Apollo of Ghesangh der Musen

Klinck-dicht.

INdien mijn leven sich soo langhe kan verweeren,
Teghen mijn wreedt gheluck en onghesiene kans,
Dat ik verdooven sie, de Son-ghelijcke glans,
(Vrouw) van u ooghen schoon, door ouderdoms vermeeren,

En u goud-dradigh hayr in silver-draet verkeeren,

En uwe lust vergaen van sangh, van spel, van dans,
Van soete boertery, van kruydt van roose-krans,
Van geel, van groen, van wit, en incarnate kleeren:

Soo sal mijn oude min my gheven in de mondt,

Vermaningh van de tijdt die ghy niet recht besteeden:
En of't dan schoon gheviel dat ghy noch vore stondt,
V merckelijcke schult, met woord', en schijnbaer reden,
Soo sal nochtans een sucht diep uyt uws herten grondt,
Leedt-wesens teken zijn, en ick ten deel te vreeden.