Het Antwerps liedboek. Deel 1. Teksteditie

[p. 418]

187 Een nyeu liedeken

[Commentaar]

1
Hoort toe al int ghemeyn,
Een lyet met droevichede,
Hoe dat ons Keysers huysvrouwe reyn
Ter werelt es overgheleden.
Sy was seer goet den armen
Ende huer ghemeente int ghetal,
Laet ons God bidden overal,
Dat God die siele wil ontfermen.

2
Die arme menschen, breet ende wijt,
Die moghen wel druck oorboren,
Want si hebben als nu ter tijt
Seer veel aen haer verloren,
Ende al die ghemeente mede.
Dat mocht men wel mercken, sijt dies wel vroet,
Hoe si haer schamel ghemeente bijstont
In Spaengien, dit is waerhede.

3
Nu suldi horen haer beclach,
God wil die siele gheleyden.
Op die meydach, hoort mijn ghewach,
So is si van der werelt ghescheyden.
Coninck Philips, haren sone ghepresen,
Die was daer altijs in present
Als si ontfinck dat heylighe Sacrament,
Ende hi moeste altijt bi haer wesen.

4
‘Adieu coninck Philips, mijn sone goet,
Want ic moet henenvaren,
Ende alle mijn kinderkens, met der spoet,
God wil u in duechden sparen.
Adieu coninck van Portugale verheven,
Adieu coninck broeder Dom Fernant,
Ic moet gaen trecken in een ander landt,
Christus wil mijn bewaerder wesen.

[p. 419]

 

5

 

Adieu Karolus, Keyser uutvercoren,

 

God wil u bewaren ende Sint Andries,

 

En Helenora, mijn suster hooge geboren,

 

Vrou Marie, God wil u behoeden voor meerder verlies.

 

Ic moet de werelt begeven,

 

Dus oorlof, ghi heeren onghespaert,

 

Die hier ten hove sijn vergaert,

 

Wilt toch eendrachtelijck leven.’

 

 

 

6

 

Si riepen al: ‘Zijt vroom in strijt!’

 

Na den hemel sloech si haer ooghen,

 

Sy sprack: ‘O Jhesus ghebenedijt,

 

Wilt mi U ghenade toghen.’

 

Die doot quam huer bestoten.

 

Si sprac: ‘O Heere God, onbevreest

 

In Uwen handen beveel ick mijnen gheest.’

 

Dus heeft si huer ooghen gheloken.

 

 

 

7

 

Al die daer hebben bi ghestaen,

 

Die groot metten cleenen,

 

Si weenden daer so menighen traen

 

Met droevegher herten ghemeene.

 

In die stadt van Tollete, met groten rouwe,

 

Daer is si van der werelt ghescheen.

 

God wil die edel siele gheleen

 

Van onsen genadigen Keysers vrouwe.