Reinaerts historie (Reinaert II)

auteur: anoniem Reinaerts historie (Reinaert II)

bron: ‘Reinaerts historie, Reinaert II.’ In: Instituut voor Nederlandse Lexicologie (samenstelling en redactie), Cd-rom Middelnederlands. Sdu Uitgevers/Standaard Uitgeverij, Den Haag/Antwerpen 1998.

verantwoording

inhoudsopgave

doorzoek de hele tekst

downloads

DBNL vignet

i.s.m.


Reinaerts historie, 7001-7810 Want ic bin dair toe vercoren V oude verdiente van hier te voren Sel v nv recht in brengen Want god en wils niet langer hengen 7005 V quade boosheit v quaet regneren Jc sal v van als absolueren Het is uwer zielen groet Dat gi hier penitencie doet Weest verduldich in v sneuen 7010 Want gi en selt niet langer leuen V lijff dat staet aen mijn genaden Mer trouwen waerdi so beraden Dat ghi woud sueken aen my oetmoet Val verwonnen op mijn voet 7015 Jc woud v sparen al sidi quaet Want mijn consciencie my raet Dat ic nyement en dode gern Jsegrim waende van desen schern Onuroet te werden het deerde hem zeer 7020 Hy en conste spreken mijn noch meer
[fol. 108v]
So toornich was hi van herten Ende ooc so began hem zeer te smerten Die wonden die hem reynaert beet Want dair tbloet wt liep gereet 7025 Hi en docht om geen saken dair Dan hoe hi mocht wreken sijn swair MJt groten nyde hieff hi op den poot End gaff reynaert enen slach groot Op sijn hooft dat hi ter eerden vel 7030 Doe scoot die wolf herde snel Ende waende hem ter stont te vaen Reynaert was licht ende spranc op zaen Ende liep hem dapperliken toe Een fel strijdt began dair doe 7035 Die duerde dair lange tijt Jsegrim die had groot nijt Op reynaert alsoot wel sceen
[fol. 109r]
Wel tien spronck spranc hi na een Op hem end hadden gern geuaen 7040 Mer die huut was hem so glat ic waen Mittien dat hi was so wel besmeert Dat hem al ontquam reyneert Hi en mochts niet gripen sijn vel Ende oec was also snel 7045 Dat hi dicke al hien waende slaen Js hi hem tusschen die been ontgaen Onder sijn buuck ende sloop so door So liep hi dan weder voor Ende gaff hem enen aefschen hou 7050 Ende mitten stert sijns pissens dou Sloch hi en in sijn ogen dicken Dat ysegrim waende sticken Ende nochtan dat meeste let Doe hi myt pissen so was besmet 7055 Ghinc int slijc en sant staen scrauen En dede hem dat stoff int ogen drauen Op sijn vordel mitten wijnd Jsegrim leet grote pijn Hem docht dat hijt had alte quaet 7060 Doch sijn cracht ende sijn daet Was reynaert een groot last Ende mennigen onsachten tast Most hi van hem ontfaen Als hi en te pass cond begaen 7065 Want was sterc ende groot Mennigen beet slach ende stoot Gauen sy malcander dair si mochten Seer nauwe sy hem onder sochten Om malcander te verderuen 7070 Jc woud ic noch een weruen Al sulken camp mocht aensien
[fol. 109v]
Jc sagen lieuer mocht my gescien Dan van riden in een perck Die een was listich ende die ander sterc 7075 Deen vacht myt crachten dander mit liste rade Si pijnde zeer malcanders scade DJe beste van hem beiden en was niet goet Den wolf toornde in sinen moet Dat reynnaert so lange onstont 7080 En wair dat si so was gewont Jn sijn twe voeten voren Reynaert had den camp verloren Mer die waren noch so open Dat sy dair qualic of mocht lopen 7085 Ende reynaert mocht bet aen teyde off Die hem pis mul ende stoff Dicht altijt in sijn ogen swanck Ende maecte hem dat sien so cranck Dat hi duchte voor sijn ogen 7090 Ten lesten sprac hi ic wil pogen Een eynde te maken desen kijff Hoe lange sel dese loze katijff Voor my dueren ic bin so groot Jc souden billix vallen doot 7095 Al en dede ic dair toe niet el Jc bin groot scande weert wel Dat icken so lange spaer Men sel myt vingeren hair ende dair Na my wisen ende maken spot 7100 Jc heb noch dat quaetste lot Want ic bin so zeer gewont Dat ic bloede als een hont Ende dair toe warpt hi my so wol Jn mijn ogen stoff ende mol 7105 Ende door drenct my so myt pissen
