Het Antwerps liedboek. Deel 1. Teksteditie

[p. 472]

211 Een nyeu liedeken

[Commentaar]

1
Doe men schreef mv hondert
Ende eenenveertich jaer,
Doen is den hertooch van Gulic
Tot den coninc van Vrancrijc getogen
Ende heeft met hem een contract gemaect,
Des Keysers vaderslanden
Tot groote schaden ghebracht.

2
Dat contract hebben wi vernomen,
Dat is worden openbaer.
Ongestraft en salt niet blijven,
Dat segghe ick u voorwaer.
Merten van Rossem hebben si in Brabant gesant,
Dies en wils hem die hertoch niet nemen an;
Hy wil hem keeren daervan.

3
Wil hem die hertoch dit niet aentrecken,
Waerom heeft hijt dan gedaen?
Daerom willen wijt den Keyser clagen,
Hi heeft so menigen stouten man!
Op den Keyser willen wi dragen vrien moet:
Hi wil de Gulickers straffen
Aen lijf ende oock aen goet.

4
Die hertoch van Gulick
Is een jonger man,
Dat hi hem tsegen den Keyser wil leggen an:
Daerom wil hi noch groote schade haen,
Dat voege Onse Here God.
Die Gulicsche hebben metten vromen Keyser
Gheschimpt en gespot.

5
Wel op, ghi Gulicker boeren,
Waerna staet uwen moet?
U schimpen en u spotten
En coemt niet al te goet.
Hout eenen hueschen mont ende een reyne hant,
So muechdy vrijlic wandelen
Al door des Keysers lant.

[p. 473]

 

6

 

O ghi raet van Gulic,

 

Hebdijs nu niet wel gemaect,

 

Dat ghi uwen heere in ongenaden

 

Des Keysers hebt gebracht?

 

Dat en werd u toch nymmermeer goet.

 

Ghenade moest hi begheren

 

Ende vallen den Keyser te voet.

 

 

 

7

 

Dat hi genade begeret,

 

Dat en is u geen scand;

 

Des is allen menschen condich

 

Dat ghi gesondicht hebt

 

Tsegen God en dat Roomsche Rijc.

 

Waer mocht men oyt ghevinden

 

Der Gulicker hoomoet ghelijck?

 

 

 

8

 

Niet wel en sullen si varen

 

Die Lucifers kinder willen zijn,

 

Die hemselven wil verheffen,

 

Vernedert moet hi zijn;

 

Dat selve spreect Ons Heere God.

 

Men sal den Keyser eeren

 

Ende houden met hem gheen spot.

 

 

 

9

 

Nu rade ick edel ende onedel,

 

Die in den Duytschen landen zijn,

 

Dat si den Franchoysen niet en betrouwen,

 

Want si des Keysers vyanden willen zijn.

 

Ende dat is nu openbaer:

 

Den Arent en can hi niet gekeeren,

 

Want hi vlieget hen veel te hooch.

 

 

 

10

 

Die ons dit liedeken dichte

 

Ende eerst gesongen haet,

 

Hy en derf hem niet noemen

 

Vanwegen zijnder stadt.

 

Merten van Rossem heeft den dans gemaect,

 

Die moeten die Gulikers dansen,

 

Dach ende daertoe nacht.