Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item vp den.xvij.sten en den.xix en xxi.sten dach van Meye]

Item vp den.xvij.sten dach van Meye, so bleuen twee grote heren in ostaegien voor den coninc van den Romeynen, ende waren sijn rechtsweers. Ende vp den.xix dach van Meye, so begheerde die coninc aen die heeren van Brugge ende aen tghemeene commuyn, dat hem lieden ghelieuen soude dye voorseyde heeren te ontslane ende te laten gane die voor hem in ostaegien bleuen waren, omme dat die coninc soude moghen vertooghen voor den keyser sijnen vadere, dat hy vry ende vranc vp sijne voeten ware, ende dat hi soude mogen tooghen den paeys die hi ghesloten ende ghemaect hadde metten ghemeenen lande, als daer of hier voren wel verclaert staet. Ende die notable heeren ende tcommuyn consenteirdent hem tsijnder liefte ende begheerte, waert by aldien dat die drie leden slants van Vlaendren consenteirden, ende ooc met Phelips van Rauesteyn metsgaders dat hy als Ostaegier was te Ghendt. Ende men sandt terstont te Ghendt aen hem, oft hem in sulcker manieren lief ware, ende hi daer sijn consent in dede,

[fol. CC.liij.v]

alsoo varre alst ware ten oorbore ende profijte van onsen natuerlicken heere ende prinche den hertoghe Phelips, want hi wel wiste datter lettel yement tlandt van Vlaendren beminde, maer vele huyt waren omme dat te nyeuten te doene ende te verderuene, also wel dye ghene dyere groot profijt of ghehadt hadden, als die ghene diere gheen profijt of ghehadt en hadden, noch nyet en wisten wat Vlaendren vermochte, noch watter of was maer princepalic sommeghe steden procureirden om die orloghe te sustineiren, om bi den Brugge te bederuene hadden si gheconnen, maer ten was in haerlieder macht niet. Maer omme haerlieder onminne te betoghene naer haer vermoghen, wan si voor een wrake ende hindere, verboden te commene tot hueren marcten ende vryheden, so si van te voren gheploghen hadden. Ende verbodent princepalic die van Brugghe, van Ghendt ende van Ipre vp den.xxi.sten dach van Meye, ende ooc dye fransoysen, want si soudense ghearresteirt hebben en si daer ghecommen hadden. Ende maecten bi attreete ende apointemente den Venechianen alianchen met hem lieden, midts sekere beloften die si hem lieden deden, daer mede dat si die galleyen van Middelburch thaerlieder coste ghecreghen in hare stede. maer daer wesende en consten haer goet niet vercoopen noch penneghen alsoot hem lieden belooft ende toe gheseyt was. Ende was vele cooplieden berauwen dat si daer ghecommen waren, want god en wilde nyet dat so quam, als dye sommeghe meenden. Ende dit was den galleyen ende hem lieden contrarie van haren rechten ende preuilegien van onser stede van Brugghe.