[fol. 110r]
Dat ic mijns siens cort sel myssen Laet ic hem lange voor my dueren Jc wilt al setten ter auentueren En zien wat my geuallen mach 7110 Mittien sloech hi enen slach Op reynaerts hooft also groot Dat hi op die eerde scoot Ende eer hi wel op conde staen Heeft hi en in sijn poot geuaen 7115 Ende hielten onder hem leggen stil Als een dien doden wil Hi ginck hem persen ende duwen Doe began hem seer te gruwen Ende te droeuen al reynaerts magen 7120 Doe sy en so onder leggen sagen Mer ysegrims magen waren vroe Reynaert weerde hem ymmer toe Mit sinen clawen van onder op Ende gaff den wolf mennigen clop 7125 Want lach opwert mitten voeten Die wolf en dorsts niet wel gemoeten Dair op myt synen poten Mer mytten tanden heeft hi en gescoten Na hem als dien verbiten woud 7130 Doe reynaert sach dat wesen soud Ende hi vmmer sijn verbeten Heeft hi sijn vorste clawen gesmeten Bouen in ysegrims aengesicht Ende hael hem off wel gedichte 7135 Die huut tusschen die wijnbraewen zeer lichte Ende sijn een oge ghinc wt mede Dat hem herde we dede Hi huulde hi iancte van herten zeer Sijn vriend diet sagen haddens deer
[fol. 110v]
7140 Ende dreef iamerlic mysbaer Dat bloet liep hem al neder daer HY veechde sijn ogen wide Reynaert die dit sas was blide Hy worstelde so seer ende wranck 7145 Dat hi op sijn voeten spranck Die wijl dat hi sijn ogen vaechde Die wolf die dit niet wel en hehaechde Sloech na hem eer hi ontginck So dat hi en in sinen arm vinck 7150 Ende hielten vast oec hoe hi bloede Reynaert die was doe weder te moede Ende sette hem crachtelic ter weer Dair worstelde hi so lanck so zeer So dat ysegrim wies sijn toren 7155 Beide van nv ende van voren So dat hi alle smert vergat Ende werp reynaert onder hem plat Dair hem in mysuel zeer Want sijn een hant die hi ter weer 7160 Sette. dien scoot mitten val Jn ysegrims kynnebacken al Doe waende hi wel sijn hant verliesen Jsegrim sprac nv gaet kyesen Lijdt verwonnen tot deser noot 7165 Off ic sal di seker slaen doot Dijn stoff dijn piss scrauen ende scheren En mach di helpen noch weren Noch dijn treken du en conste ontgaen Du hebste my so veel mysdaen 7170 Scade ende scande hier te voren Ende nv heb mijn ooch verloren Ende bin dair toe so zeer gewont Doe reynaert hoorde dat so myt hem stont
[fol. 111r]
Verwonnen te liden of den doot slach 7175 Docht hi dat aen die koor lach Wel dusent merck na dat hem stoet Nv hi dat een of dat ander moet Seggen ende hi des heeft scade Wart hi des wel cort berade 7180 Lieue heer ende oom ic wil v man Ewelic sijn nv voort an Ende wesen heer van al mijn haue Ende gaen voor v ten heyligen graue Ende weruen v clooster wynnige daer 7185 Ende alle kercken voor en naer Die dair sijn int heylige lant Ende brengen v hier in v hant Voor v ende voor uwer ouder ziel Jc waent den coninc nye en geuiel 7190 Te bieden aldus sconen bot Gelijck den paeus onse eertsche got Willic ewelic dienen ende eren Ende hulde sekeren ende sweren V dienst knecht ewelic te wesen 7195 Ende alle mijn mage te brengen tot desen Dat si alle doen sellen gelijc So sel di wesen een heer van desen rijc Wie sel hem dorre steken tegen v dan Ende wat dat ic geuangen can 7200 Mit hoenre snyppen gansen patrisen Visch off vleisch off wat spisen Dat my geuallen mach te voren Dair sel di eerst off hebben die koren Ende v kijnder ende w wijff 7205 Eer sy my coomt in mijn lijff Dair toe sel ic tot ale tijt By v wesen waer gi zijt
