Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Hier naer volcht Een vreymt wondere.

[fol. C.xlviij.r]

HEt was te wetene dat die prinche sadt in een rijckelicke siedge hoghe, ende met gulden lakene behanghen, aen hebbende een root gulden habijt, met wijde mauwen, gheuoert met sabels. Ende voor sine voeten sadt die Cancelier, ende vele here vanden Toysoene ende ooc edele heeren van sinen rade, die saten ooc vp die staedgie daer toe gheordonneirt. Te wetene mijn here Anthonius de bastaert mijn heere van Rauesteyn, Phelips de Sauoye, die bisschop van Lyons, dye bisschop van Luycke, die bisscop van Doornicke, ende vele andere heren ende princhen, het welcke seer beschaemtelic om sien was voor hem lieden, die daer ontboden waren.

¶ Item die sale daer dit gheschiede was seer rijckelijck behanghen ende vercleet, ende inden middele was ghemaect een viercant parck van baeldgen ront omme, daer inne dat die van Ghendt al haerlieder bannieren wierpen, in teekene van onderdanicheden. Oock brochten si alle haerlieder preuileidgien inden handen vanden Hertoghe Kaerle, daer of dat eeneghe ghecasseirt waren, wijlent hem lieden ghegheuen van eenen coninc van Vranckerijcke, ghenaemt Phelips, ghenouch daer toe bedwongen sijnde. Ende daer dede die Hertoghe Kaerle een Relaes, gheduerende byden twee hueren lanc, hem lieden verwijtende alle die meshusen die si oyt yeghens hem mesdaen hadden, segghende. Ic beminne hu, maer en ontsie hu niet. Ende naer al tverspreken, si baden ooc moedelicke om sine gracie. Ende hy consenteirde hem lieden gracie ende paeys, ende hi heeft hem lieden ghestelt inden wech van goeder pollicie, in sulcke maniere als hy voort sijne stee van Ghendt ghehouden ende gheregiert wilde hebben, ende niet daer buyten gaen.