Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item corts hier naer int beghintsel vander maent van Lauwe Anno.lxxxvij.]

Item corts hier naer int beghintsel vander maent van Lauwe Anno.lxxxvij. soe ghebuerdet den Roomschen coninc te Brugghe sijnde, datter quamen grote menichte van heynewiers, volc van wapenen ontrent der stede van Brugghe, ende waren ghedaen commen by eeneghe die huyter stede van Brugghe waren die welcke den Roomschen coninck gheerne inne ghelaten hadden. Ende sijn volck stont al ghereet te peerde, omme darwaert te rijdene, ende daer reeter een deel huyte, maer si en consten niet weder in gheraken, waer omme den coninck voorseyde niet wel te vreden en was.Ende vp desen tijt was Balyu van Brugge mer Roelant van huytkercke, ende mer Pieter lanchals was Schouteetene van Brugghe.etc. Ende van tghene

[fol. CC.xxix.v]

dat hier naer ghebuerde binnen Brugghe ende in meer andere plaetsen binnen Vlaendren, dat vindt ghi hier naer, beghinnende aen dander sijde, aengaende vanden Iare.M.CCCC.ende.lxxxvij.ende also achteruolghende.etc

[Den laetsten dach van Lauwe en den eersten dach van Sporcle]

¶ Item binnen der seluer nacht, ende was den laetsten dach van Lauwe, so waren dye wakers van alle dye poorten vander stede seere beroert, ende sonderlinghe dye van der Ghendt poorte, ende van sinte Kathelijne poorte, ende souden omme den Deken van den temmerlieden, te wetene Mattheeus Denijs, die welcke dattet seer lanck maecte, maer ommer hi moeste bi hem lieden commen. Ende es te wetene dat inden seluen voorauent die Roomsche Coninck, selue in persoone was ter poorte, omme tvoorseyde volc van wapenen inne te latene als voorseyde es, ende was tot binnen der eerster poorte. Ende die wakers die seyden yeghens den coninc voorseyde, here hu sal ghelieuen binnen te commene, want wi willen die poorte toe sluyten. Ende doe quam dye coninc voorseyde binnen, ende also saen als hi binnen der poorte was, so lieten si tschofhec nedere, omme twelcke dye coninc niet wel te vreden en was, maer reedt also weder naer sijn hof, daer hi binnen den seluen auende by hem ontboot den Scoutheetene mer Pieter lanchals, ende meer andere.etc. Ende des ander daechs, twelc was den eersten dach van Sporcle vp onser vrauwen auent Lichtmesse, so was die coninck voorseyde smorghens voor den.v.hueren inden burch, met alle sijnen volcke dat hi in die stede hadde, wel voorsien ende gheharnascht, ende bi hem was den Schouteetene ende meer andere vander wet. Ende dye Schouteetene hadde ooc ontboden den Dekens vanden vier neeringhen, omme bi hem te commene, die welcke som quamen, ende vraechden den Scouteetene mer Pieter lanchals, waer omme dat si daer ontboden waren. die welcke hem lieden antwoorde seggende, men salt hu wel varijnc segghen. Dye welcke Dekens quade suspicie hadden, midts dat si den coninc voorseyde, ende al sijn volc dus saghen ghewapent ende voorsien, ende absenteirden hem huyter burch gaende bi hueren volcke, die welcke alle meest vp huerlieder Ambochts huysen vergadert waren, omme die maniere die si tsauents te voren ghesien hadden vanden Heynewiers ende volc van orloghen dat men in laten wilde. Ende binnen der tijt dat si dus in den burch stonden, so maecten dye duytschen een slecke, stellende hem lieden in ordonnancie int ronde, ende also ten eynde commende, riepen stae stae, twelc eeneghe van der stede qualic verstonden, midts dat si veruaert waren, segghende datmer riep slae slae, ende worden by dien loopende huyter burch, so dat in allen straten een gheruchte quam datment inden burch al doot slouch, twelc so nochtans niet en was. Ende binnen der seluere voornoene so quamen alle die ambochten ter marct met hueren standaerden ende pingioenen, twelcke was wel grotelick tot huerer qualicvaert. Ende dit was vp onser vrauwen auent Lichtmesse.Anno.lxxxvij Ende waren doe Burchmeesters van Brugghe, Ian van Nyeuwenhoue, ende meester Ioris baert. Ende aldus ghecommen sijnde ter marct, twelc was ontrent den.xi.hueren voorder noene, terstont so stelden si alle die stallen ende die vischbancken in alle die houcken vander marct, tot dat die marct al gheheel of ghesloten was, ende dit was ontrent den.xi.ende.xij.hueren. Ende stonden daer te wetene die.xvij.neeringhen tot den twee huren daer dye noene, eer datter yement by hem lieden quam. Ende deerste die hem lieden volchde, twas tlet vander naelde, daer naer die smet, ende doen volchden die vier neeringhen, ende corts daer naer den backere, ende den vleeschauwere, ende tleir, ende dye makelare, die volchden met haren tenten ende pauwelioenen, ende so deden oock alle dandere Ambachten. End corts daer naer soe quamen oock alle die vrylaten met haren pingioenen, ende soe deden oock alle dye hooftmannen vanden.vi.sesten deelen, metter poorterye. Ende daer gheweist hebbende een langhe poose, doe soe quamen ghedeputeirde heeren ende ooc sommeghe cooplieden, biddende den commuyne als doe ter marct ghecommen sijnde, ende die coninc deit hem lieden bidden dat si weder vander marckt souden willen gaen, hi soude hem lieden vergheuen alle tghene datter ghebuert was, ofte wat sy mesdaen hadden

