|
|
|
| |
Hoe jan van mandauille veel wonders achter laet te scriuen,
om dattet boec te groet soude syn.
Aldaer ende | | | | in dien lande van ouerzee syn
veel ander landen ende ander wonderlicheden, die jc alle niet ghesien en hebbe,
daer om en soudicker niet of connen ghespreken. Ende ooc in dien lande, daer jc
selue gheweest hebbe, hebbic vele wonders ghesien, dies jc al hier niet en
scriue, want dit boec soude te groot hebbe gheworden. Ende waert ooc dat jc
alle bediede ende vertoghe al dat int lant van daer is, een ander die den
lichame pijnde om daer te gane ende omme ghinghe dese verre lande, hi en soude
niet niewes connen ghesegghen int wederkeren, of ict nv al bediede, daer die
liede solaes in namen. Ende men seit dicke, dat nuwe dinghen bachelijc sijn, | | | | daer om so willic mi hier mede laten ghenoeghen zonder
enighe ander dinghen te segghen, die in dit lant sijn, op dat ander liede die
daer gaen ghenoech moghen vinden te segghen ander dinghe, die jc hier niet en
scriue, die daer mach gheweest hebben. Ende daer om latet v ghenoeghen nv ter
tijt.
Op wat tiden jan van mandauille wt engelant toech ende
anders.
Ende jc jan mandeuile voorseit, die wt onsen lande sciet van
ynghelant varende ouer zee int jaer ons heren .m.iijc ende xxij
hebbe sint menich lant omme ghegaen ende hebbe gheweest in menighe goeden
gheselscape ende hebbe ghesien menich scoon | | | | feyt, hoe
dat jc selue noyt scoen feit en dede noch ander doghet, daer men of spreken
mochte, mer nv ben jc comen in rusten ieghens minen danc mids tfledersijn ende
articule, die my verworghen ende jc ben nemende solaes in mijn keytiuighe
rustinghe, pensende om den tijt die leden is, soe hebbic dit boec ghescreuen
ende daer in gheset dat jc ghesien hebbe, na dien dat my ghedencken mach jnt
jaer ons heren m.iij.c lvij jnt viue ende dertichste jaer, dat jc
van onsen landen schiet, so dat jc bidde alle den ghenen, die dit boeck lesen
sullen, dat si gode voor mi bidden op dat si willen. | | | |
Ende jc sel voor hem bidden ende alle die ghene, die enen pater noster voor my
segghen sellen, dat my god wille gheuen verlatinghe van al minen sonden, die
willic deelachtich maken mit my van allen goeden pelegrimagyen ende van alden
goede, dat ic ye ghedede ende dat jc noch doen sal tote mijnre doot. Ende jc
bidde gode, van wien alle goet comt ende alle gracie, dat hi wille mit sijnre
gracien veruullen alle die ghene, die dit boec sullen lesen of horen lesen,
ende behouden haere ziele ende haer lijf in die glorie van sijnre louinghen,
die drieuoudich is ende een sonder beghinsel ende sonder eynde, sonder
ghelijcheyt goet ende sonder mate groot, die in allen | | | |
steden jeghenwoordich is ende alle dinc onthoudende, welken en gheen goet en
mach beteren noch gheen quaet mach argheren, die in volcomenre drieuoudicheyt
leeft ende regneert inder ewicheyt ende in allen tyden. Amen.
|
|
|
vorige
