Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item hoe den Coninc vanden Romeynen vertoocht was die waeromme dat dye van Brugghe aldus ter marct ghecommen waren]

[Den.xxiiij.sten en den den.xxiij.sten dach van Sporcle]

Item hoe den Coninc vanden Romeynen vertoocht was die waeromme dat dye van Brugghe aldus ter marct ghecommen waren, ende hem waren beween veil pointen ende sticken die daer toe dienden. Ende eerst hoe wi van Brugge ende meestendeel al tlant van Vlaendren seere veraermt ende bijstier gheworden waren, by quaden Rade van eeneghe die hi bi hem hilt, ende lange ghehouden hadde, twelck hem bewesen was by vele diueersche pointen, aengaende sijnder hoochheyt ende sijns kints lande, onsen natuerlicken here ende prinche. Ende dit vertooch was hem ghedaen vp den.xxiiij.sten dach van Sporcle.

¶ Item vp den.xxiij.sten dach van Sporcle, als voren gheroert es, ten.x.hueren inden auent, so waren die van Ghendtte Vrsele om die voornomde heeren daer te ontfanghene, ende eene partye van ghendt was Ian van Coppenolle ontrent met.L.peerden. Ende die voornomde heren daer ouernemende, dadense versitten vp nyeuwe waghens, ende trocken terstont van daer sonder peysteren tot Ghendt toe. Ende vp dien seluen auent ontrent den.x.hueren, so verbarnde die herberghe van sint Ioris te Vrsele, ende quam van bussen te schietene vp een drinckamerkin, daer vp een trezoor buspoer stont daer tvier in slouch, ende terstont so verbarnde thuys.

¶ Item voort ons volc van Brugghe dat daer metten heren ghecommen was om dye te bewarene, die welcke waren wel.iij.hondert sterck, quamen tsanderdaechs ten.x.hueren voor die noene, met haren pingoene, van Brugghe voor Middelburch, want hem lieden ontboden was als dat mer Phelips van Rauesteyn tcasteel van Middelburch hadde ghedaen mannen. Ende waren gheordonneirt noch hondert mannen vander stede van Brugghe, wel voorsien ende met engienen. Dese waren ghesonden ter hulpe vanden anderen.iij^c.voornomt, die welcke terstont die stede innamen, ende schoten seer met serpentijnen. Ende die vanden casteele schoten wedere seere huytewaert met groten wijndaesboghen, want haerlieder poer

[fol. CC.xxxij.r]

was al verstoruen, ende heten dochte niet, maer onse serpentijnen en mochten nyet treffen noch drepen vp tcasteel, maer men ontboot terstont grote engienen van Brugghe omme tcasteel te myneirene met schietene, ende hem lieden worden ghesonden twee bombaerden, daer si mede schoten groote gaten in tvoorseyde casteel, ende die mueren worden bi dien seere gheschuert. Ende binnen der tijt dat dit gheduerde so sandt Phelips van Rauesteyn een hondert colueueriers ter assistencie vanden capiteyn vanden voorseyde casteele, maer si moesten weder keeren, want si quamen te late, want eer si daer gherochten so warender die van Brugghe inne.

[En.xxv.sten dach van Sporcle]

¶ Item die vander Sluys was ghesonden eenen brief vander stede van Brugghe, dat si by ons van Brugghe souden commen sten ter marct, als onse casselrye ende ondersaten. Vp twelcke si ontboden dat sijt gheerne doen souden, maer baden die van Brugghe omme die doot dye god starf, dat si met hare goede ionste te vreden wilden sijn, want sijt anders niet en vermochten noch doen en consten, aenghesien dat mer Phelips van Rauesteyn ouer hem lieden was, metsgaders dat hi beede die casteelen in sijnen handen hadde, byden welcken sijt niet ghedoen en consten. Dit screuen si ouere voor huerlider excusacie, vp den.xxv.sten dach van Sporcle. Ende dese excusacie van dye vander sluys was ghelesen openbaer ter hallen huyt.