Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item vp den.xxij.sten dach van Sporcle]

Item vp den.xxij.sten dach van Sporcle so was ghedaen een ghebodt ter hallen huyt, dat alle die duytschen die waren vander ordonancie vanden coninck, dat si alle commen souden tsachternoens

[fol. CC.xxxi.v]

ten twee hueren naer der noene vp die vrydachs marckt, ende daer wesende totten.iij.huere, soe warender eeneghe quade rapaelgien, ende namen den standaert vander marct ende liepender mede ter vrydachs marct, daer die duytschen present waren, die welcke si daer aenuaerden, ende die sommeghe lieten si loopen. Ende dat was omme datter sommeghe quade bouuen waren die riepen datmen dye duytschen dood slaen soude, sonder die walen, ende die trompetten, ende die artchiers vanden coninc vanden Romeynen, waer of dat si vinghen wel.xl.duytschen, ende leydense vp die thorren vander stede tusschen der bouuerye poorte ende den minnewatere, waer of dat onder die.xl.waren.vi.edel mannen, ende bleuen daer ligghende al dien nacht, ende tsanderdaechs totter noene Ende daer waren goede mannen dyer voor hem lieden baden, als datmense huyt laten soude ende ghelt gheuen om mede thuys te treckene, alsoo hem lieden ghebuerde, maer sy trocken ligghen in Hulst om ons te helpene bederuen ende te nieten te doene, also si wel betoochden, vp die van ghendt, ende vp tghentsche barnende ende roouende, ende vangende die schamel landtslieden, want sy verbarnden Assenede ende Capricke, ende beroofdense van haren lakene ende ander goeden, ende deden al tquaet dat si consten ende mochten.

[Den.xix.sten en den den.xxvij.sten dach van Sporcle]

¶ Item vp den.xix.sten dach van Sporcle waren vp die marct in dye tente vanden fruteniers twee fruteniers die woorden namen yegens malcanderen, ende worden vechtende, soe dat deene vp die stede doot bleef, ende dander starf vp den.xxvij.sten dach van Sporcle ooc vander quetsuere, ende waren twee ghebuers wonende in sinte Amants strate, waer of dat deene was een bezem makere.

¶ Item als die gheuangene heren te Ghendt gheuoert weren als voren gheroert es, so beloofden die van Ghendt, dat si die weder leueren souden inden handen van die van Brugghe, alst hem ghelieuen soude, twelck si niet en hilden.etc.

¶ Item die Schouteetene van Brugge gheweist hebbende voor die date van desen was onghereet vanden eersten dach van Sporcle tot den.xx.sten dach van Maerte, als ghy hier naer noch wel hooren sult.