Commentaar op het Hooglied

CXXXII Van rechter minnen sede

Die brudegom heeft nv gesproken
Dair hi der bruut mede heeft oploken
Hair herte ende ghesterct in minnen
Minne dwinctse also binnen
Datsi vriendelike sprect
Want hem die brudegom ontrect
Heeft uan hare tiegenwoordicheit
Doch is hi hair altoes bereit
Inden herten ende inden monde
Des spreect si te deser stonde
Miin lief mi ende hin
dilectus meus michi et ego illi xlv
¶ Hier salmen merken soeten sin
Wi sullen wairlijc hier bekinnen
Een point uan rechter minnen
Als die mint van herten sprect
Dair hi siin herte mede ondect
Sone comen al niet voort
Vanden monde der herten woort
Mer een deel sprect hi ende een deel
Is inder herten dus ongheheel
Sprect die bruut wel merkelike
Ende of suchte minnentlike
Ende dat suchten hair benemet
Volle woorde. want therte beclemt
Binnen is uan soeter minnen
Dat si die woorde can beghinnen
Mer niet uolspreken als sijt meent
So heuet die minne therte vereent