Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item voort om sekere redenen ons daer toe mouerende]

Item voort om sekere redenen ons daer toe mouerende, ende sonderlinge omme te schuwene alle questien, ende die ter cause vander appellacie gheinterdicteirt bi die van Vlaendren gheschepen ware te rijsene, so hebben wy ter begheerten als bouen gherenonciert, ende sijn of ghegaen renoncieren, ende gaen of bi desen, van onsen momboorschepe ende voochdye in Vlaendren. Ende hebben gheslaect ende ontsleghen van allen eeden die selue van Vlaenderen, die sy ons in dye qualiteyt of andersins ghedaen moghen hebben. Ende consenteren dat tvoorseyde lant ende Graefschap in alle sijne leden sal voortaen sijn gheregiert ende ghegouuerneirt onder den name van onsen beminden sone, also wel in souuereyniteyten in administracien van iusticien als ander sins bi aduijse vanden voorseyde heren vanden bloede vander moederlicker sijde. Ende van sulcken Rade als dye voorseyde heren daer toe stellen ende ordonneren sullen, bi consente ende aduijse vanden voorseyde drie leden ende staten van Vlaendren, achteruolghende der eendractichede voren ghenomt.

¶ Item midts welcker Renonciacie, dye voorseyde van Vlaendren hebben ons gheconsenteirt iaerlicx te gheuene om ons onderhout, die somme van        ponden, te wetene elc pont van.xl.groten, gheduerende dye onbeiaertheyt van onsen sone, die welcke wi heffen sullen byder hant vanden ontfanghere van Vlaendren ten.ij.paeymenten siaers, te wetene deene helft telcken kersauende, ende dandere te sint Ians daghe midsomers. Waer of dat teerste paeyment vallen sal te kersauende nv eerst commende, sonder dat wi yet meer sullen moghen heesschen of heffen in tvoorseyde lant ende graefschip van Vlaendren. Ende midts desen sullen alle die achterstellen die men ons schuldich wesen mach, ter cause vanden subuencien of beden voorleden ofte andersins quijte sijn.

¶ Item hebben verclaerst ende verclaersen dat wy niet en pretenderen eenich recht van proprieteyt of andersins in tlant ende graefscip van Vlaendren, ende hebben belooft ende belouen dat wi daer of niet meer scrijuen noch draghen en sullen den tijtele of wapene.

¶ Item wi accepteren den paeys die den coninc van Vranckerijcke gheapprobeirt heift bi sijne opene ende beslotene brieuen den voorseyde drie leden slandts van Vlaendren, ende allen anderen die hem met den seluen drie leden slants sullen willen voughen, verclarende aen den paeys vanden iare.lxxxij. Ende sijn te vreden dat alle die andere landen hem lieden verclaersen omme den seluen paeys. Ende wi sullen confirmeren ende ratifieren ende onderhouden sonder in breken, alle tghene dat bi onsen ambassaduers (vp dat wy daer eeneghe seynden) of byden ambassaduers vanden seluen staten ghemaect ende ghesloten sijn sal.

¶ Item hebben voort belooft, ende noch belouen den persoon van onsen beminden sone te stellene inden handen vanden heren vanden bloede vander moederlicker sijde, omme voort aen eerlic gheregiert ende onderhouden te sijne, vp den staet die men hem maken ende ordonneren sal, ende ooc veruoert van lande te lande by tijde ende bi ordene, also dat tanderen tijden gheconsenteirt ende gheaduiseirt heift gheweist ofte alsoomen om tbeste aduiseren sal, makende den seluen staet ten onderhoudene, van den welcken die staten van alle den lande con-

[fol. CC.li.r]

tribueren sullen bi rate ende bi porcie.

¶ Item hebben belooft ende belouen te ontlastene die voorseyde van Vlaendren, ende quijte te houdene yeghens onsen voorseyde beminden sone, ende yeghen alle ander diet naermaels aengaen soude moghen van alsulcke yuweelen ende tapijtseryen, als wi naer den voorseyde paeys vanden iare.lxxxv.ghecreghen huyt hueren handen, toebehoorende onsen voorseyde sone.