[fol. CC.xxx.r]

yeghens hem of sijnen sone den hertoghe Phelips, maer het commuyn dochte dat die coninc meer mesdaen hadde te gheloouene sijnen quaden Raet dan si deden, want sy niet en begheerden dan tweluaren van harer stede ende vanden lande van Vlaendren, ten profijte van haren natuerlicken here den hertoghe Phelips, die god beware in siele ende in lijue.

[Den.ij.sten en den derden dach van Sporcle]

¶ Item volghende desen, bleuen ter marct staende verwachtende den wille vanden coninck, maer hi vant in sijnen Raet dat hi ter marct nyet en quam. Ende vp den.ij.sten dach van Sporcle maecte tcommuyn haren Capiteyn vander stede mijn here van Huytkercke, die welcke eedt dede huyter name vanden Roomschen coninc, als voocht ende momboor van onsen gheduchten heere ende prinche den hertoghe Phelips, daer in tvolc seer qualic te vreden was, ende deden hem weder vereeden den derden dach van Sporcle ende was vp dien dach ghemaect Scouteeten van Brugghe mijn here Pieter metteneye, ende dede ooc den seluen eedt als den Capiteyn, te wetene huyter name van onsen natuerlicken heere den hertoghe Phelips. Ende vp desen seluen dach naer dye noene, soe dedemen een ghebodt, so wie dat den Scouteeten die gheweist was voor die date van desen, wiste te vindene ofte te wijsene waer dat hi ware, die soude hebben.L.pont groot, ende ooc die water graue, ende die stede houder van den voorseyde Scouteeten, waren beede ghestelt elc vp.L.libra groten, die welcke twee ter stont gheuonden waren ende gheuanghen, ende die derde ontquam by nachte ouer die veste, ende die clerc vanden Scouteeten voorseyde, was ooc wech gheholpen, die welcke waren ooc ghestelt vp.xxv.libra groot, het welcke die quade voortstelden omme dat si ghelt ghecrijghen souden.

[Den.x.sten dach van Sporcle.lxxxvij]

¶ Item es te wetene also saen als tcommuyn van Brugghe aldus ter marct ghecommen was, so screuen si aen die van Ghendt om hulpe ende bystandichede, ende om alianchie te makene met malcanderen, so dat dye van Ghendt screuen om saufconduyt, alsoo sy ons ghegheuen hadden omme te commene met xl.peerden metten ghedeputeirden, twelc hem lieden minlic gheconsenteirt was, maer die van Ghendt veruoorderden hem te commene wel voorsien met acht hondert mannen, ende waren commen tot Spermaelgen buyten Brugghe, daer si groote rudichede daden. Ende dit hoorende, men wildese niet inne laten, dan nader manieren vanden gheconsenteirden saufconduyte, ende daden hare excusacie dat sijse niet ghedwinghen en consten. Maer die mare ghinc ghenouch also, hadden sy connen in Brugghe gheraken, dat si die stede van Brugghe gherooft souden hebben, also si wel eer ghedaen hadden tanderen tijden, maer die notable baden dye van Brugghe dat si te vreden wilden sijn, si souden pijnen haer onghehoorsaem volc weder thuys te leedene, also si ooc deden, ende quamen des ander daechs metten gheconsenteirden saufconduyte als voren, ende bleuen delaygierende te Spermaelgen tot dat hem lieden die van Brugghe seynden souden twee mannen in ostaegien voor die ghedeputeirde dye binnen commen souden. Te wetene mijn here dye president ende meester Ioris baert, waer vp die notable van brugghe te rade ghinghen ende vonden in haren Raet dat si voornomde twee personen souden seynden bi die van Ghendt. Ende die van Ghendt siende den goeden wille ende ghetrauwicheyt van die van Brugghe, quamen metten voorseyde twee ostaegiers weder omme binnen Brugghe, daer si vanden hooftmannen ende Dekenen eerlicken ontfanghen waren ende seer wel ghefeestiert. Ende dyt was vp den.x.sten dach van Sporcle.lxxxvij.

[Den.xi.sten dach van Sporcle]

¶ Item aldus voortgaende vp den.xi.sten dach van Sporcle, so gauen dye ghedeputeirde te kennene ons van Brugghe, den staet van den lande, hoe ende in wat manieren dat wi seere qualic gheregiert waren, als wel blijckelic was byder verachtertheyt daer tlant in was, want wi alle te samen aerm ende bijstier gheworden waren. Ende betoochden voort met goeden redenen dat dat quam byden quaden Rade die die coninck vanden Romeynen hadde, ende dat hijere vele gheloofde die huyt waren om die landen van sijnen sone aerm ende bystier te makene, dye welcke Raders daer openbaerlick ghenomt waren. Te wetene die graue van Soren, die graue van Polen ende voort den ghemeenen Raet.