Inden name des barmhertighen ende goedighen Godts. XXVII. Capittel.
EEn ider wandele in sijn beroep, want Godt kent die wel, die op den rechten wech wandelen. Alsmen u vraegt wiens de ziele zy, soos egt, sy behoort Godt toe, die u de wijsheyt heeft geleert.
Als ick u dit boeck ontneme, soo en sult ghy niemandt vinden die u sulcks wederom can geven, maer Gods goetheyt is in u seer groot.
Of schoon alle menschen haer aenden Duyvel verbonden, ende teghen u yet voor nemen wilden, soo sullen sy doch minder als niet uytrichten connen: ende vele en sullen desen Alcoran niet willen gelooven, tot dat ghy voor haer oogen nae den Hemel vaert, ende onder de Engelen gesien wert: Maer ghy sult segghen, ghy en sijt mede maer een mensche van Godt als een boodtschapper gesonden om de geloovige den rechten wech te wijsen.
So de aerde vande Engelen bewoont werde, soo en hadde Godt hier toe gheen Engelen ghebruyckt. Aenden dach der opstandinge, so willen wy alle daden ende wercken der blinde ende stomme te samen rekenen, ende haer int brandende vyer jammerlijck quellen, ende hoe meer zy branden sullen, hoe hittiger het vyer werden sal. Godt heeft alle menschen een termijn geset, ende die en connen zy niet over gaen. Men vindt sommighe lieden die sijn soo gierich, dat wanneer sy de gantsche wereldt, ende alles wat Godt vermach in haer ghewelt crijghen conden, zy daer van niets en souden willen uytgeven, maer alles voor haer selven behouden.
Doen Moses wonder wercken dede so heeft hem Pharao voor een tooveraer ghehouden, maer Mose heeft geseyt dat hy dit niet en dede, maer dattet Godt de schepper des Hemels ende der aerden was, die dese dingen heeft gedaen, ende als hy dat geensins wilde gelooven, soo hebben wy hem ende sijnen broeder, met alle de ghene die hem aen hinghen, inde zee verzopen, ende de kinderen Israels uyt sijn lant gevoert. Nae desen hebben wy u als een Prophete ofte boodtschapper, soo wel om vreuchde als om droefheyt uytghesonden, ende daer nae den Alcoran ghemaeckt, op dat de lieden mochten lesen, ende daer aen ghelooven,
Auteursrechtvrij