Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Hier naer volcht een ander moeyte, waer omme dat Tlandt van Luycke ghedestrueirt was, ende was dye vierde vaerdt die vp Tlandt van Luycke ghedaen was.

¶ Dat.lvi.Capittel.

[fol. C.xlvij.r]

ITem als den paeys aldus ghesloten was te Perone als voorseyde es tusschen den Coninc ende Hertoghe Kaerle, doe trac die Hertoghe met sinen gaernisoene, weder in tlant van Luycke, ende die Coninc van Vranckerijcke met hem. Ende Hertoghe Kaerle slouch weder siedge voor dye stede van Luycke, ende die Bourgoengioenen die liepen in tongeren ende roofden al dat sy konden, als dat die van Luycke saghen, dat die prinche so machtich weder voor Luycke lach, si waren veruaert Ende doe quamen eeneghe ghedeputeirde huyt der stede van Luycke, daer die bisschop van Luycke selue mede was biddende grote ghenade, ende presenteirde hem die stede in sinen handen behoudende lijf ende goet, waer vp die Hertoghe Kaerle andtwoorde gaf, als ghi dat doen wilt so comt dan morghen alle die mannen dye in Luycke sijn, vp een velt hier buyten in haer lijnen cleederen, kennende sware mesdoenders sijnde, ende brijnghende dye slotelen vander stede mede, ende dan sal ic doen sulcke gracie alst mi ghelieft, met deser andtwoorde trocken die van Luycke binnen harer stede. Ende als dye Bisschop met den ghedeputeirden trecken soude binnen der stede, so quam die marscalc van Bourgoengien, ende hy vijnck den Bisschop, dus waren die Luyckenaers weder haren bisscop quijte. Ende si hadden wel ghemerct hoe ende waer dat Hertoghe Kaerle ghelogiert was ende si quamen binnen der seluer nacht, ouer haer lieder mueren gheuallen, ende daden so vele dat si quamen in Hertoghe Karels logijs, het welcke was een groot houten huys ende spraken goet Fransoys, ende waren ghecleedt ghelijc des Princhen volc. Ende si vermoorden wel.xxvi.lieden, onder den soldere daer die Prinche, ende die coninc selue bouen ghelogiert waren, het welcke grote scande was datmen so slicht aweet dede, maer ten fijne si worden bekendt, ende met crachte wederstaen, ende weder in Luycke gelaecht. Ende lietender ooc wel.xiiij.mannen doodt. Ende dit was vp eenen vrydach snachts, daer si vele vyleyneghe woorden den Coninc toe riepen segghende, verrader fransoys, hier suldy blijuen, ende dese selue woorden riepen si Hertoghe Kaerle ooc toe, meenende in dat verwonderen 'als' Auentuereghe Rudders of meersman tsijne, twelcke inder waerheyt hemlieden seer corts also ghebuerde.

[Den.xxx.sten dach in Octobre]

¶ Item dye Prinche ontsteken sijnde met groter gramschap, gaf ter stont consent die stede te beclemmene, ende hi Abandonneirdese te vyere ende ten sweerde, het welcke terstont ghedaen was met grote assaulte, ende die stede was ter stont ghewonnen sonder weere vp den sondach, den.xxx.sten dach in Octobre Anno.lxviij.ten.ix.hueren inden auendt.

Der lukenaers blasinghe es min dan sobre
chaerloisweert onterfdese dertich octobre

¶ Item in dit iaer waren Burchmeesters van Brugghe eenen Bernaerdt van Halewijn, ende Ian Breydele.

Spelt drie warf Ludic een m daer toe
Dertich Octobre Kaerle want doe

Ludic      Ludic      Ludic      M

¶ Als die luyckenaers haer stede aldus beclommen saghen, si liepen al harer veerde ouer die Mase, ende mijn here van Rauesteyn met sinen volcke was deerste die de stadt beclam ende in nam. Ende in dye hitte, so wordet al doot ghesleghen datmen inden wech vandt, out, ionc, man, wijf, ende kint. Daer naer quam die coninc van Vranckerijcke inne met hertoghe Kaerle, ende die coninc hadde sint Andries cruyce vp sijn curaetse, ende hi riep. Ie suys Roy viue Bourgoengie viue Bourgoengie. Ende corts daer naer wordet al te viere ende te sweerde ghedaen, ende groot volc verslegen ende verdroncken in die mase. Ende die stadt wort verbrant, wtghedaen eeneghe kercken.

¶ Item in deser tijdt murmereirden eeneghe Heeren in Vranckerijcke, vp den Coninc, als waer bi die Coninc met vriendelicken orloue schiedt vanden Hertoghe Kaerle. Ende es te wetene dat sprinchen volc hadde onsprekelicken roof binnen der stadt van Luycke, niet yegenstaende dat die luyckenaers selue veil goets mede hadden daer sy mede waren gheulucht in tbusch van Ardanen, daer sy al te met vele quaets deden. Aldus was Luycke al gheschent, ende en haddet die prinche niet ghelaten omme gods wille ende om sinte Lambrechts wille, ende oock om Sbisscops wille hi soude die Stede al gheraseirt hebben, omme dieswille, dat si so dickwils meyneedich gheweist hadden.

[fol. C.xlvij.v]

¶ Item in dit selue iaer voor midwijntere, waren ter Sluys int swijn wel.C.ende.l.schepen coopvaerders, alle schepen met meersen, binnen.xl.iaren en sachmer niet so vele commen met eender reysen (gode lof.)

[In tselue iaer van.lxviij]

¶ Item in tselue iaer van.lxviij.so verbarnde die kercke van Hulst, van eender blexeme, die quam huter zee, ende dat gheschiede vp den Derthien dach smorghens.

¶ Item int selue iaer was Hertoghe Kaerle te Bruessele daer bi hem quamen eeneghe ghedeputeirde van Ghendt, ende als hi hem lieden ghehoordt hadde, so sprac hi eyghens hemlieden segghende hi soude hemseluen bannen ende ballijnc blijuen huyter stede van Ghendt, ende daer niet in commen, voor dat si vulcommen souden het seggerschip van Gauere, het welcke gheseyt was by den Hertoghe Phelips sinen vadere.

[Anno.M.CCCC.ende.lxviij]

¶ Item die goede lieden van Ghendt ontsiende haren Prinche, si deden vp den Kersauent toe maetsen dye hospitael poorte, ende bouen dien droughen si alle hare bannieren inden handen vanden hooch Baliu van Ghendt, die welcke Baliu beweichde alle dye bannieren te Bruessele.Anno.M.CCCC.ende.lxviij.

[Vp den.viij.sten dach van lauwe]

¶ Item vp den.viij.sten dach van lauwe, doe waren alle die dekenen van ghendt te Bruessele inder stadthuys, alle in swarte habijten ende ghijnghen met haren bannieren, elck bloot inde handt tot den houe te Coudenburch, ende daer slootmen de poorte voor haer hooft maer men deidse bi ordonnancien een ende een binnen commen, met haren Bannieren.