[fol. 111v]
Ende so wel tot uwen liue zien Dat v niet en sel misschien 7210 Ghi sijt sterc ende ic heet loos Houden wi ons te samen altoos Die een myt doen dander myt raden Ons en sel nyement mogen scaden Ende wi sijn doch so na geboren 7215 Dat wi billix scade noch toren Deen den anderen niet doen en souden Jc had node strijt gehouden Tegen v had ics mogen ontgaen Mer gi spraect my te camp aen 7220 Doe most ic doen dat ic nood dede Doch heb ic hueschelic dair mede Geleden so ic tegen v vacht Jc en toende nye al al mijn cracht Op v als off gi my vreemde waert 7225 Want wat die neue den oom spaert Dats grote reden ende wel staen Lieue oom dus heb ic gedaen Had ic op v gedragen hat Ghi haddet veel te quaet gehat 7230 Mijn hert en mocht v doen geen quaet Jc en heb v oec niet gescaet Dat v deert in desen strijt Dan ongeual dat nv ter tijt Quam dat wt ghinc v een oge 7235 Och des ic groten rouwe doge Ende sulken iamer in mijn hert Jc woudic seluer had den smert Lieue oom ende ghijs te vreden waert Jc sel sueken nv ongespaert 7240 Dat icket scier sel doen genesen Ende so salt v groot vordel wesen
[fol. 112r]
Als gi wilt slapen off rusten an So en heb di mer een oge te luken dan Dair een ander moet luken twee 7245 Noch sel ic v doen vordel mee Want mijn wijff ende mijn kijnder Ende mage meer ende mijnder Sellen voor v knyelen door v eer Daert die coninc sit onser heer 7250 Ende alle die dair bi begeert Ende bidden v dat gi uwen neef reyneert By uwer genaden wilt laten leuen Ende oec sel ic my sculdich geuen Ende v scalc ende eygen te wesen altoos 7255 Ende ic menedich ende truweloes Tegen v geweest heb dicke Ende oec sel ic seggen wat sticke Dat ic hebbe van v geseit Anders dan duecht ende reckelicheit 7260 Dair heb ic valschelic aen gelogen Hoe soude enigen heer mogen Meer eren gescien dan ic v biede Men mocht my geuen grote myede Lieue oom dair ict om dade 7265 Nv neemt in danck ende warts te rade IC kenne ende lye dat gi wel sout Mi nv hier doden off gi wout Mer wat lage v hier an Ghi most v altijt hueden dan 7270 Voor min mage ende mijn geslachte Ende wat lage v aen die machte Dair om is hi wijs ende vroet Die in synen toornigen moet Hem niet en verhaest mer wel te versien 7275 Watter hem na off mach gescien
[fol. 112v]
Die wel versynt is in synen toren Dair is grote wijsheit in geboren Mennich dwaes van heten moede Verhaest hem dick in ouer spoede 7280 Dair hem coomt groot scand en scade Dan rout hem na so ist te spade Mer oom dair toe si di te wijs Ende het is beter eer ende prijs Gemack ende vrede en veel vrienden 7285 Dan men om v lachten dienden Ende oec so ist luttel eren dat Hem die verwonnen is ende mat Doot te slaen mer lachter groot Wair ic leue off ic bin doot 7290 Twaren dats een cleyn cost Ay dief hoe gern waerstu verlost Dat hoor ic wel aen dijn tael Du en gaefste my niet een eyer scael Waerstu van hier op dijn vri 7295 Al mochstu gelouen my Alle die werelt van goude root Jc en laet di niet wt deser noot Jc acht cleyn alle dijn magen Jc sel die veet wel dragen 7300 Al dattu hier hebste geseit Js niet dan geuensde loosheit Wat waenstu my aldus verleden Jc ken di langer dan van heden Jc en bin geen vogel myt caef te locken 7305 Och hoe soutstu myt my vocken Off ic di aldus liet ontgaen Had een ander dit verstaen Die niet en kende dijn dasen
