Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Hier naer volchde den hamere

¶ Item voor die oostpoorte vander burcht, stont eene proper huytnemende poorte, daer vp dat was een blijde parck, hoe dat dye bruyt van Cantijcken stont met vele maechdekins, ende hadde een rolle daer in dat stont. Inueni quem diligit anima mea. Ende doe stont daer een suuerlic ionghelinc als een bruydegom, met meer Ionghelinghen, ende hi hadde een rolle daer in dat stont. Tota pulcra es amica mea suauis et decora. Ende duer die poorte lijdende, daer stonden die van sinte Donaes met haren proost, ende metter gheheelder collegie processye wijs, ende onfinghen die edele ende moghende princersse, ende haer weerdicheyt ende alle eere biedende dye sy mochten doen sulcker weerdigher vrauwen, ende gheuende wieroock ende speerswatere. Ende waren ghecleet met hueren costelicsten abijten seere rijckelijc ende eerbaerlick. etc.