Commentaar op het Hooglied

(1975)–Anoniem Commentaar op het Hooglied– rechtenstatus


CLV Noch uanden seluen Gaet uut ende sieten inden dage Datten siin moeder mit grote plage Croonde. ende inden dage mede Dat hi mit alre sekerhede 5[regelnummer] Trouwede ende nam sine bruut Dat al die kerstenhede beduut ¶ Lieue kinder merct hier an Ende siet cristum onsen man Der salicheit die is ghecroont 10[regelnummer] Mit doorne: ende hoe hi is gheloont
[Folio B29rb]
Van sire moeder der synagogen Dair wi die ioedscap bi togen Dien god so uele goets hadde gedaen Eer god menscheit hadde ontfaen 15[regelnummer] Hoe iammerlike sine croonden Mit doorne. dair sine mede loonden Sire doget op dien dach Dattie goede vridach lach Ende inden seluen dage hi truwede 20[regelnummer] Die bruut ende hi vernuwede Alder werelt salicheit Die te uoren was of gheleit ¶ O alle dochtren van syoen Hoe die ware salemoen 25[regelnummer] Ons heuet ghemaket die soen Dat alder kerstenhede kinder Ter salicheit en ghenen hinder Hebben uoort: en si dat sake Dat si mit enighen ongerake 30[regelnummer] Der quaetheit volgen meer dan gode Ende si niet houden sine ghebode Die ioodscap was cristus moeder Entie ioden sine broeder Van gheslachte niet uan naturen 35[regelnummer] Dat moeste hi iammerlijc besuren Dits een point dat wi gelouen Van sire menscheit sonder douen Sullen: ende altoes ansien Ooc sullen wi voirder spien 40[regelnummer] Hoe hi uander bitter doot Gheweldelike mit eren groot Verrees anden derden daghe Ende ewelijc bliuet sonder plage Ende hi te hemel dair na clam 45[regelnummer] Dair sine herte vroude nam Want hi hadde al uoldaen Al dattie scrift dede verstaen Van hem tonser salicheit Dair na sende hi ghereit 50[regelnummer] Sinen geest der heiligher kerken
[Folio B29va]
Dair hise mede woude sterken Dat si altoes bleue bewairt In sire minnen onghespairt ¶ Hier na sal hi weder comen 55[regelnummer] Entie quaetheit te rechte domen Die sire kerken hier beraden Hinder commer ende scaden Dus sulwi sine mogentheit Anesien mit gheloue gereit 60[regelnummer] Ende sullen louen danken minnen Mitter herten ende mit zinnen So dat wi te hem moeten comen Dair hi selue is tonsen vromen

Vorige Volgende

CLV Noch uanden seluen