Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Hoe die van Brugghe steicspel hielden]

Hoe die van Brugghe steicspel hielden, daer die edele Hertoghe Maximiliaen selue mede stac, als poortere, daer hi vele eeren beghinck. Ende men gaf hem eenen schonen Dyamant, die welcke seer costelick was. In welcke steicspel vele triumphen bedreuen was.

[fol. CC.xiij.r]

ITem vp den.xxix.sten dach van April, ende was woensdach naer noene, ontrent den.vi.hueren vanden auende, soe was tsteicspel van Brugghe ghehouden, daer die hertoghe Maximiliaen selue stack als man van Brugghe, daer hy vele eeren in tvoorseyde steicspel beghinck. Ende den beer was ghegheuen een stekere vanden Damme, ghenaemt Ioris lannoye. Ende het foreestierschip was ghegheuen Lodewijc de Baenst F. Lodewijcx. Ende den Dyamandt was ghegheuen onsen prinche Maximiliaen. Ende een duytsch here gafmen den hoorne, ende daer was groote tryumphe bedreuen, ende daer was weder een nyeu steicspel beroupen yeghen tsanderdaechs. Ende dye prinche stack weder selue met den lijue. Ende daer stack een oosterlinck, verwapent als een wildeman, ende sijnen tymmer was een leuende knechtkin wilt ghecleet, houdende een speere in sijn handekins, ende al sijn gheselschip waren alle ghecleet als wilde lieden. Ende andere staken verwapent als duuelen, ende al haer gheselschap van ghelijcken.

[Den.xxx.sten dach van April]

¶ Item vp den.xxx.sten dach van April wast brant aen sconincx brugghe, in thuys van

[fol. CC.xiij.v]

eenen Cruydenier, ende dat quam van termentijn te siene, daer groot schade of quam. Ende dye broeder vanden huyse hiet Luyck dye feuere, sijn handen waren hem of ghesoden, so dat tvel metten naghelen of ghinc ghelijc een kieken dat gheschout es, ende hi moeste van hitten in die Reye springhen, of hi soude gheheel ontsteken hebben ende corts naer dien so starf hi vander seluer quetsuere. Requiescat in pace Amen.

[Den derden dach van Meye. Anno lxxix]

¶ Vp den derden dach van Meye. Anno lxxix.Doe wast een den schoonsten heleghen bloetdach die binnen langhe tijden gheweist hadde. Want daer was ghetoocht den boom van Yesse, ende tauentmael, ende thouekin, tvanghen, tgheesellen, ende tcruysdraghen, ende veil schoonder sticken der Passien ons heeren aengaende, als Annas, Cayphas, Herodes, ende andere seere chierlic toe ghemaect van schilderyen, daer die prinche ende me vrauwe dye Grauinne groote ghenouchte in hadden.

[Den.v.sten dach van Meye]

¶ Item vp den.v.sten dach van Meye quam een weerlic man, die welcke was wonachtich in dye Speere, in dye graeuwerckers strate, in sint Iacobs kercke te Brugghe, ende hi slouch eenen preistere in sijn hooft met eenen scherpen baselare, wel meenende den priestere doot te slane, ter cause van ouerspele met sinen wijue, maer die priester en starf niet. Doen bleef die kercke langhe in cesse, sonder messe daer te doene. Ende die selue man sneet sijn wijf een stick van harer nuese, so dat si haer leuen lanc daer bi gheteekent was. Verguae God dat si alle die van dien sijn, alsoo gheteekent waren, die men vindt te Brugghe ende elders.

[Den.ix.sten dach van Meye]

¶ Item vp den.ix.sten dach van Meye ende was sondach, doe schoten die schotters vanden honden boghe hueren gaey van eeren daer die edele hertoghe Maximiliaen selue mede schoot, ende schoot den gaey of selue metter hant schotterlick, daer omme dat tvolc vander stede van Brugghe wel blijde was. Dits Tincarnacioen.

Oostrijc schoot frisch te brugge den gay of
Neghen in Meie vruecht blijfter vray of.

