Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[fol. CC.xxx.v]

[Item den Raet van die van Ghendt, ende van die van Brugghe]

Item den Raet van die van Ghendt, ende van die van Brugghe, drouch ouer een, als datmen aresteren soude den coninc ende die heren van sijnen Rade, omme bewijs te hebbene ende ooc hem lieden bewijs te doene, onse natuerlicken here ende Prinche den hertoghe Phelips, van desen sijnen lande van Vlaendren. Waer omme datmen vinck ten eersten mijn here den president, ende meester Ioris baert, ende alle die houde wethouders die binnen.iij.iaren in regemente gheweist hadden binnen der stede van Brugghe, ende waren al gheleyt vp die houde halle, omme dat si te bet bewaert souden sijn. Ende daer naer so waren aenueert alle dese naer volghende heeren.

¶ Item eerst so was begheert aen den coninc vanden Romeynen, dat hem ghelieuen wilde te commene ter marct by den gedeputeirden van Ghendt ende van Brugghe, alsoo hi dede. Ende daer wesende, so was hem vriendelic ghebeden dat hi nemen wilde paciencie, ende sijn logijts soude willen houden ende hebben by ons vp die marckt, int huys ghenaemt Cranenburch, vp den houc van sinte Amants strate, totter tijt dat wy onse mesdoenders van onser stede ghecorrigiert souden hebben In twelcke dat hi wel te vreden was, ende es also ghegaen vp tvoorseyde huys. Ende terstont daer naer so waren gheaenueert dese naer volghende heeren.

Eerst die graue van Polem

Die graue van Sooren      ☩

Ende den Hofmeester

Mijne heere van Mijnckeuael

Mijn here van sint Bertins sint Omaers

Ende noch een machtich heere, gheheeten den schoonen Pol.

[Den.xxiij.sten dach van Sporcle]

¶ Welcke voornomde heren waren gheconuoyeert tot vp den steen, die welcke heeren waren binnen corten tijt daer naer gheleuert inden handen van die van Ghendt, om sekere causen, ende ooc om beters wille, ende waren ghesonden wel bewaert sijnde binnen der stede van Ghendt. Ende die van Ghendt gauen een verbandt, aen die voorseyde heeren niet te commene, of hem lieden niet te mesdoene, als aengaende huerlieder lijf, ten ware bi consente ende wetene van die van Brugge. Welc verbant beseghelt met haerlieder seghele, ghenaemt den groten seghele van sint Ian Ende dit was vp den.xxiij.sten dach van Sporcle

¶ Item vp dien seluen nacht waren gheuonden sparren, die ouer tbijt vanden ijse gheschoten waren, waer ouere dat eenege gheulucht waren huyter stede, maer men wiste als doe niet wiet was, ende die sparren waren ghebrocht ter marct int parck, maer men verstont achter na dye waerheyt, wie metten voorseyde sparren over gherochte. Ende es te wetene dattet als soe soe seere vroos, datmen met eenen boot, ende met menichte van volcke alle daghen die veste moeste bijten.

¶ Item als doe so vermaecten die van Ghendt die Wet van Brugghe ende die Dekens, huyter macht ende auctoriteyt van eender commissie, die si vercreghen hadden vanden coninck van Vranckerijcke, datte te moghen doene ten orbore ende profijte vanden hertoge Phelips onsen natuerlicken prinche, die welcke si alle deden eeden huyt sijnder namen.

[Den.x.sten dach van Sporcle]

¶ Item so was Raet ende aduijs ghenomen by die vander Wet, als datmen soude kiesen neghen notabele personen huyt den.ix.leden, die altoos bi die vander Wet souden wesen omme te rapoorteirene onder dye voorseyde neghen leden, wes die vander wet ghesloten ende gheordonneirt hebben. Ende dit was aldus gheordonneirt vp den.x.sten dach van Sporcle, so lieper maren, als van eeneghe die vier ende brant stichten souden binnen der stede inder lieder huysen, vanden welcken ooc sommege puppen gheuonden waren, dye te voorschijne ghebrocht waren, maer god beschermdet datter gheen grief of en quam. Ende vp dien seluen nacht so wast den commune gheseyt dat si van binnen beuochten souden sijn vanden duytschen ende tvolc vanden.Coninc. om dat si den.Coninc.ghearesteirt hilden in Cranenburch, twelc volck huerlieder vergaderinghe souden ghemaect hebben, soomen seyde in sprinchen hof, maer tcommuyn wasser vp voorsien, ende ghinghen selue met eene quantiteyt van volcke naer tsprinchens hof, ende si en vonder nyement, byden welcken wel bleeck dat nyet dan quade herten waren die dat voortstelden, ghelijcker doe vele in Brugge was, god vergheift hem.

