De Arabische Alkoran

In den name des barmhertighen ende goedighen Godts. XVI. Capittel.

SEgghet danck den onbegrypelicken ende alwijsen Godt die alle dinghen weet die daer geschieden in den Hemel ende op Aerden. Als u de ongeloovighe vragen sullen of de ure des jongsten daegs komen sal, so segt ja: want Godts wijsheyt wil ’t alles vervult hebben, ende ter selver ure sullen de vrome goet, maer de goddeloose quaet ontfanghen.

De wijse lieden weten dat dit Boeck van den Hemel neder gekomen is, maer de ongheloovighe seggen, laet doch dese

[fol. 125]

leere varen, noch en neemtse niet aen, want zy is een nieuwe ghedichte leere, maer om de oorsaeck wille moeten zy by den duyvel varen. En hebben wy niet den David ende Salomon allerley weldaden betoont, maer de ghene die ghy voor Goden aenbiddet, die en konnen gheen verschijninghe maken van ’t gene ghy begeert. Als ghy de lieden vraeght van waer alles goets komt, soo segghen sy van Godt, maer des niet te min, soo blijven zy ondertusschen ongheloovigh. Godt sal aller menschen wercken oordeelen, ende dan sullen de ongheloovige bevinden datter maer een Godt en is.

Ghy sult den volcke verkondigen dat ick haer een tijt gheset hebbe, die zy niet en konnen voor by gaen.

Godt bewijst goet wien hy wil, hy beloont de vroome, ende straft de boose.

Veele sullen seggen, dese Prophete is een swarte Konstenaer ende leughenaer, ende wilde ons geerne van de leere onser Voor-ouders af wenden, maer men sal ’t inder daet bevinden dat alle de ghene die desen Boeck niet en gelooven, seer grousaem sullen gestraft werden.