bij ligghen. Ende anden voet vander

75 De 'Asi of Orontes.

76 Er Rastan.

[p. 307]

voornoemder brugghe staet een schoon chaen, ooc ghenaemt Le Chaen Rastijn, zeer steerc ghemaect omme der Arabianen wille, die daer ghemeenlic pleghen te commene als zij weten datter eeneghe carevanen - dat zijn gheselschepen van coopmanscepen - lijden oft logieren, omme die te beroovene oft groote courtoisien en ghiften daer af te ghecrighene, zo als dat zelve ghebuerde doen de voorseyde daer quamen. Want zij vonden daer omtrent twee hondert paerden ende vier hondert voetganghers die hem den wech meenden ondergaen ende onderreden thebbene, maer bij dat zij tgheet qualic ghehauden hadden ende bij zeer rijdene, ontdedent hemlieden, zo dat zij meest alle int chaen gherochten, eer de Arabianen an hemlieden consten ghecommen, uutghedaen vive oft zes rampsaleghe vanden gheselschepe, die worden van hemlieden ghevanghen, in zulcker wijs dat zij voor die te lossene ende voor haerlieder saufconduit tooter stede van Aman gheven moesten uuten ghemeenen gheselscepe dertich ducaten, weder (301v) ghevende de ghevanghenen, ende lieten hemlieden bij dien voort reisen ombeledt. In dit voorseyde chaen woonen ooc gaffaren, maer bij ghelucke zo en warter een vanden voorseyden niet bekent voor kersten, bijden welcken dat zij alle te samen zonder meer molestacien van daer gherochten. Dus over de brugghe wesende, een lettel gheclommen hebbende uuter voorseyder valleyen, comt men weder in eene groote schoone planure ghelijc als te vooren, zo dat van verden, vander eender naer dander te siene, schijnt al eene planure wesende, nietjeghenstaende nochtans dat de valleye ende riviere daer vooren af gheseit es in midden zijn, ende up de zijde daer zij doen reden, zo beghintmen te vindene zeer vele schoonder doorpen over alle zijden, ende langhe zo ghereden hebbende, zo comt men ter rechter hand an een redelic ghebeerchte, omtrent eene mile groot wesende, daer ghenaemt Jebellaerbey.⁷⁷ Up talder upperste van welcken plaghen te stane diverssche schoone cloosteren, waer af deen ghenaemt was tclooster van Sente Symeon, maer de Arabianen hebben nu cortelinghe alle de religieusen uute ghejaecht, omme dat zij hemlieden niet gheven en wilden dies zij hebben wouden, zo dat tzelve cloostre nu ter tijt al ydel staet ende ombewoont. Anden voet van desen voorseyden ghebeerchte zo achterhaelden zij de carevane vanden Torcken, Persanen ende van anderen heydenschen nacien, commende van Lamecha, daer zij in peregrinaigen gheweest hadden omme te versouckene huerlieder prophete Machomet, inde welke zijn mochten onder kemels, mulen, paerden, (302r) esels ende andere dieren wel twalef oft dertien hondert beesten, zom lieden, zom vitailge voerende, dat inder waerheit alte nieuwe was omme ansien, maer mids dat zij zo soetelic den pas reden deen den anderen verbeidende, zo overvoeren de voorseyde hemlieden. Ende voort rijdende duer een redelic goet lant, wel ghehouffent ende besaeit, over alle zijden vele schoonder dorpen ende behuusde plecken latende, zo quamen zij ter stede van Aman⁷⁸ die zij zeere begheert hadden.

77 Bedoeld is de kleine bergrug op 10 km ten zuidoosten van Hamâ.

78 Zie aant. VI, 16.