Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item vp den.xxvi. sten en den.xxvij.sten en den achtentwintichsten dach van Sporcle]

Item vp den.xxvi. sten dach van Sporcle, soe was huytgheroepen te Brugghe den paeys van Vranckerijcke, den welcken paeys nyement hebben en soude dan diese begheeren soude, met die van Ghendt ende met den drie leden slants van Vlaendren, so si die ghesloten hadden of sluyten souden, want daer bleef noch buyten Denremonde, Aelst, Oudenaerde, ende sluys, want het garnisoen hem daer houden wilde, ende en gauen omme den paeys niet, aenghesien dat die van Ghendt, Brugghe ende Ipre vanden Roomschen Coninc niet scheen en wilden noch hem ontslaen.

¶ Item so was gheordonneirt byden heere ende der Wet vander stede van Brugghe ende den inghesetene van diere om weldoens wille vp den.xxvij.sten dach van Sporcle ter hoocheyt ende vermeersinghe vander eere vanden Roomsche coninc hem te verlogieren in meerdere ende vp schoonder plaetse ende vele playsantere. Ende dat was in thuys dat wijlen eer hadde ghedaen maken meester Ian de gros, staende byder ezelbrugghe, ende was den coninc ghebeden dat hi daer inne soude willen vertrecken ende daer ghelogiert sijn, het welcke hi minlic dede bi sijnen properen wille ende consente, ende vertrac also van Cranenburch int voorseyde huys, ende vraechde eerst eer hi vander marckt schiet den lieden van Brugghe drie vraghen, die welcke waren dese naeruolghende. Deerste was dese, of wi tcommuyn van Brugge bleven byder belofte die wi sijnen edelen persoon belooft hadden. Te wetene van hem niet te scheedene noch te laten commene aen sijn lijf noch goet, ende bi deses belofte blijuende, wilde met ons leuen ende steruen. Vp twelcke wy van Brugghe alle seyden iae. Voort soe vraechde hi die tweeste vraghe, ende was dese, of wi hem souden willen consenteren.xviij.mannen van sijnen huysghesinne bi hem te houdene, om hem te dienene ende te besorghene van dies hem soude moghen behouwen, het welcke hem gheconsenteirt was. Die derde vraghe was dese, ende daer hy oock omme badt, als datmen hem wel bewaren wilde, ende naer hem sien, dat hem die van Ghendt niet mesdoen en souden noch niet en souden wech voeren huyter stede van Brugghe, welcke drie saken hem wel ende ghetrauwelick belooft waren te houdene. Dies warender gheordonneirt byden drye leden slants van Vlaendren.xxxvi.mannen.xvi.vander stede van Ghendt.xij.vander stede van Brugghe, ende.viij.vander stede van Ipre, omme hem te bewarene ende te wachtene, twelck also gheschiede, den achtentwintichsten dach in Sporcle.

[Den seluen.xxviij.sten dach van en den laetsten dach van Sporcle en den eersten dach van Maerte]

¶ Item vp den seluen.xxviij.sten dach van Sporcle, so quam eerst het garnisoen gheordonneirt van dye van Brugghe, gheweist hebbende te Middelburch, ende brochten met hem gheuanghen den capiteyn vander stede van Middelburch, dye welcke

[fol. CC.xxxij.v]

