Van Brabant die excellente cronike

¶ Dat .liij capitel Vanden oore hertogen Philips van Bourgondien Ende sonderlinge van Anthonis sijnen middelsten sone die ruwaert van Brabant wert, Ende van vrou Jannen van Brabant condicien. ende hoe si afliuich wert

DJe goede hertoge Philips van bourgondien diemen heet Philippe le hardy, dat is coen, welcken name le hardy eerstewerf hadt dye derde coninc Philips van vrancrijke sinte Lodewijcx sone die was derde oude vader van desen Philips van Bourgondien Hi aenmercte hoe dat vrou Marie van brabant sonder oor gestoruen was ende dat vrou Janne van brabant die outste suster so out was datse geen oor crigen en mochte, ende so moste Brabant ende limborch comen op die oorije vander middelster susteren vrou Margriete ende die graue Lodewijc van vlaenderen ghetrout had, daer hi aen wan een enige dochter die ooc Margriet was geheeten, die eenen eedelen hertoge van bourgondien te huwelic gegeuen was die sterf sonder oor van haer te laten Ende so viel Bourgondien op die croone van Vrancrijcke Ende die vijfte coninc Karel diemen heet die wijse, die seer beminde sijnen alre ioncsten broeder Philippus voorscreuen waer om dat hi hem hielp aen dese weduwe van bourgondien Margriete graue Lodewijcx van Vlaenderen dochter, ende hi gaf hem wt gonsten te huwelic dat hertochdom van Bourgondien ende veel ander goeden leggende int graefscap van borgondien, ende daer toe Rysele, duway ende orchyes Die goede coninc Jan van vrancrike was dese Philips vader, ende zijn moeder was des coninc Jans van Behem dochter Aldus was hertoge wencelijn sijn recht oom ende vrou Janne die was rechte moeye van sijns huysvrouwen Dese hertoghe Philips wan aen sijn huysurouwe .vi. kinderen, te weten drie sonen. Jan, Anthonis ende Philips. Ende drie dochteren. Die een had te manne hertoge Ludolphus ende sterf sonder oor Dander dochter had te manne hertoge willem van Beyeren, graue van henegouwe, hollant ende zeelant, ende si had van hem een dochter die Jacoba heet, die namaels troude hertoge Jan van brabant Die derde dochter had te manne den graue Amedeus van Sauoyen die hertoge wert, die welc hem ten lesten begaf tot geesteliken leuen so dat hi vanden consilie te Basel paus ghecoren wert, ende heet Felix die .vij.

¶ Jan die outste sone van hertoge philips troude hertoghe Aelbrechts van Beyeren dochter die Palensgraue ende graue van henegouwe hollant ende zeelant was ende si was des voorscreuen hertoge willems suster. aldus hadden si deen des anders suster Anthonis de middelste so

[fol. 154v]

ne hadt te wiue des voorscreuen walrauens van sintpol eygen dochter, daer hi mede had na svaders doot die graefscapen van Sintpol ende van Liues ende meer ander sloten ende heerlicheden. Philips die ioncste sone had te wijue des grauen van Eu dochter, dair hi aen wan .ij. sonen, philippus graue van Nyuers ende van Rethel, ende Jan graue van Stampes, die na philippus sijn broeders doot graue van Nyuers ende van rethel wert Ooc creech hi na bi versterfnisse tgraefscap van Eu. Dese Jan had een dochter van sijnen eersten wiue die troude hertoge Jan van Cleue

¶ Als hertoge Philips dan al sijn kinder aldus ter eeren gestelt had, so heeft hi met vrou Margriete sijnder vrouwen bescheyden sinen drie sonen haer landen die si na sijn doot besitten souden So dat Jan sinen outsten sone toe geschict was te sijn hertoge van Bourgondien ende graue van Vlaenderen, van Artoys ende van bourgondien. Ende Anthonis de middelste sone soude sijn na vrou Jannen doot hertoge van lothrike, brabant ende Limborch, ende marcgraue des heylichs rijcx Ende Philips de ioncste sone soude sijn graue van Nyuers ende rethel Dit was dus altemael gedaen bi consente vanden coninc van Vrancrijcke ende van vrou Janne Oock geloofden die .iij. sonen die scheydinghe te houden met vorwaerden oft enich van hem drien storue sonder manlic oor van sinen liue so souden sijn landen comen opten anderen outsten broeder oft op sijns mans oor

¶ Mer want dit niet geschiet en was bi consente des lants van Brabant, ende want hertoge philips beduchte dat Anthonis sijn sone na vrou Jannen doot enige stoot hier in gemaect mocht werden, sonderlinge ouermits sekere beloften die hertoge wencelijn ende vrou Janne te Tricht in node gedaen hadden den .iiij keiser Kaerle hertoge wencelijns broeder, daer hier af voorscreuen is. So quam hertoge Philips tot vrou Janne in Brabant te bruessel Ende tot sijnre begheerten dede si vergaderen die drie staten vanden lande, den welcken si alle beyde baden datse hertoge Philips vrouwe ende haer kinderen bekennen wilden voor die naeste oor van Brabant van Limborch na vrou Jannen doot. Daer op de drie staten antwoorden datse genen anderen heere noch vrouwe en kende dan vrou Janne so lange als si leefde. Ende na haer doot so soude hem tlant quiten inden genen die sculdich waer hair here te sijn. Ende anders geen antwoorde en consten hertoge Philips oft wou Janne crigen vanden drie staten Nochtans boot hertoge Philips den lande van brabant ouer te gheuen Antwerpen ende Mechelen om eewelic aen Brabant te blijuen Voort boot hi hem tlant van Dermonde in handen te stellen ter tijt toe dat hi Graue metten lande van Cuyck op sijnen cost weder ghecregen ende aen brabant geknocht had. Maer op die tijt en conste hi anders gheen antwoorde crigen ende so track hi weder in Vrancrijcke