[fol. 113r]
Du soutsten licht verdwasen 7310 Als hi hoorde v schoon loeyen Mer du verlieste hier al dijn floeyen Want ic versta te wel dijn tael ende logen Du hebste my so dic bedrogen Dat ic my wel huede voor dijn behoeue 7315 Segt quade onreyn loos boeue Du segest du heues my gespaert Jn desen camp sich herwaert Op my is mijn een oge niet wt Du hebste my mijn huut 7320 Doorwont meer dan tot .xx. steden Du en gaefste my niet so veel vreden Dat ic mijn adem mocht verhalen Jc soude alte zeer dwalen Dede ic di hier enige genade 7325 So mennich confuus ende scade Hebstu my altoos gedaen Nochtan dat my bouen al gaet staen Du hebste mijn wijff vrou eerswinde Die ic gelijc my seluen mynde 7330 Hebstu bedrogen ende ooc onneert So dat si blijft gescandelizeert Hoe soud ic dat vergeten mogen Wanneer my dat coomt voor ogen So vernywet my al mijn zeer 7335 Doe docht reynaert enen nauwen keer Die wile dat hi aldus tegen sprack Sijn ander hant hi onder stack Al beneden tusschen sijn been En grepen recht alst wel aenscheen 7340 Doe vast bi beid sijn hoeygen En duden so dat hi van noyen Wel lude moste briesschen ende hulen
[fol. 113v]
Doe tooch reynaert wt sijnre mulen Sijn hant die dair te voren in stack 7345 Doe had Jsegrim sulc ongemack Mit dat reynaert hem so ser tooch Dat hy bloet van pynen spoech Ende hem oec mede sijn groof orijn Achter ontgleet van groter pijn 7350 NOch deerde hem veel meer dan dit Want hem so seer sijn ogen pit Bloede dat hi al verdoefde Also hem tbloet liep wtten hoofde Hy storte neder in onmacht 7355 Reynaert scoot toe myt cracht Aen hem ende heeften gegrepen Biden kullen ende heeften gaen slepen Om dat krijt dair sijt alle sagen Ende gaff hem veel steeck ende slagen 7360 Des sijn vrienden droefden zeer Si gingen ten coninc onsen heer Screyende ende baden hem mennichfoud Dat hi den camp op nemen woud Het is my lieff die coninc seide 7365 Doe gingen die krijt wachters beide Die oss ende die lupaert Ten krijt ende spraken reynaert Onse heer die coninc wil v spreken Ende wil dit oorlooch te samen breken 7370 Tusschen ysegrim end v Ende desen camp opnemen nv Ende bidt dat ghijt op neemt fier Want waert dat uwer een bleef hier Dat wair scade aen elke side 7375 Ghi hebt die eer vanden cride Alle die beste bliuen bi v
[fol. 114r]
Reynaert sprac danck hebben sy nv Wat mijn heer my gebiet Dat en der ic laten niet 7380 Jc en gerss niet scoonre dan gewonnen Mijn mage comen hier geronnen Jc wils hem vragen dunct v goet Sy seiden ia reynaert dat doet Tis reden dat men den vrienden seit 7385 Grote saken dair macht aen leit Ende men des volget haren rade Mittien quam vrou sloppelcade Ende hair man grymbaert die dass Vrou rukenau die blide was 7390 Ende huer twee susteren quamen daer Bitelmuys vuylromp ende hair twe kijnder claer Harenet hair dochter die derde mede Die vledermuys ende twesel dair ter stede Dar quammer twijntich meer ic waen 7395 Dan off reynaert inden camp had gestaen Diet wel gaet crijcht eer en loff Mer diet mysualt dair vliecht men off Niement en is dair ghern by Die beuer ende die otter ende sy 7400 Panthegrote ende oordelgole Huer twe wiuen ende huer ostrole Ende die maerter ende die bvnsinck Die hermel die egel dat genetkijn Die muyshoorn ende dat eenkoren 7405 Ende al die ic noemde hier te voren Quamen dair ende veel meer nochtan Om dat hi den camp verwan Ja die sulc die grote claech eerst dreuen Op hem waren nv sijn naeste neuen 7410 En toonden hem nv die meeste gonst
