Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ In desen tijt so ghebuerde in Vlaendren wonderlijcke saken van Reeuwers ende Vodoysen.

DEse reeuwers sochten maniere omme tvolck te vergheuene onder tdecsel van pestilencien, van den welcken Typere een Reeuwer gherecht was, ghenaemt meester Willem matthijs, gheseyt schuercapproen van Dixmuyde waert, omme dat hy nam twee maechdekins te ghenesene vander pestelencie, maer hi gaf hem lieden regael te drinckene, daer of dat si storuen, ende was daerom ghedoot, den.xi.sten dach van Ougst. Anno M.iiij^c.ende.lxviij.

¶ Item corts daer naer was Typre noch gheuanghen eenen Heyne, gheboren van Herentals, ende noch een met hem, die ooc vele lieden vergheuen hadde, ende dese waren gheuoert vp eenen waghene Typre lancx der straten, naect vanden gorderieme vpwaerts, ende waren so ten vier houcken vander stede ghestreken met gloeyende ysers vp huerlider bloote lijf, ende voor die besant weder commende, daer wierden si onthooft.

[Vp den.xxiiij.dach van Septembre]

¶ Item inden seluen tijt waren te Werveke ooc lieden gherecht, die een kint dat ghestoruen was vander pestelencie, hadden al te nyeuten ghesoden in eenen ketele, ende dat sop goten si in drincpitten ende in fonteynen, omme tvolck te corrumperene, ende ter doot te bringhene, ende si goten dat sop ooc in speerswater vaten, als waer by men te Brugge die speerswater vaten al vulde met sande ende met greyse. Ende men dorste in gheene kercken noch in cloosters enich speerwatere laten staen, lange tijt gheduerende. Ende te brugghe waren van sulcke faeyte quade wijfs gheuanghen, van den welcken datter eene gebarnt was vp een schauot, vp die grote marckt te Brugghe, vp den.xxiiij.dach van Septembre. Anno lxviij.ooc waren te Veurne lieden verbarrent vanden seluen faeyte. Dits tincarnacioen.

      ¶ Gheestelick, leeck sijn gheplaecht

      met Reeuwers.

[Den.xxv.dach in Wedemaen]

MEn sal weten also hier voren verhaelt es, daer wi spraken vanden bisscop van Langhers, dat hy te brugghe quam, het was openbaer ghenouch dat dat was omme dyt selue huwelic te belettene, nyet yeghenstaende het voorseyde huwelic ginc voort. Ende dese edele bruyt Margriete van Ioorck quam in tswijn ter Sluys, den.xxv.dach in Wedemaent, ten.vi.hueren vanden auende. Int iaer.lxviij.daer si met grooter blijschap ontfanghen was, ende met diueersche costelicheden van personaedgien ende van schoonen vieren.