Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item omme te verheffene iusticie, ordene ende pollicie vanden steden]

Item omme te verheffene iusticie, ordene ende pollicie vanden steden, ende ooc versekerthede vanden casteelen ende fortressen, staende binnen den lande van Vlaendren, es gheaduiseirt ende gheordonneirt, dat als ghebueren sal datmen in dye voorseyde plaetsen of steden of casteelen sal stellen nyeuwe officiers of Capiteynen, wesende in dye voorseyde steden Gouuerneurs, Prouoosten, Baliuus, of Schouteetens, ende ander ghelijcke hoofden van officien, dat mijne voorseyde heren vanden bloede ende vanden Rade daer toe sullen ordonneren, ende inne stellen notabele ende duechdelicke persoonen, daer inne datmen gheen quade suspicie en darf hebben, ende dat ten contentemente vanden wetten ende iusticien vanden plaetsen daer dat te doene wesen sal. Ten fijne datmen bi dien schuwe tverlies, dangier, ende inconvenienten die daer of souden moghen commen ende ghebueren ter schade ende intereste van onsen natuerlicken heere ende prinche, ende van den inwonende van sulcke steden of plaetsen. Ende waert dat by verswijmtheden importunen volghen of andersins, ter contrarie gheschiede dat gheorloft sijn sal den voorseyde wetten ende iusticien, ende den Saudoniers ende bewarers vanden seluen stercten, die niet tontfane tot ander stont, dat hem lieden ghehoort, daer vp andersins gheordonneirt sy.

¶ Item wi hebben voort belooft, dat waert so dat in toecommende tijden yement wie hy ware, yet heesschen of aenspreken wilde mijn voorseyde heren vanden bloede ende vanden Rade, of yement van ons lieden int generale of in tparticuliere ter cause vander veranderinghe van desen regemente, ofte vanden makene van desen duechdelicken paeyse ende alianchie, ofte om eeneghe voorledene saken, hoedanich die sijn moghen, dat wi alle ghesaemder hand ende elck bysondere daer yeghen vallen sullen, ende nyet ghedooghen yement te latene vexerene, of te trauelgierene, in lijue noch in goede, noch andersins, in wat manieren dattet sy.

¶ Item in sghelijcx hebben wy belooft ende belouen ooc noch, dat waert dat yement wie dat hy oock ware, yet practiquieren,

[fol. CC.xlviij.r]

of trafiquieren wilde in preiudicien vanden seluen regemente ofte alianchie, houdende daer of tale ofte sprake met yemende wie hi ware, of ontfaende eeneghe secrete brieuen ofte boodtschepen diere materie aengaende, sonder dye te kennen te gheuene dient behoort, ende dat souffisantelick bleke dat die correctie ende die punicie daer of ghedaen sal worden, in exempele van allen anderen, byden rechten ende wetten dient behooren sal.

¶ Item es voort gheaduiseirt ende ghesloten, ende bi desen ordonneren ende sluyten byder auctoriteyt als bouen, in voorderinghe vander coopmanschepe, dat alle exactien ende toolnen nyeuwelinghe vp ghestelt, also wel te watere als te lande, sonder weten of consent van den voorseyde staten, of ghedaen ende gheweert sullen worden, ende dat van nv voort aen den coopman sal moghen voeren sijne ware ende coopmanschepe vanden eenen lande ten anderen vp die rechte oude toolnen ende gheleede.

¶ Item es voort gheaduiseirt ende ghesloten datmen ghesaemder hant sal pijnen te verweruene aen die duytsche heren, dat die nyeuwe toolne ghestelt vp die Rijnsche wijnen ofghedaen sal worden of neen, men sal daer voorsien inne van sijde van behoorlicken remedie, ende niet ghedooghen datmen in dese landen meer eeneghe nyeuwicheden vp stellen sal, daer mede dat die coopmanscepe beswaert ofte verachtert soude wesen in eenegher manieren.