[fol. 114v]
Ende noch is dit der werelt const Die wel vaert crijcht veel magen Die hem die weelde helpen dragen Mer wie noot heeft ofte liden 7415 Vijnt luttel mage tot allen tiden Sy scuwen den wech dair hi gaet Grote feest ende bli gelaet Dreuen sy myt trompen ende myt scaelmeiden Wel lieue neue dat sy seiden 7420 God danck dattet aldus is vergaen Wy waren in groten anxt beuaen Doe wi v onder leggen sagen Reynaert die dancte sijn magen Ende ontfencse myt groter vroude 7425 Doe vraechde hy off hy den coninc woude Den camp op geuen by horen rade Ja gi neeff sprac vrou slappelcaerde Ghi moges hem wel louen myt eren Doe gingen sy wtten krijt keren 7430 Mitten krijt wachters totten coninck Reynaert voor hem allen ghinck Wt genomen die menestreel Men trompter myt groten speel Ende reynaert knyelde voor hem neder 7435 Die coninc deden opstaen weder Ende sprac sijt blide reynaert Ghi hebt myt uwen dach myt eren bewaert Ende ic laet v quijt ende vry Ende geeft dit op ic hout aen my 7440 Tusschen v tween dit wil ic leggen Ende mijn goet duncken dair of seggen Bi rade van mynen edelen lieden Ende dan bi te ontbieden Teerst dat ysegrim is genesen
[fol. 115r]
7445 So lange moetet in vrede wesen HEer sprac reynaert my genuecht wel Mer ic vant hier mennich op my fel Doen ic hier aen v hoff eerst quam Die nye scade van my en nam 7450 Mer om dat hem luden docht Dat men best ouer my mocht So riepen si mede ouer mijn scade Also mijn vianden daden Ende om dat hem docht dat ysegrim 7455 Bet myt v was dan ic mocht sijn Anders wair om en wisten si niet Sy en dochten niet als die wise pliet Wat dair off mocht bliken Heer dese ende alle die hem geliken 7460 Slachten wel een groot hoop honden Die eens op eenre messen stonden Teens heren houe diese had onthouden Sy wachten als die gern souden Eten off men hem wat brochte 7465 Doe sagen sy comen al dat sy mochte Enen hont gelopen wtter koken Dair hi vleisch in had geroken Ende had een been dair vleisch aen claff Genomen eer ment hem gaeff 7470 Ende pijnde hem heen dair mede wech te comen Mer die cock had vernomen Ende beliepen eer hi ontquam Mit sieden water dat hi nam Wt enen ketel in een plateel 7475 Ende gaff hem dair mede sijn deel After op sijn lenden stiet So dat hijs hem en bedancte niet Want hi hem so door scoude sijn vel
[fol. 115v]
Dat hem sijn hair al wt vel 7480 Ende hem die zwaerd al door scoot Doch hi ontquam al wtter noot Ende behielt dat hi dair nam Ende hi biden honden quam Ende sy hem tvleisch brengen zagen 7485 Riepen sy dese can hem wel begiagen Hi heeft den koc wel te vriend Dair so veel vleisch aen claff Die hont sprac gi en weetter nie aff Ghi prijst my voor dair ghi tbeen ziet 7490 Mer noch en saechdi my after niet Siet my een eerst after opten steert En prijst my dan off ics bin weert NA doe sy hem achter besagen wel Hoe dat hem tvleisch ende vel 7495 Was doorsoden ende was al raeu Ende sijn hair wt geuallen caelu Gruwelde hem allen so voort scouden So dat si ter costen niet en wouden Sy en wouden oec sijns geselscaps niet 7500 Mer alle dese hoop doe van hem sciet Ende lieten hem varen als hi mochte Her coninc heer dus hebben noch tgerochte Die lose ghier als sy sijn heren Ende sy crigen hair begeren 7505 So warden si machtich ende ontsien Sy slachten desen si scattense mittien Recht als een verhongert hont Dese dragen tbeen in haren mont Niement en der tegen hem kyuen 7510 Men prijst hem al dat si bedriuen Elc seit hem dat sy gern horen Op dat hi blijft ongescoren
