Dit es dye voorme vanden eede ghedaen, by den Roomschen Coninck Maximiliaen.
WI belouen huyt onsen vryen eyghenen wille, ende in goeder trauwen sweeren vp theleghe Sacrament hier yegenwoordich, vp tweerde heleghe cruyce, vp die weerde helege Euangelien ons heren, ende vp tlichaem vanden heleghen vrient gods mijn here sinte Donaes patroon van paeyse, ende tcanon vander messe, te houdene ende tonderhoudene, ende te vulcommene bi effecte, den paeys, accoort ende vrientscepe, ende goet verstant ghedaen ende ghemaect tusschen ons ouer een sijde, ende onse wel gheminde den staten ende die drie leden slants van Vlaendren, ende huerlider adherenten ouer dandere, tsamen die eendrachtichede ende vnye vanden staten ende alle die landen onderlinge, bi onsen consente ghemaect ende ghesloten in alle sijne ende hueren pointen ende artijculen, naer tinhouden van dien die bi ons, ende ooc onderlinghe by onsen consente beseghelt ende beseghelene. Ende belouen int woort vanden Prinche ende als Coninck, vp ons trauwe ende eere nemmermeer daer yegens te commene, te doen commene, of te laten doen commene, of ghedooghen ghecommen, of ghedaen te sijne directelick on indirectelic, in wat manieren dat sy naer onsen vermoghen, al naer inhouden voorme ende tenuere vander lettere van desen voorseyde paeyse, eendrachtichede, vnye, ende alianchie, ontslaende als nv die van Vlaendren vanden eeden, die si ons als voocht ende momboor van onsen beminden sone ghedaen hebben, ende alle andere in wat manieren het sy.
¶ Item wi Adolf van Cleuen heere vander Marcke heere van Rauesteyn, Phelips van Cleuen ende vander marcke here van Wijnghendale, Phelips van Bourgoengien here van Beuere, ende alle die staten van alle die voorseyde landen hebben ghelijc eedt ghedaen den voorseyde paeys te houden ende te onderhoudene.
¶ Item dye Ostagiers in sghelijcx hebben ghelijcken eedt ghedaen Oostaegiers te sijne naer huytwijsen vanden voorseyde paeyse.
Auteursrechtvrij