Poëmata

[p. 147]

Actvs qvintvs.

Assuerus, Edissa, Amanus, Atachus.

Ass.

EDissa coniux imperI consors mei
Si quid rogatum coniugem velis tuum,
Audacter effer; seu Palestinam tibi,
Vagosq́ue Parthos, aut magis vagos Scythas,
Seu potius optes vberem AEgypti plagam,
Dabo petenti. vis vt Euphrates tuo,
Aut tumidus Adris subdat imperio caput?
Adijciam Hydaspen, siue cunctorum magis
Diuidere mecum iura regnorum velis,
Nec hoc recuso, si quid exoptes, pete.

Ediss.

Magnanime Princeps, vester incassum fauor
Immensa petere regna damnatam iubet;
Aliud rogandum est, sceptra meditari vetat
Qui iustus aegrum pectus obsedit timor
Fati imminentis, per tuae sacrum rogo
Diadema frontis, & polo gratum caput,
Miserere gentis aequior iudex meae
Quam mecum iniquus hostis extinctam cupit.
Adeóne vilis natio Iudaei sumus,
Quod innocentes poena tam grandis manet,
Quae vix nocentes lenta post crimen premit?
O si vel aere venditi, aut licitum foret
Mutare turpem rursus exilio necem,
Et saeua tantam iura mandarent fugam,

[p. 148]

 

Aliquemque sinerent esse victuris locum:

 

Aut vbi sub Arcto noctis immensae rei

 

Vix Solis ignes tempore exiguo vident;

 

Qua veris expers frigore aeterno pigrum

 

Caput Maeotis languido fluctu trahens,

 

Semper rigentem Caucasi rupem alluit:

 

Aut vbi renato penitus ardescens die

 

Inhospitali terra sub Cancro gemit,

 

Qua primus oritur Nilus, & tenuis adhuc,

 

Suoq́ue paene nomine indignus fluit.

 

Pateremur ista taciti, & insontes licet,

 

Non prodituro fata premeremus sinu.

 

Non patitur illud hostis, & vitam quoque

 

Crudelis vrget; parce qui solus potes

 

Prohibere, tantum nequis admittat scelus.

 

Ass.

 

Quis talia audax crimina temerario

 

Molitur ausu! purpuram testor meam,

 

Iustosq́ue scelerum vindices testor deos,

 

Peribit ille.

 

Ediss.

 

Gentis inimicus meae

 

Amanus est, qui plebis innocuae necem

 

Iurauit, ipse criminis multi reus.

 

Ass.

 

Amanus ista?

 

Ediss.

 

Crede.

 

Ass.

 

Vix tardus potest

 

Animus, Amanus tale meditetur scelus?

 

Ediss.

 

Certum est.

 

Ass.

 

Amanus tale meditetur scelus?

Exit Assuerus.

 

Am.

 

Miserere Edissa, supplicem flecto pedem.

 

Miserere Princeps, fronte quid toruâ abnuis?

 

Et aduolut[u]m genibus expellis tuis?

[p. 149]

 

Miserere Princeps.

 

Ediss.

 

Vtar exemplo tuo.

 

Am.

 

Peccasse fateor.

 

Ediss.

 

Sic in auctorem suum

 

Meditata redeunt crimina, & segnis quidem,

 

Sed aequa Nemesis opprimi insontes vetat.

 

Am.

 

Peccasse fateor.

 

Ediss.

 

Poena comitetur scelus.

 

Am.

 

Miserere Edissa.

 

Ediss.

 

Seruus Edissam inuocas.

 

Am.

 

Miserere Princeps.

 

Ediss.

 

Principem agnoscis? dabo.

 

Am.

 

Edissa Phoebum testor & Deum tuae

 

Gentis patronum.

 

Ediss.

 

Fabulam surdae canis.

 

Am.

 

Ad ista stratus genua; quid manum abijcis?

 

Orare saltem liceat.

 

Ediss.

 

Oratum est satis.

 

Am.

 

Edissa.

 

Ediss.

 

Frustrà.

 

Am.

 

Testor aeternos deos.

 

Ediss.

 

Nihil obtinebis.

 

Am.

 

Testor aeternos deos.

 

Ediss.

 

Nil agis.

 

Am.

 

Edissa, supplicem exaudi tuum:

 

Miserere Edissa.

Redit Assuerus.

 

Ass.

 

Furcifer [...]iam meam

 

Opprimere tentat coniugem? testor deos.

 

Ata.

 

Magnanime Princeps siste generosum impatum,

 

Et pauca serui verba.

 

Ass.

 

Non audio; quid est?

 

Ata.

 

In aede longam vidimus Amani crucem,

 

Quam Mardochaeo iusserat.

 

Ass.

 

Statim occidat,

 

Et quam pararat alteri necem luat.

 

Edissa viue, cur adhuc pallent genae?

 

Tumidumq́ue pectus degener metus occupat?

 

Nihil est timendum.

 

Ediss.

 

Magne Persarum parens,

 

Miserere gentis traditae, & Amani impia

[p. 150]

 

Meliore lege iussa reuocari iube.

 

Ass.

 

Reuoco. quid vltra est?

 

Ediss.

 

Patris vt frater, mei

 

Qui mihi parentis altor impleuit vices,

 

Habitare Mardochaeus occisi queat

 

AEdes Amani.

 

Ass.

 

Quidquid infelix Aman

 

Possedit olim, credat id totum tibi;

 

Et Mardochaeum supplici posthac genu

 

Regni secundum Persa veneretur caput.