[fol. 116r]
Ende die sulc om dat sy lecken Mede vanden hase ende helpense decken 7515 Ende onsculdigen hoor bose dade Aldus stercken sise int quade Och heer die geen die des plien Hoe luttel si after ten stert waert sien Dats na teynde alst gode verdriet 7520 Ende die auentuer langer niet Hoor regnaci en wil gedogen So vallen sy neder vanden hogen Jn groter scande ende in scaden So warden openbaer hair daden 7525 Nyement hoors lidens dan verdriet Men vloecse machmen hen anders niet Sulc wart bescoren en so bschout Dat hi noch goet noch eer en hout Het haer valt hem wt aen beiden ziden 7530 Dat sijn hair vrienden die hem ontgliden Die hair boosheit verhuut hebben mede By dage by nachte tot alle stede Ende hebbense onsculdicht ende bedect Mer nv myt screyen ellic van hem trect 7535 Als sy hair ondaet moeten becopen Recht als die hond gingen lopen Vanden hont die dair was versoden Also laten sise inden noden LJeue heer dit exempel sel di 7540 By uwer genaden onthouden van my Ten sel uwer wijsheit niet scaden Wat waendi hoe mennigen scalcken quaden Vijnt men noch arger dan een hont Diet tzuge been dragen in horen mont 7545 Jn heren houe ende in stede Die myt onrecht die vrihede
[fol. 116v]
Ende gemeen recht vercopen Ende ouergeuen om dat sy hopen Dair off te hebben hair genot 7550 Alle moetse scenden got, Die des plegen wie sy sijn Mer my noch die geslachte mijn God danck en selmens niet verwiten Dair off wil ic ons wel off quiten 7555 Ende des comen in die lucht Jc en heb voor nyement ducht Reynaert die sel reynaert bliuen Dat en sel hem nyement connen of vriuen Al haddent al sijn viant gesuoren 7560 Her coninc mijn hert heeft v vercoren Jn ganser mynnen bouen allen heren Ende nye en woud ic van v keren Al is v anders doen te verstaen Jc heb altoos v best gedaen 7565 Ende voort meer doen dair ic kan Reynaert gi zijt mijn homan Van my beleent als edel baroen Dair om si dijt sculdich te doen Oec wil ic dat gi vroe ende spade 7570 Coomt tot mynen secreten rade Jc set v weder in al v macht Siet dat gi v voor misdoen wacht Helpt alle saken ten besten keren Dat hoff en mach v niet ontberen 7575 Als gi v wijsheit set ter duecht So en is dair nyement die v verhoocht Van scerpen raed van nauwen vond Jc sel dair dencken lange stond Om dat exempel dat gi my seit 7580 Siet dat gi alle rechtueerdicheit
[fol. 117r]
Hantiert ende my getruwe sijt Jc wil voort meer tot allre tijt Altoos wercken bi uwen rade Hy en leeft niet die v mysdade 7585 Jc en sout scerpelic ouer hem wreken Op dat gi laet v quade treken Ghi selt ouer al mijn tael houden Ende in mijn lant van als gewouden Als mijn souereyn baelyoen 7590 Dese offici geef ic v te doen Ghi moechse myt groter eren ontfaen Alle reynaerts magen die by hem staen Dancten den coninc hier off zeer Die coninc sprac ic soud veel meer 7595 Doen doer v allen dan gi waent Jc bid v dat ghijt hem vermaent Dat hi my vmmer sy getrouwe Seker sprac rukenau die vrouwe Dat sal weser zijt niet in vaer 7600 Ende waert oec dattet anders waer So en wair hi niet van onss geslacht Jc en wouden oec krencken mitter macht Ende ewelic sijns missaken Reynaert danctse myt huesscher spraken 7605 Den coninck hier off ende knyelde voor hem Lieue heer sprac hi ic en ben Der eren niet weer die gi my doet Jc sel dair om dencken bin ic vroet Ende v getrou sijn al mijn leuen 7610 Ende altoos sulcken raet v geuen Alsoot betaemt uwer eren Hier mede dede hi sijn keren Mit sinen magen vanden coninck Hoort hoet myt ysegrim verginck
