Poëmata

[p. 175]

Nobilissimo amplissimoqve Domino Ioanni Kesseler
eqviti avrato, regiae Maiestatis Consiliario, & Aerarij Belgici Praefecto, &c.

INgeniosè olim, Vir Nobilissime, Poêtas hederâ coronauit antiquitas; nam vt illa nisi arbore fortè aut pariete sustẽtetur corruit, ita Poëtarum studia si à viris praeclaris non foueantur, penitus euanescunt. Ab eo enim tempore quo diua Moneta inter Deas relata est, nullius vnquam tam sublime fuit ingenium, tam beatus stylus, tam felix conditio, vt sine illustrium fauore in pretio fuerit: si exempla adferre luberet, omnis

[p. 176]

mihi aetas suggereret, sed tacebo. Vnum doleo, seculum hoc aliàs felicissimum tam raros Maecenates ferre, vt praeclarissima etiam ingenia à scribendo deterreantur. Candidè fateor, nunquam ego me Poêsi applicassem, nisi exercitij mei ratio postulasset; huic dum obsequor, patrocinium Tuum imploro, & meam, si quam meruerim, hederam fauore Tuo sustentari desidero. Facies spero & diu patriae mihiq́ue viues incolumis. Ita voueo, Bruxellis in nostro Collegio 14. Kal. Iun. 1623.

Amplissimae Dominat. Vestrae seruus & cliens

F. Iacobus Zeuecotius Aug.