Capiteyn gheweist hadde vanden Vryen, ende was gheboren huyt Normandyen, ende hiet Ghiliebeert dhomme, ende ghebrocht sijnde binnen Brugghe, was binnen twee hueren daer naer gheexamineirt ende ghepijnt, daer hi verkende in sijne pijne, ende oock der buyten, hoe dat hi ende den ontfanghere van Vlaendren, sonder consent vanden lande hadden ghestelt eene taxacie vp tlant vanden Vryen die groot was, die welcke si ontfinghen ende deelden. Ende daer naer so ontfinc die voorseyde Ghiliebeert ende dye gheheele wet van den Vryen.xij^cpont groten, omme dat tlant vanden Vryen een ledt blijuen soude, twelck hi daer verkende dat sijt al te gader deelden, ende leedt noch dat h ontboden was vanden ontfanghere vp den vrydach, den eersten in Sporcle inden burch int tharnasch wel ghewapent ende voorsien, twelcke hi dede. Ende hi inden burch commende, en vandt den ontfanghere daer nyet, maer ghinck te sijnen huyse ende vraechde hem wat hi daer doen soude. Doe vraechde hem die voorseyde ontfanghere wat hy aen hem hadde, ende gaf hem te kennene het stick dat si voeren hadden te doene, ende doe presenteirde hi hem den Roomschen coninc, den Scouteetene, ende den voorseyde ontfanghere sijn lijf thaerlieder dienste, omme tghemeente te nyeten te helpen doene, ende gaf hem ouere ter sentencie vanden drye leden tslandts van Vlaendren, twelc ouer gheuen hem moeste costen sijn lijf. Voort verkende hy noch in sijn pijne, dat vp dye scheedinghe vanden seluen vrydach, hi terstont liep ter Sluys waert, ende also saen als hi ter sluys quam, ghinc terstont bi Phelips monseur, ende seyde hem hoe dat dye misse ghesleghen was vanden voortstelle, ende dat die heren al tonder bleuen waren, vanden welcken mer phelips van Rauesteyn beede dye casteelen te hem waert nam, ende ontboot ghesellen om die te houden yeghens wie dat ware, die hem eeneghen vploop doen wilde, ende van dien en wiste niement dan onder hem beeden Maer hadden die van Brugghe terstont huyt ghetrocken ter Sluys waert, si hadden dye casteelen wel in hueren handen ghecreghen, maer si en dedender gheen diligencie toe. Ende doe sloot Phelips van Rauesteyn metsgaders tversouc vanden seluen Ghiliebeert, dat die selue Ghiliebeert in nemen soude die stede ende tcasteel van Middelburch omme dat te houdene met crachte ende met foortsen, ten behouue van mer Phelips van Rauesteyn, twelcke hy wel betoochde, ende hilt aldus tvoorseyde casteel met foortsegher weere, ende vier te tooghene om bystant te hebbene van die vander sluys, ende dede dat als viant vanden hertoghe Phelips, want hy en hadde hem gheenen eedt ghedaen. Ende siende dat hem gheenen bystant en quam, tracteirde met den volcke van Brugge, als van tcasteel ouer te gheuene ende huyt te commene, ende begheerde te stane ter exame van den drie leden slants van Vlaendren, het welcke hem coste sijn lijf, want men hem nyet claer en hilt datmen hem belooft hadde, maer was also verlact byden capiteyn, die welcke was anthonis van Nyeuwenhoue, die hem brochte vp eenen waghene te Brugghe, ende dat was vp den laetsten dach van Sporcle. Ende den eersten dach van Maerte was hy ghebrocht vanden steene vp dye marct in tparc. Daer saten die vander wet van Brugghe ende dye staten vanden.iij.leden tslants van Vlaendren, die welcke iugierden ende condempneirden den seluen Ghiliebeert vp tschauot te rechtene metten sweerde, ende also te bringhene van leuenden lijue ter doot twelcke also ghebuerde. Maer hi beclaechde hem seer vanden Capiteyn Anthonis van Nyeuwenhoue, dat hy hem in sijn doot ghebrocht hadde by bedroch van sijnder belofte. Ende dyt ghebuerde vp den voorseyde eersten dach van Maerte.

¶ Item soe was ooc gheuanghen eenen ter cause dat hi mede quam inden burch, al ghewapent, ende hadde besproken alle die brauwers knapen ghereedt te wesene te sijnen vermane alst hem ghelieuen soude, daer of datter mer sesse en quamen, dander hadden al gheseyt ooc te commene, maer si en quamen niet, ende en wildent hem niet versekeren te commene. Maer die.vi.voorseyde verbonden hem te commene, so si deden. Maer inden burch commen sijnde, vraechden wat si doen souden, ende hi verantwoorde hem lieden seggende. Blijft hier bi my, men salt hu wel varijncx segghen. Waer vp dat si seyden dat si daer

[fol. CC.xxxiij.r]

nyet blijuen en wilden, aenghesien tstic dat si voor ooghen saghen. En corts naer dye scheedinghe wort hy gheuanghen, ende wort ghepijnt, daer hi verkende dat hi die voornomde brauwers knapen besproken ende ontboden hadde, om den heren te helpene in huer voornemen, want hi den coninc onderstant ghedaen soude hebben met al sijnder macht. Ende hier omme was hy onthooft vp den seluen eersten dach van Maerte.

¶ Item was noch als doe gheuanghen eenen dienare, ende stedehoudere vanden Schouteeten, die welcke omme dye grote ruythede ende ouerlast dat hi ghedaen hadde in sijn officie vp die poorters ende inwonende van der stede, was ooc gheuonnest onthooft te sijne, so hi was vp den seluen eersten dach van Maerte, maer was gheexcuseirt als dat hi niet en wiste vanden voortstelle vanden Scoutheeten, maer moeste nochtans steruen als voorseyde es, vp den seluen eersten dach van Maerte.

¶ Item so was noch gheuanghen als doe eenen, die welcke langhe tijt gheweist hadde Baliu vanden Zietseelschen, ouer wien dat ghinc datmens goede kennesse hadde, dat hi belouede mede inden burch te commene vp den voorseyde eersten dach van Sporcle, om als daer mede te helpene doene, sulck alser gheschiet soude hebben, maer hi en wiste niet tsecreit. Maer bouen dien quam ouer hem groote clachte van foortse ende ruythede die hi ghedaen hadde vp sijn ondersaten van den Zietseelschen, in sijn officie, ende van onbehoorlicke settinghen, die hi hem lieden hadde ghedaen gheuen, omme welcke clachte, hy vanden.iij.leden slandts gheuonnest was ter doot, ende was ooc onthooft vp den seluen eersten dach van Maerte.