[fol. 117v]
7615 Brwn tybert ende vrou eerswind Sijn kijnder sijn mage ende haer gesind Haelden wten krijt mit erren ende clagen Ende hebben op een lettier gedragen Van hoy dair in hi warm was ende lach 7620 Sijn wonden die men sach Diemen dair vant wel vijftien Dair quamen mesters van surgien Diese verbonden wiecten Hi was so cranc van ziecten 7625 Dat hi dat vuelen had verloren Mer si wreuen hem myt cruut die oren So dat hi vander onmacht onscoot Ende gaff enen creet so groot Dat al verscoot dat by hem was dair 7630 Ende waenden dat hi verwoet was claer Eer die meysters hem gauen dranck Die hem dat hert dat zeer was cranck Stercten ende hem dat rusten dede Sy troosten sijn vrienden oec mede 7635 Sy seiden hem en soude niet letten Doe sceide dat hoff ellic ginck hem setten Thuus te keren daen hi was comen Ende reynaert heeft oec oorloff genomen Aenden coninck ende synen wiue 7640 Die hem baede dat hi niet en bliue Lange hi coom weder by hem Hy sprac vrou ende heer ic ben Tot uwen gebode altoos bereit Gebraeck v yet dat wair my leit 7645 Van dat ic mocht volbringen Mit lijff myt goed myt allen dingen End dair toe al die vrienden min Die sellen v onderdanich sijn
[fol. 118r]
Tot allen tiden wes gi begeert 7650 Wi hebben v lief gi sijts weel weert God geef lange lijff myt eren Jc wil tot mynen wiue keren End tot mynen kijnderen of gijs ghebiet Ende aldus hi vanden coninc schiet 7655 Mit scoenre tael myt groter gonst Die reynaert noch al wel cost Sijn wel ende liefgetal Jst geestelic off weerlic staet Aen reynaert slwt men alden raet 7660 Sy crupen al in reynaerts hol Aen sijn baen is al die sol Die stem die hem doe was gegeuen Die is hem ye synt gebleuen Hy heeft gelaten een groot geslacht 7665 Die altoos risen ende wassen in macht Wie reynaert kunsten niet en pliet Die en dooch nv ter werelt niet Jn maet off staet van machten geset Mer kan hi crupen in sijn net 7670 Off heeft geweest sijn scolier So moet hi wonen wel hyer So weet hi wel wat dair toe hoort So rijst hi ende men trect hem voort Van reynaert is een groot zaet 7675 Gebleuen dat dair nv zeer op gaet Want men vijnt nv meer reynaerd Al en hebben sy geen rode baerd Dan men ye dede hier te voren Gerechticheit blijft al verloren 7680 Trou ende wairheit sijn verdreuen Ende dair voor is ons gebleuen Ghiericheit loosheit hat ende nijt
[fol. 118v]
Dese hebbent al in hoor beurijt Sy ende hair coninghinne houerdy 7685 Regneren nv op eerden vri Al ist int paeus oft keysers hoff Elck pijnt den anderen te steken off Van sijnre eren ende stemmen Ende selue myt vordel clymmen 7690 Mit symonien ofte myt gewelt Men kent te houe niet dan gelt Tgelt isser meer gemynt dan got Ende men doet meer door sijn gebot Want wie gelt brenct is wel wel ontfaen 7695 Ende sijn begeren sel voort gaen Jst aen heren oft aen vrouwen Tgelt doet altijt veel ontrouwen Ende vrouwen scande beiagen Ende mennich valsch getuuch gedragen 7700 Oncuuscheit loosheit ende leckernye Js nv alt spul onder die clergye. Jst paeus keyser al van romen Sijn al in reynaerts oord gecomen Elc meent hem seluen in allen saken 7705 Jc en weet wat eynd hier of sel naken Elc mensch macht wel besorgen God diet al is onuerborgen Moettet op dat beste voegen Hier mede laet ic my genoegen 7710 Wat woudic veel die werelt berechten Van saken die my self aen vechten Dair ic ondanc toe off crege So waert beter dat ic swege Dair om wil icket mede liden 7715 Elc doet wel in synen tiden Dat is best sijns selfs profijt
