Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

Dyt naervolgende es tinhouden vanden brief vanden voorseyde paeyse

ALle dye ghene dye dese presente letteren sullen lesen, sien of hooren lesen, wy Goosin Abt van Asselghem, ende Marten abt van sinte Beertins, Marck Abt van Grimberghe, Dieric abt van Paercke, Anthonis van Brabandt Ruddere, Aernout van Huerne here van Bryanen, Willem vander fonteyne here van Mylain, Ian van Gauere, Pieter van Eerbays, Ian bernaedge here van Bercke Ruddere, Daneel bucxhooren Burchmeestere, Ian pinnock Ruddere Michiel abseloens Ruddere, meester Phelips van Niele, pencionaris ende ghedeputeirde van der stadt van Lueuene, Roelant de mol ruddere, Heyndrick de mol Burchmeestere, Ian van Eenliet Ruddere, Pieter van Oberghe, Arent de scapere, Gheeraert vanden hecke, pensionaris ende ghedeputeirde van der stadt van Bruessele, Maertin van roode Symoen van Gheele, Gheert van Dommele, Pencionaris ende ghedeputeirde vander stadt van Shertoghenbossche, Ian vander Cappelle, ghedeputeirt vander stadt van Thienen, Heindric huenich, ghedeputeirt vander stadt van Leeuwen, Wouter steuins, ghedeputeirt vander stadt van Nyuele, representerende alle te samen die drie staten vanden lande van Brabant. Raphael bisschop van Rochense, Abt van sinte Baefs te Ghendt, Phelips Abt van sinte Pieters Gheeraert Abt van Eenaem, Willem Abt van Boudeloo, Raesse abt van Dronghene, Clement Proost van sinte Maertins Typre, Pieter bogaert Dekene van sinte Donaes te Brugghe, Pieter vanden Houte Proost van Ronche, Wouter vander gracht Ruddere, Ian van Stauele Ruddere heere van Iseghem, Colaert van Halewijn Ruddere heere van Boezijnghen, Adriaen vander gracht Ruddere, heere van Cardau, Cornelis vander barck here van Moscron, Ian van Claerhout here van Pittem Andries vander woestijne here van beyselare, Ioos vander poort here van Morselede, Adriaen Vyleyn here van Raseghem, Gheeraert van Anghereel, Ian de pick, Iacob vanden hule, Pieter Ghijselijns ouerdekene Lieuin de moe Deken vander weuerye. Ghedeputeirde vander stede van ghendt

[fol. CC.xlvi.v]

