Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

Hoe die van Rijssel seer chierlicken huyt quamen, om te Brugghe Vespereye te houdene, ten steickspele aengaende.

Ende hoe die Edele Hertoghe Maximiliaen met dye heeren van Brugghe hen eerlicken ontfinghen. Ende hoe me vrauwe Marie met haer gheselschap, die Vespereye aensach.

[Den.xxv.sten dach van April]

VP den.xxv.sten dach van April ende was sondach, vander vesperye te Brugghe aengaende den steicspele. Doe quamen die van Rijssele ontrent der noene met schonen gheselschepe in Brugghe al meest met groenen abijten, ende die prinche reedt selue in persoone yeghens die van Rijssele, ende quam met hem lieden inne, daer hi beselscheipt was met vele edele mannen ende grote heren. Ende des achternoens deden die van Brugghe vespereye naer doude costume. Ende die hertoghe in die vespereye als poortere, ende die princersse reedt in Cranenburch met schonen state, omme te sien die vespereye daer lijden. Ende alst tijt was so reden die van Brugghe, ende dye Foreestiers waren met state tot des princhen houe, omme van daer te rijdene ter bane waert. Ende hoe wel dat costume was dat die foreestiers ghecostumeirt waren haer vergaderinghe te houden ten Eechoute int cloostere, als doe was die vergaderinghe gheordonneirt te sijne in mijns heeren hof. Ende als si int hof versaemt waren, soe namen si haren wech omme ter bane waert te rijdene. Eerst duer tstraetkin achter den gouden cop, ende van daer duer die nyeustrate, ouer die nyeu brugge lancx den Dyuere, ende quamen ouer die grote Eechout brugghe duer dye wulhuystrate ter bane waerts, ende alsoo deden die van Brugghe vespereye. Te wetene dese naeruolghende personen. Ende voor hemlieden was gheuoert dye banniere vanden beere, ende elck hadde sijn wapene daer aene seer rijckelick, ende eerst inne.

¶ Die Hertoghe Maximiliaen graue van Vlaendren.etc.

Ian van Nyeuwenhoue.f.Clays Burchmeester vanden Courpse

Wouter despaers als Foreestier.

Iacob die here.f.Iacobs

Lodewijc de Baenst

Mattheus die brouckere

Iacob die vos.f.Iacobs

Ian van Doorne als houde Fereestier, ende deden vespereye naer costume. Ende naer die van Brugge deden vespereye dye van Rijssele, ende daer naer een coopman van Oostlant ende daer naer een man vanden Damme. Ende alst al ghedaen was, so reden die van Brugghe metten Prinche tot in sijn hof, ende nemen aen hem orlof. Ende die hertoghe Maximiliaen was ghecleet ghelijck dye stekers van binnen, te wetene met swarte fluweelen keerels, ende peersche wambuysen Ende tpeert vanden prinche was ouerdeckt met eenen blaeuwen fluweelen ouerdecsele, seer chierlick. Maer die peerden vanden anderen stekers waren ouerdect met blaeuwen houtsueren van sijde. Ende om dat dye Burchmeestere vanden courpse vespereye dede, so reden die schabeletters vander stede voren, ende andere dienaers, ende ooc sommeghe wethouders. Ende daer naer dye stekers alle deene naer dandere, ende achter hem lieden soe volchde elck sijn gheselschip, twelck al seere rijckelic huyt quam. Ende al doe ten tijden, smaendaechs ende sdijsendaechs, daer en was gheen steicspel om sekere cause daer toe dienende.

[Den.xxviij.sten dach en den.xxix.sten van April]

¶ Item vp den.xxviij.sten dach van April so wart Anthonis vander Vicht verlaten van sijnen Schouteetenschepe, ende Willem dye Wintere was ghemaect Schouteeten van Brugghe.