[fol. 119r]
Want na desen tijt coomt genen tijt Dat men orbair dair off scaffen mach Ende elc moet sijns selfs dach 7720 Verwaren ende sijn woorde dragen Reynaerts vrienden ende sijn magen Namen oec oorloff aenden coninck Ende gingen myt haren neuelinck Meer dan veertich tot eenre sommen 7725 Reynaert was blide alhier omme Dat hem so breet was sijn steert Ende hem die coninc had so weert Dat hi en vercoos tot synen rade Hy docht hier in en stect geen scade 7730 Jc mach nv mitter macht mijns heren Mijn vrienden helpen mijn viande deren Ende mijns willen veel bedriuen Ende des al onbegrepen bliuen Op dat ic selue wil wesen vroet 7735 Jc prijss den coninc bouen alle goet REynaert en sijn mage te samen Gingen so lange dat sy quamen Tot sijn borch tot maperthuus Dair namen sy oorloff voor sijn huus 7740 Mit bliden aenschijn myt talen goet Reynaert viel hem allen te voet Ende dancten hem allen vriendelic zeer Der groter gvnst der groter eer Die sy hem gedaen hadden in sijnre noot 7745 Synen dienst hi elcken boot Mit lijff myt goede off sijs begeerden Hier mede brocht hise aen veerden Ende schiet van hem ellic ghinc te synen Reynaert ginc tot vrou ermelynen 7750 Dien wel blidelic ontfenck
[fol. 119v]
Dair hi hair vertooch alle dinck Dat hem te houe was gesciet Een woort en liet hi achter niet Hier off was ermelyne vro 7755 Ende sijn kijnder oec also Dat hair vader dus was verheuen Jn groter bliscap dat sy bleuen Reynaert sijn wijff en sijn kynder Wie v van reynaert meer of mynder 7760 Anders dan gi hebt gehoort Dat sijn al gevensde woort Mer dat gi hebt gelesen hier bouen Van hem dat moech di wel gelouen Dies niet en gelooft ist wijf oft man 7765 En is niet ongelouich nochtan Doch tsijn veel lude diet hadden gesien Hem soude te myn twiuelen aen dien Het sijn veel dingen gesciet Die men gelooft al ziet mense niet 7770 Mit syne figuren ende bispeel Die geuonden ende gesciet veel Die nye en waren noch en gescieden Mer om exempel anderen lieden Te geuen dat sy dair bi mochten leren 7775 Duecht te doen ende quaet te keren Licht also macht hier off wesen So wiet wel verstaet int lesen Al ist zom boert men vijnter yn Wise leren ende goeden syn 7780 Dat hem licht wel baten mocht Dair en is nyement goedes in bedocht Het is int gemeen gebrocht voort Ellic treck hem aen dat hem toe hoort Js dair oec yet in mysset
[fol. 120r]
7785 Diet beteren can die maket bet Jc weets hem danck wie in sijn maken Sijn best doet en is niet te laken Mer wie alle dinck wil berichten Wie soud hem yet willen dichten 7790 Doch wie dit gedicht laet so hijt vijnt En mysdoet tegens my niet twijnt Hier neemt eynde reynaerts hystorie God geef ons allen die hemelsche glorie Nv Jnt gemeyn. vijnt men certeyn 7795 Die reynaerts ze. nv volgen me Al sonder saeck. Jc geef die wraeck Hoe dattet ga. den heer hier na Die coninck fijn. die alle pijn Sel rechten dra. by synen ra 7800 Dees reynaerts nv. dien sijn niet rv Als reynaert is. mer zijt des wis Het sijn al re. wi menschen le Als ic versta. die wtten pa Gedwaelt sijn snel. god brengse wel 7805 Tsy cort off lanc. Jn themels sanc nota Elc merck en zueck in synen syn Dubbelt vijnt men sijn naem dair Jn Diet boec screef int voorgedicht Suecten wel ghi vijntten licht

Reinaerts historie (Reinaert II)

Reinaerts historie (Reinaert II)

Reinaerts historie, 7001-7810