Ioos die deckere Burchmeestere, Ian van der lende, Steuin van gheinst, Ian beyts pensionaris. Ghedeputeirde vander stede van Brugghe, Pieter die langhe, Andries palijnc, Ian de coorne. Ghedeputeirde van der stede van Ipre, Hughe gantoys, Ian de latre, Ian fransoys. Ghedeputeirde vander stede van Rijssele, Ame pinchen, Iehan dela vaquerye. Ghedeputeirde vander stede van Duway, Arent van scoresse Ruddere, Ian de wulf Ruddere, Ian de meere pensionaris. Ghedeputeirde vander stede van Oudenaerde, Gheeraert de splijtre, ghedeputeirt vander stede van Aelst. Ende meer andere ghedeputeirde van diueersche smalle steden vanden west quaertiere, al tsamen representerende die drie leden slandts van Vlaendren, Willem Abt van Omont, Anthonis Abt van bon esperanche, Michiers de chaers Ruddere, heere van Cleerphay Zebac pieters, Kerstoffels gautier, Seruaes wandaert. Ghedeputeirde van Berghen in Henegauwe, Anthonis van cheins schiltknape, Thomaes de corouble, Gobert hermy. Ghedeputeirde vander stede van Valenchienes, al tsamen representerende die drie staten vanden lande van Henegauwe, Ian Iacobs sone penneman, huyter name vanden Prelaet van Middelburch, Lodewijc van praet Rudder huyter name van mijn here van Rauesteyn, Daneel van Eezele Ruddere huyter name van mijn here van Beuere, Ian vyerloos meester Ian danckaerts sone, meester Cornelis heyndricx sone. Ghedeputeirde vander stede van Middelborch in Zeelant, Cornelis wisse sone, Clays Iacobs sone. Ghedeputeirde van Syericxee, Ian Diericx sone ende Pieter die graue van Remerswale Pieter Symoens sone, ende Ian Gabriels sone. Ghedeputeirde vander Goes, Guysso Ians sone, ende Heyndrick Ians sone. Ghedeputeirde vande stede van der Tollen, al tsamen representerende die drye staten vanden Graefschepe van Zeelandt, Ian de lespine, Lowijs lodevoet, ende Ian soligon ghedeputeirde huyter name vanden staten van Namen Saluyt, huyte dien dat omme die conseruacie ende bewaernesse van alle pollicien gouuernementen ende ghemeene profijten, gheen meerder sake noch nootsakelicker en es dan paeys vrientscap ende eendrachtichede onderlinghe, die moedere sijn van allen duechden, ende cause dat den dienst gods vermeerdert, en staet van den edelen gheeert, coopmanschepe ghehantiert wort, ende tlant gheoeffent in grote ruste ende versekerthede. Ende ter contrarie nyet so hinderlic noch so preiudiciable en es den ghemeenen profijte ende orbore, als tweedrachtichede divisie ende onghereghelthede, die welcke moedere sijn van alle quaetheden, ende oorspronc van alle orloghen ende gheschillen, daer mede dat landen, steden, Prouincien, ende Conincrijcken vallen ende commen in groter confusie ende desolacien, ende dicwille ghetransporteirt worden vanden eenen volcke tot den anderen. Ende het sy also dat die voorseyde landen van heerwaerts ouere, toebehorende onsen gheduchten heere ende prinche den hertoghe Phelips, onlancx ghebrocht sijnde in groten lasten ende tweedrachticheden, so dat iusticie, paeys, minne, ende eendrachtichede, coopmanschepe ende neeringhe daer huyt veriaecht sijn, ende verureimt ter groter onghenouchte ende hindere vanden ghemeenen volcke, ende ter schade ende achterdeele van onsen voorseyde gheduchten heere, die welcke noch onder sijne iaren es, ende die wi als goede ghetrauwe ondersaten schuldich sijn ende behooren te beschuddene, ende te beschermene met alle onse crachten ende machten, als daer toe gheobligiert ende verbonden bi allen rechten natuerlicke, goddelicke, canonijcke ende ciuyle, so hebben wi omme die selue landen weder omme te bringhene in paeyse ende in rusten, ende in goeder pollicie, dye welcke palende waren deene aendandere, ende eenen heere toebehoorende, ghemaect, ghesloten ende besworen, ende belooft, maken, sluyten, belouen ende sweeren met rijper deliberacie, auctoriteyt van onsen natuerlicken Prinche wetene, ende consente vanden Roomschen coninck vadere van onsen natuerlicken prinche, ende van mijne heren vanden edelen bloede vander moederlijcke sijde nv ter tijt wesende herwaerts ouere, hier naer ghenomt. Te wetene mijn heere Adolf van

[fol. CC.xlvij.r]

Cleuen, here van Rauesteyn, mer Phelips van Cleuen sijn sone here van Wijnghendale, ende mer Phelips van Bourgoengien heere van Beueren ende vander Vere. Ende ooc byden consente ende goeder gheliefte vanden hooghe ende moghende prinche den coninc van Vranckerijcke naeste ende barblijckenste oyr van onsen natuerlicken Prinche, ter cause vander Coninghinne, sustere vanden seluen onsen prinche, paeys, eendrachtichede ende minne, vrientschap ende alianchie, goede ende ghestadeghe indulgencie onderlinghe ,ter eeren van gode, ende ten profijte van onsen voorseyde natuerlicken prinche ende sijne landen ende ondersaten, vp dye artijculen ende condicien hier naer volghende, dye selue eendrachtichede also varre als die aen noopt die hoochede, heerlichede ende regementen vanden voorseyde landen steden ende heerlicheden, gheduerende den tijt vander onbeiaertheyt van onsen natuerlicken prinche. Ende also varre als si aengaet, die pollicie gheduerende in eewicheden alle die voorseyde landen ende steden, ende elc bysondere blijuende in hueren rechten preuilegien, vryheden, costumen ende vsaegien.

¶ Eerst so hebben wi vergheuen ende quijte ghescholden, ende by desen vergheuen ende schelden quijte teeweghen daghen alle offencien iniurien ende masdaden die voor die date van desen ghebuert moghen sijn, binnen of tusschen den voorseyde landen met haren steden, by manieren van orloghen, het sy bi woorden of bi faeyten metsgaders alle schadelicke verliesen, verletten, ende interesten diere huyt ghesproten ende naer gheuolcht moghen sijn in wat manieren datter sy, die verghetende gheheel als nyet ghebuert, in sulcker wijs dat elck wie ende van wat lande dat hi sy ghereserueirt by den paeyse van Vlaendren ofte andere sonder eeneghe exceptie. Also wel mer Ian van Bloys, mer Lodewijck van Kestergate, mer Phelips van Eyke, meester Ian lobbe, Wouter van Wezenbeke, als andere diere ghelijcke, te sijne lande, stede ende goede paeysiuelic sal moghen keeren ende hant daer aen slaen in sulcken state als hijt vinden sal. Ende sullen midts dese alle processen gheresen ter cause vanden seluen diuisien, gheaboligiert ende te nieten sijn ende van gheender weerde.