[fol. CC.xxxi.r]

[Den.xiiij.sten dach van Sporcle en den.xxiiij.sten dach van Lauwe]

¶ Item vp desen seluen tijt so liepen eeneghe personen in diueersche huysen ende cloosteren, ende sochten diueersche persoonen, ende ghecregen die watergraue, die welcke was onder Burchmeester van Brugge, die welcke vp den.xiiij.sten dach van Sporcle ghebrocht was ter exame, ten.iij.hueren naer der noene vp dye marckt, daer een groot breet schauot ghetemmert was, daer vp dat men hem ende meer andere examineirde, ende ooc pijnde, want die pijnbanck daer stont vp tvoorseyde schauot ten aenschauwe van elcken. Daer was hy so lange gheexamineirt ende ghepijnt, so dattet auent wiert ende al donckere was, daer hy leedt ende verkende dat hi den.xxiiij.sten dach van Lauwe daer te voren, want sijne ghebuerte was die poorten ende dye wake visenteirene ende wel te doen te bewarene, ter versterckinghe vanden inghesetene, twelc als Burchmeestere vanden Courpse besworen hadde, ende nochtan nyet yeghenstaende der contrarie ghedaen hadde, want hi vp den auent voor noemt commende ter smedepoorte, ten.xij.hueren inder nacht, met hem hebbende.v.of.vi.ghesellen, so sach hi dat tschofhec neder ghelaten was, waer omme hi seere gram ende verstoort was vp die wakers, want hi wat anders meende ghedaen te hebbene, ende vraechde den wakers, waer omme si tscofhec neder ghelaten hadden. Sy antwoorden, omme dat hare wake so cleene ende sobere was, want si maer.vi.mannen en hadden in huere wake, ende dat si vernomen hadden datter eeneghe quaetwilleghe buyten ontrent der poorten waren, ende omme dese antwoorde dye si den Burchmeester gauen, so dede hijse alle scrijen bi namen ende bi toenemen, om hem lieden daer of te corrigeirene, als hi tijt ghehadt soude hebben.

¶ Item hi als daer noch ter poorten staende, quammer een duytsche huyten houe vandes conincx volc, dye daer ghesonden was om eenen roup te hebbene vanden ghenen dye buyten waren. Ende desen roup soude gheweist hebben, houf, houf, ende die den roep gheuen soude, die soude ghecleet sijn als een iaghere met honden. Ende alsmen dien roup ghehoort hadde, soudemen dye wakers doot ghesleghen hebben, maer den iaghere hadde daer een huere te voren gheweist, byden welcken dat niet en gheschiede, maer het wasser vp toe gheleydt, omme die Heynewiers ende duytschen in te latene, omme tghemeene volck te casteyne ende te dwijnghene.

[Den eersten dach van Sporcle en den eersten dach van Maerte]

¶ Item verkende noch al daer als dat hy met den ontfanghere van Vlaendren ende noch drie andere gheraemt ende ghesloten hadden byden consente van Phelips van Cleuen, dat si tghemeente dwinghen souden, ende ghelt doen gheuen bi crachte ende bi foortse. Twelck si wel begonsten te tooghene inden burch, vp den eersten dach van Sporcle, als si daer die vergaderinge ghemaect hadden als voorseyde es.

¶ Ende ter cause van desen was hy ghebrocht vp die marct vp tscauot, ende was daer onthooft, sittende in eenen setele, want hi so seere ghepijnt was, dat hy niet staen noch knyelen en mochte. Ende dit was vp den eersten dach van Maerte tsachternoens.

[Den.xxij.sten dach van Sporcle]

¶ Item vp den.xxij.sten dach van Sporcle hier te voren, soe was ghesloten ende gheordonneirt, als datmen tvolck vander stede soude stellen in ordonancie, te wetene onder Dyzeyniers, twelck also ghedaen was. Maer den nacht te voren so vloden huyter stede twee ghebroeders, ende gherochten ouer die veste, met twee harijnc tonnekins wel dichte, die tsamen waren gheclist met twee barderen lancx daer ouere, ende een bardt dweers daer vp dat si saten, ende met eene houten schuppe in die hant, daer mede dat si hem roeyden tot ouer die veste, ende ouer sijnde, namen haren wech naer der sluys. Daer commende binnen der stede, so warer lieden die te Brugghe waert ghinghen die si baden dat si die bootschepen doen wilden aen dye vander Wet, dat hem lieden ghestelt hadde vp.L.libra groten, consten sy yement van Brugghe ghecrijghen si souden te stellen vp hondert pont groten.