¶ Dit vernam coninc wencelijn van Behem die wt crachte vanden voorscreuen geloften keyser kaerlen sinen vader ghedaen pretendeerde recht in Brabant te hebben ende sant sinen ambassaet tot Louen opdoende den drie staten dat inhout van den brieuen vander voorseyder geloften, versueckende also dat si coninc wen

[fol. 155r]

celijn bekennen wilden voor haren rechten heere na vrou Jannen doot. Dair op die drie staten antwoorden ghelijc si hertoge Philips ghedaen hadden ende also voorseyt is ende anders niet. Daer na dede hertoge Philips toespreken in theymelic enige baenreheren van Brabant om tot sijnre meyninghen te comen, so dat hi goeden troost vercreech ende quam weder in Brabant tot vrou Janne in die stadt van Bruessele die die drie staten dede vergaderen Ende hi verwerf so vele datse Anthonis sinen sone geloofden tontfangen voor eenen ruwaert van brabant so lange als vrou Janne leuen soude Ende mits desen gaf hertoge Philips ouer die stadt van Antwerpen Anthonis sinen soone om onghescheyden altijt aen brabant te bliuene Mer Mechelen, Graue ende tlant van Cuyc en creech dat lant niet dat si hadden mogen crijgen hadden si te tide connen spreken Mer tis der Brabanteren manier datse haren raet dicwil te lange vertrecken ende datse na raet houden. ¶ Als hertoge philips was te bruessel so creech hi een siecte in sijn leden ende hy nam orloff aen vrou Janne ende trac also na Vrancrijcke op een orsbaer Mer onder wegenals hi te Halle was inden hert ghelogeert so verswaerde hem die siecte so seer dat hi corts daer na sterff int iaer ons heren .M.CCCC. ende .iiij. opten .xxij. dach van April. Ende sijn dode lichaem wert geuoert tot Digioen in bourgondien,god ontferme sijn siele Amen.

¶ Corts daer na quam Anthonis van Bourgondien in brabant ende wert ontfaen ouer ruwaert opten .v. dach van Junio int selue iaer. Ende in sijn eerste iaer dede hi den here van Assche amman van Bruessel vangen ende deden leggen tot Genapyen int slot, om des wil dat hi bi bedwange der stadt van Bruessele ouer eenen ban gestaen hadde tegen tgebot vanden ruwaert Twelc de wet houderen vernemende vingen si meester Symon van fremellis die raet vanden ruwaert was, den welcken si niet ontslaen en wilden voor dat die ruwaert den Amman ontsloeghe Als si beyde dan wter vangenissen waren so toonde hem die ruwaert seer toornich op die stadt van bruessel ende hi dede die borch van Vyluorden sterck maken om dye stadt van bruessel te berijden ende te quellen Mer twert ghedadingt dat die scepenen ende raet vander stadt tegen den ruwaert met processien quamen tot aent siechuys tusschen Bruessele ende scharenbeke ende op haer knien vallende baden si hem ootmoedelic genade, ende gauen hem daer toe .viiij.M. penningen van goude

¶ Daer na int iaer .M.cccc. ende .v. opten xxviij. dach in merte sterf vrou margriet Anthonis van Bourgondien moeder

¶ Daer na int iaer .M.cccc.vi. opten vi. dach Juniij, so wert gemaect een verbont van vrientscapen tusschen Anthonis den ruwaert ende de stadt van Aken met veel vorwaerden die daer gemaect waren Ende dievan Aken schoncken hem .iiij dusent gulden

¶ Jnt iaer .M.cccc. ende .vi. opten eersten dach van December sterf dedel vrou Janne van Brabant die seer wert beweent van veel lieden wantse seer bemint was vanden volcke. Ende si wert eerlic begrauen tot onser vrouwen bruederen te bruessel inden choor na datse .li. iaer hertoginne geweest had Ende in haren tijt so was si seer ontsien, wantse arme ende rij-

[fol. 155v]

ke dede goet recht doen. sonderlinge liet si scarp recht doen ouer die gheen die vrouwen violeerden oft ontscaecteden Seer was si ooc ontsien vanden baenroetsen ende edelen vanden lande want si nyemant en spaerde als si tegen haer misdeden Alle princen ende heren hadden haer in groter werdicheit als oft hair moeder geweest had Sonderlinge was si een moeder van iongen heren die si in hair hof tot duechden ophielt ende leerde die stellende ter eeren Als die ionge here van Bourbon, van Cleue, van Namen, van Heynsberge ende des grauen sone van Seyn Ende veel huweliken maecte si van princen . als tusschen den sesten coninc Kaerle van vrancrike, ende hertoge Steuens dochter van Beyeren daer si ter bruloft was tot Amiens. Ooc makede si thuwelic tusschen hertoge Jan van Bourgondien ende hertoge Aelbrecht van Beyerens dochter die palensgraue was ende graue van Henegouwe, hollant ende zeelant Desgelijcx ooc tusschen hertoge Willem des selfs Aelbrechts sone ende Margriete hertoge Jans van Bourgondien suster, daer si ter bruloft was te Camerijck, daer haer van alle den heeren grote eere gedaen wert Ende tot allen anderen plaetsen eerdense die heren diese hielden voor die edelste vrouwe van kerstenheit. Si was seer milde van gauen ende iuwelen te geuen den princen ende edelen personen die van buten slants tot haer quamen Desghelijcx so wert si dicwils costelijc begaeft van coningen ende princen die haer iaerlijcx giften sonden ende si hem weder. Met gode moetsi leuen. Amen.