Reis van Jan van Mandeville


auteur: anoniem Reis van Jan van Mandeville


editeur: N.A. Cramer


bron: ‘Reis van Jan van Mandeville’ In: Instituut voor Nederlandse Lexicologie (samenstelling en redactie), Cd-rom Middelnederlands. Sdu Uitgevers/Standaard Uitgeverij, Den Haag/Antwerpen 1998.  


verantwoording

inhoudsopgave

doorzoek de hele tekst


downloads

© 2001 dbnl  


DBNL vignet

Van jerico ende ander dinc.

Daer woonde maria cleophe die moye ons heren. Dit casteel is in eenre milen na jherusalem. Ende int weder comen vanden berghe daer es die stede, daer onse here weende op die stat van jherusalem. Ende daer bi openbaerde onse vrouwe sinte thomase na haerre opuaert ende gaf hem haer gordel. Ende daer bi

[fol. 49ra]

es die stene daer onse here dicwille op sat ende predicte ende daer sal hi noch selue comen ten joncsten daghe alsoe hi selue seit. Jtem na den berch van oliueten es die berch van galileen, daer die apostelen vergadert waren, doe maria magdalena hem boodscapte die opuerstandenisse ons heren. Ende ten middeweghen van desen tween berghen so staet een scoen kerke, daer die ynghel bootscapte onser vrouwen haer doot. Jtem van bethanien tote jherico sijn vj milen. Jherico plach te sine een scoon stat, mar si heeft al ghedestrueert gheweest, zo dat mer een cleyne dorp en is. Dese stat wan josue mit miraculen van gode biden beuelen des ynghels gods ende testoredse ende vermalendiedse ende alle die ghene diese emmermeer maken zouden. Van deser stat was zacheus, die een

[fol. 49rb]

naen was, die op enen boem clam, die sycomor hiet om onsen here te ziene, want hi was cleyne, so dat hijt niet ghesien en conste om der ander liede wille. Van deser stat ontquam alleen raab, die ene ghemene wijf ende sondersse was openbaer ende die ghene van haren gheslachten, want si hadden gheholen ende gheborghen die messelgiere ende die bode van jsrahel ende hadse bewacht ende behoedt vanden vresen der doot; daer om hadde sijs goeden loon alst recht was, ghelijc als die scriftuere seit: Quia accepit prophetam in nomine meo mercedem prophete accipiet, dats te segghene: die enen prophete ontfaet in minen name, hi sal ontfaen den loon van enen prophete. Ende also hadsi,

[fol. 49va]

want si propheteerde desen bode van jsrahel, segghende: Noui quod dominus tradet vobis tarram hanc, dats te segghene: jc kenne ende weet dat die here v sal dit lant gheuen. Ende also gheuielt ooc ende daer na namse salomon naasons zoon te wine ende wart een goet wijf, die gode wel diende.