Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item die voorseyde van Vlaendren]

Item die voorseyde van Vlaendren, also wel in generale als int particulare sullen blijuen in al hueren rechten, preuilegien, vryheden, costumen, ende vsaegien, sonder te lettene of ooghemerck te hebbene vp tghene dat ghedaen mach wesen in preiudicien vanden seluen rechten of preuilegien, in wat manieren dattet sy. Ende sullen alle brieuen van obligacien of anders ghemaect ter contrarien, weder ghegheuen sijn als ghecasseirt ende te nieten. Ende hebben voort belooft ende belouen dat wi nemmermeer ende sullen doen noch procureren ghedaen te sijne directelic of indirectelic eenege saken die commen of keeren souden moghen in preiudicien, schade, ende achterdeele vanden voorseyde lande ende graefschepe van Vlaendren, noch ooc den coopman of der coopmanscepe vanden seluen Ende in dien dat eeneghe sake ghedaen es ter contrarie bi ons bi onsen, het sy gheestelicke sensuren of andersins, die sullen wy terstont wederroupen ende te nieten doen. Ende wi sullen ghenen brieuen van versekertheden alle den cooplieden, ende andere diese heesschen sullen, omme vredelic te mogen gane ende te conuerseirene in huere coopmanschepen, ende andersins in dye duytsche landen, ende eldere al omme, sonder ter cause vanden saken voorleden ghetrauelgiert noch ghemolesteirt te sijne in lijue noch in goede, noch andersins in wat manieren dattet sy.