Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item waert dat yement administracie ghehadt hebbende van penninghen]

Item waert dat yement administracie ghehadt hebbende van penninghen, toe behoorende onsen natuerlicken Prinche, van eeneghen steden ofte heerlicheden, ende hem ghemessuseirt hadde in dye voorseyde administracie, ende die gheappliquiert tsijnen singulieren profijte, die selue sal daer of antwoorden ende staen te rechte ter plecke daert behoort, ende daer hy iusticiable wordt.

¶ Item voort so hebben wi belooft ende belouen te doene onse huyterste macht aen den coninck vanden Romeynen, dat hy terstont doe vertrecken alle die garnisoenen ende volck van wapenen, so waer dat die sijn binnen den lande of vp die frontieren vanden seluen lande, te dien eynde dat te bet ende te eer coopmanschepe loop en cours mach hebben, ende dat den landtsman tlandt te bet soude moghen ouffenen ende besaeyen. Ende waert dat eeneghe vanden Capiteynen vanden garnisoenen difficulteyt maecten in tvertrecken, of huere wapeninghe te scheedene, so hebben wi belooft, ende als noch belouen al ghesaemderhant ten ghemeenen coste sulcke prouisie daer inne te doene, als dat die landen terstont daer of ghesuuert moghen worden, ende dat paeys ende ruste daer inne sal moghen commen als te voren.

¶ Item dat wy noch eenich onser ne sullen gheuen noch ghedooghen passaegie duer dye voorseyde landen ende steden eeneghen volcke van wapenen, dat hem vp stellen sal of vp gheheuen sal sijn om vp eeneghe van ons te commen orloghene, bi wien of wat causen dat soude moghen sijn.

¶ Item ende omme dye voorseyde landen te brijnghene in paeyse ende accoorde metter crone van Vranckerijcke, so hebben wi bi ghemeenen ouer eendraghene ghedeclareirt ende verclaerst, declareren ende verclaersen dat wi metten drie leden slandts van Vlaendren ons houden aen den paeys ghemaect int Iaer.lxxxij. Ende hebben gheaduiseirt ende ghesloten te seyndene so wy eerst moghen eenen notable Ambassade aen monseur des Cordes marscalc vanden Coninck van Vranckerijcke ende Stedehoudere vanden

[fol. CC.xlvij.v]

coninck int quaertier van Artoys ende Picaerdyen, omme hem te biddene dat sijne gheliefste sy ons te ontfane ten voorseyde verclaerse, alsoo hi als Commissaris, met den voorseyde drie leden die macht ende dauctoriteyt daer of heift bi opene brieuen vanden voorseyde coninc.

¶ Item voort omme oordene ende reghele te stellen inden staet ende gouuernemente vanden edelen persoon van onsen natuerlicken here ende Prinche gheduerende sijne onbeiaerthede gheregiert wesen sal vp sijne demeynen in elc lant, ende voort ten ghemeenen coste van alle den landen, te wetene in Vlaendren by mijnen heren vanden bloede ende vanden Rade, den welcken Raet gheordonneirt ende ghemaect sal sijn by mijnen heeren vanden bloede voorseyde, ten contentemente vanden staten ende leden vanden seluen lande, ende in thertoochdom van Brabant ende den anderen landen, by den coninc vanden Romeynen als vader ende momboor van onsen erfachteghen heere ende prinche, ende ooc byden seluen heren vanden bloede, ende bi aduijse vanden staten vanden seluen lande. Ende es ooc gheseyt ende ghesloten dat int maken vander ordonnancie vanden state van onsen natuerlicken heere ende prinche men vorderen ende promoueren sal dye beste, edelste ende notabelste vanden voorseyde lande, sonder eeneghe huytlantsche daer inne te stellene. Ende dat die voorseyde mijn heren van den bloede metten Rade den persoon van onsen gheduchten ende natuerlicken here ende prinche den hertoghe Phelips, sullen houden ende veruoeren te sulcken plecken, steden ende heerlicheden van sijnen landen van herwaerts ouere, alsmen byden staten ordonneren sal, ende anders niet.

¶ Item es voort ghesloten dat alle dye saken in alle die voorseyde landen gheexpediert sullen sijn. Te wetene in Vlaendren, onder den name van onsen natuerlicken here ende Prinche den hertoghe phelips, also wel van iusticien, van financien, van officien, van gracien als anders, by aduijse van mijne voorseyde heren vanden bloede ende vanden Rade. Ende in dye voorseyde andere landen byden coninck vanden Romeynen, als vader ende momboor van onsen heere ende Prinche als voorseyde es, ende ooc by die van den Rade.