[Den.xi.sten dach van Meye]

¶ Item vp den.xi.sten dach van Meye was te Weruicke eenen schadelicken brant, commende van invyere. Ende in die selue maent die graue van Rommont dede so vele met sinen volcke dat hi binnen der stede van Camerijcke in ghelaten was, ende alle die fransoysen waren huyt gheiaecht. Ende dye stede van Camerijcke bleef aen onse sijde, ende tcasteel van ghelijcken, ende bouen dien si ghecreghen tcasteel van Bouchein, een sterc Casteel dat die coninck met verraderye ghecreghen hadde, ende ontnomen den graue van Simpol. Ooc wonnen sie die stede van Crieuecuer, ende meer ander plaetsen. Ende in desen tijt waren in Bourgoengien vele fransoysen versleghen ende vele gheuanghen. Ende der cause van dien was een processie gheordonneirt.

C	hristus helich bloet valt ons nv bareli	C
C	onfoorterende in ons lijden stran	C
C	hierlic draghen wi hu gheerne stateli	C
C	omt charitatelick in onsen gan	C
C	onsenteirt onsen prince goet lijf ende lan	C
C	rooneirt nv franck sijnen sone ion	C
C	leet maria vruchtbaer in haren spron	C
L	eent den vlaemschen tronc ontfarmeghen da	V
V	p huwen ontfanck staet als ons betra	V
V	rau magdaleene valt oock niet fla	V
I	ont onser processye vertroosten vr	I
I	n meye seuenthiene ende waer dat s	I

Deerste letteren ende die laetste van elcker

reghele, van dyt voorseyde dicht, bewijsen

Tincarnacioen vanden iare.

[Den.xvij.sten dach van Meye]

¶ Item om alle die voornoemde victorien dancbaerlic te bekennene, ende voort te biddene omme dye prosperiteyt ende weluaren van onsen prinche ende princersse, ende den ionghen Phelips van Bourgoengien, soe was te Brugghe eene generale processye ghedreghen, vp den.xvij.sten dach van Meye die deuootste diemen nyet vele ghesien en hadde, want alle die collegien, ende die.iiij.oordenen ende alle die scholierkins die ghinghen alle baeruoets. Ende die prelaet ende die muenicken vanden Eechoute van ghelijcken, elc met een barnende keerse in die handt. Ende dese processie was ghedreghen buyten Brugghe, ter Magdaleene. Ende dat weerde heleghe bloet was mede ghedreghen, daer die bisschop van Doornicke achter ghinc in dye processye met een gulden cruyce in die hant, ende ghinc ooc baeruoets ende blootshoofts, daer die wet ende alle die notabele van Brugghe, hooftmannen ende Dekens,

[fol. CC.xiiij.r]

ende vijnders van allen ambochten van Brugghe mede ghinghen met barnende toortsen ende keersen. Ende dyt en was noeyt ghesien datmen thelege bloet so varre buyten Brugghe drouch, twelck seere deuoot ende schone was om te sien.

Te Lazarus sustere theleghe bloet ic sach
Deuoot in Meye vp den seuentiensten dach

[Den.xviij.sten dach van meye]

¶ Item vp den.xviij.sten dach van meye ordonneirden die fransoysen binnen Atrecht eene processye generale, ende dat omme dat sy sien souden dye macht ende dye menichte vanden volcke. Ende doe si saghen datter soe vele volcx binnen der stede was, si hadden ducht dat si die stede ouergheuen souden den Bourgoengioenen. Ende daer omme die Fransoysen ghinghen in die wapene, ende bienen wel.xvi^c.poorters ende ambochtslieden vanden eerlicsten vander stede, ende si bondense twee en twee te gadere, en sondense al te Vranckerijcke waert, ende si en waren nauwelick ghelooft een meskin te draghen. Ende die fransoysen behilden tgoet, ende die wijfs ende dye kinderen bleuen binnen Atrecht, welc deerlick om sien was. Ende vp den.xix.sten dach van Meye quamen die fransoysen voor Duway, daer si.iiij.of.v.lantslieden doot sloughen van daer ontrent.